नक्की ऐका

मी विडंबनकार कसा झालो

 नाट्य परिषद सांगली, आयोजित #नाट्यपंढरी_वाचनकट्टा  आज दि. १६  सायं. ७ वा. l  भाग २८९ l कथावाचन l  लेखक : प्रल्हाद केशव अत्रे l वाचक : श्री. ...

Friday, February 28, 2020

चंद्र ( २रा) आहे पृथ्वीला


🌜चंद्र (२रा) आहे पृथ्वीला 🌛*

काल अमेरिकेतील एका संस्थेने पृथ्वीच्या आणखी एका चंद्राचे फोटो पाठवले आणि ज्योतिष अभ्यासकांच्यात एकच खळबळ उडाली.  चंद्र पत्रिकेतील महत्वाचा ग्रह. सगळ्यात चंचल ही. आज इथं आहे म्हणे पर्यत दोन -तीन दिवसात पार पुढे गेलेला असेल.

 जन्माच्या वेळी तो ज्या राशीत ती त्या व्यक्तीची रास.  आता दोन चंद्र पत्रिकेत एकाच राशीत असेल तर ठिक आहे .पण दोघे वेगवेळ्या राशीत असतील तर प्रत्येकाला दोन राशी मिळतील.

मग एक ताई जिच्या पत्रिकेत एक चंद्र 'मिथून' राशीत तर एक चंद्र 'मीन' राशीत, सकाळी पेपरातले एका दिवसाचे भविष्य दोन्हीकडे बघून कुठल्या राशीच भविष्य बरं आहे ते ठरवून आज माझी हीच रास अशी समजूत घालणार.

बर साडेसाती,  ग्रहण यात होणा-या त्रासाना घाबरुन सिंहाची शेळी झालेल्यांचे 'कुत्र' हाल खाणार नाही अशी परिस्थिती होईल. कारण चंद्र जर दोन वेगळ्या राशीत असतील तर एक साडेसाती संपली म्हणता म्हणता दुसरी काही वर्षात परत सुरु होण्याचा धोका. ग्रहण तर विचारु नका इतकी होणार. तीच गोष्ट अमावस्या/ पोर्णीमे बाबत.

एकाच ग्रहाच्या दोन राशीत चंद्र असेल तर त्यांचे जीवन / हाल त्यातल्या त्यात समतोल म्हणू. उदा. शनिच्या मकर/ कुंभ राशीत एक एक चंद्र असेल तर ठिक पण एक मेषेत आणि एक कर्केत असेल आणि घरी घ्यायची भूमिका कार्यालयात घेतली आणि तिकडं घ्यायची भूमिका घरी घेतली गेली तर विचारायलाच नको. त्यातही जोडिदाराचे दोन्ही चंद्र षडा्-ष्टकात असतील तर दुष्काळात तेरावाच.

तेंव्हा   चार वर्षातून एकदा जसा फेब्रुवारी चा एक दिवस जास्त येतो (जसा आज आलाय) तसा एकच दिवस पत्रिकेत ' दोन ' चंद्र घ्यायचा असा काहीसा नियम ज्योतिष संघटनेने घ्यावा अशी विनंती यानिमित्ताने करतो.

आणि हो सरकारला एक विनंती 'चंद्र व्हा' 🌝 या गाण्यावर ताबडतोब बंदी घालावी. उगाच आणखी वाढ नको, काय 😐


📝 ( ग्रहांकीत)  अमोल
२९/०२/२०२०
(*) - कल्पना विस्तार

स्पायडर मॅन


स्पायडर मॅन , स्पायडर मॅन
🕸  🕷🕷  🕸

एकमेव दूरदर्शन ही वाहिनी असण्याच्या जमान्यात म्हणजे अर्थातच २४ तास कार्टून नेटवर्क, पोगो , आणि कुठली कुठली असंख्य  कार्टून चॅनेल्स नसताना दर रविवारी साधारण ३:३०- ४ वाजण्याच्या सुमारास बहुतेक १५-२० मिनिटे  " स्पायडर मॅन " मालिका लागायची
त्याच्या मागे किंवा पुढे "एक-दोन-तीन-चार" ( १-२-३-४ )ही चार मित्रांची मालिका आणि या सर्व कार्यक्रमांच्या सुरवातीला/ शेवटी ( म्हणजे दोन कार्यक्रमांच्या मधे) लागणारी  "आय लव्ह यू रसना" ही जहिरात , यात आमचा मे महिना कसा जायचा कळायचे नाही.

यातील 'स्पायडर मॅन' च्या करामती खूप आवडायच्या. सरळ साधा माणूस  काही संकट आलं की तो विशेष ड्रेस चढवून कुणालाही पत्ता न लागता  गावावर / शहरावर / देशावर आलेल संकट अगदी सहज परतवून टाकतो हे पाहताना मजा यायची.उंच उंच इमारतीवर हातातून दोर सोडून इकडून तिकडे झेपावणारा स्पायडरमॅन  बघायला भारी वाटायचे.

एका सामान्य माणसाला , 'स्पायडर मॅन' बनवण्यात मोलाची भूमिका बजावतो तो एक साधा 'कोळी '. तुच्छ असा किटक म्हणता येईल त्याला. घरभर जळमटं करून घराची वाट लावणारा असा, ज्याला क्षुद्र समजतो आपण, तो प्रत्यक्षात स्पायडर मॅनच्या मनगटाला दंश करून त्याला ते जाळं तयार करायची शक्ती देऊन  मोठी भूमिका बजावतो असतो.

थोडंस अवांतर
 संस्कृत मध्ये एक कथा होती. थोडक्यात सांगतो.  एकदा एक राजा दरबारात विचारतो  की सगळ्यात क्षुद्र या  जगात कोण आहेत ? खूप विचार करून दरबारातील विद्वान त्याला  सांगतात  ' डास  ' आणि 'कोळी ' हे सगळ्यात क्षुद्र आहेत .
काही दिवसांनी  त्या  राज्यावर शत्रूचा हल्ला होतो आणि राजाला जीव वाचवण्यासाठी पळावं लागतं , तो एके ठिकाणी रात्री थांबतो. पण तिथं असणारे डास त्याला झोपू देत नाहीत. तो जागा राहतो आणि त्याला शत्रूच्या सैन्याची चाहूल लागते आणि ते येण्याआधीच राजा पळून जाण्यात यशस्वी होतो. नंतर तो एका गुहेत लपतो. दमल्याने त्याला झोप लागते.  तिथे असणारे कोळी आपलं जाळी बांधायचं काम गुहेच्या प्रवेशद्वारावरच करतात. इकडे शत्रू सैन्य राजाचा शोध घेत तिथे येतात. पण गुहेच्या तोंडाशी असणारी जळमट पाहून विचार करतात इथे कुणी नसणार आणि तिथून निघून जातात.

तर डास आणि कोळी ज्यांना राजा क्षुद्र समजत होता खरं म्हणजे त्यांच्यामुळेच त्याचे प्राण वाचतात.

कुठून कुठे गेलो ना?

अगदी तसं, जसा स्पायडर मॅन क्षणात स्टॅच्यू आॅफ लिबर्टी ला फेरी मारुन, क्षणात या इमारतीवरुन त्या इमारती वर पोचतो तसं ना?

आता या 'स्पाइडर मॅन ' मालिकेतील आणखी एक मजा. आजतागायत मला मालिका गीत जे इंग्रजीत आहे त्याचे शब्द काय आहेत ते अजिबात कळलेले नाही. भाऊ कदम जसं पाढे म्हणताना विनोदाने फक्त रिदम् म्हणत जातो पाढ्यांचा अगदी तसं मला फक्त चाल पाठ आहे.

इथे यू ट्यूबची लिंक दिलीय. बघा तुम्हाला ते शब्द कळले तर सांगा मला पण समजावून 😄

📝🕸🕷 अमोल
२८/०२/२०२०
poetrymazi.blogspot.in


https://youtu.be/SUtziaZlDeE

Thursday, February 27, 2020

मराठी भाषा दिन


मी काय म्हणतो
मराठीच्या प्रेमाची
नको एकच दिवस भरती..

रोजच येऊ देत अशा
लहान लहान लाटा..

आणि उचलूया आपण सारे
आपला खारिचा वाटा..

📝 अमोल २७/०२/२०२०
मराठी भाषा दिन ✌🏻

Wednesday, February 26, 2020

आम्ही सारे फेरिवाले


आला रे आला, आला फेरीवाला

गेली अनेक वर्ष आम्ही वितरण ( मार्केटिंग )क्षेत्रात आहोत. अनेक ठिकाणी वस्तू विकायला गेलो आहोत.  त्यावेळी एखाद्या ग्राहका कडे गेल्यावर त्याचे वारेमाप कौतुक करतो, धंदा-पाण्याच्या चौकशी कराव्या लागतात( MIS). अगदी घरातले कसे आहेत याबाबत ही खुशाली विचारली जाते.

सगळं झाल्यावर  ग्राहक ही हळूच चाणाक्षपणे  विचारतो मग आता कुठे जाणार आहात ? त्याचा रोख असतो आता आमच्या स्पर्धेका कडे माल विकायला जाणार का?

आता त्याला कशाला नाराज करा. नाही हो आता सरळ परत गावाला. त्याला कशाला सांगायचे भाऊ आमचा पण धंदा आहे, सगळ्यांना माल द्यावा लागतो. तर आमचा देश आपलं पोट भरेल ना?

पंधरा दिवसापूर्वी तर त्याला माल पोचता केला किंवा परत गेल्यावर आठवड्याभरात तो स्वत: मुंबईत भेटायला येणार आहे हे गुपीत त्याच्या पासून कितीही लपवले तरी त्याला कळणार असतेच

असे लाखो विक्रेते ( सेल्स मॅन)  आपले काम इमाने इतबारे करत होते/ आहेत/ राहतील.

त्यातील काहीजण सर्वात सशक्त राष्ट्राचे राष्ट्रप्रमुख ही असतात.

 पण शेवटी सगळे हाडाचे विक्रेतेच

#आम्ही_सारे _फेरिवाले ✌🏻
#अमुक_अब्ज_करार 💰

📝२६/०२/२०२०
poetrymazi.blogspot.in

#हे_सूरांनो_चंद्र_व्हा

महेशजी 'बे-सूर' तुम्ही एकदाच गायलात पण किती तो दंगा सगळ्यांचा. (आमच काय!  आम्ही नेहमीच बे-सूर लिहित असतो )
तरीपण,  महेशजी तुमची परत एकदा ( *बहुतेक शेवटची* ) माफी मागून

 ( चाल: सूर तेची छेडीता, गीत उमटले नव्हे)

" *सूर* " तेची छेडीता, " *चंद्र*" भासले नवे
आज लाभले जगी, 'महेशा'स जे हवे

"फ्यूजन" गीत वठवले, "काळे" हळूच कोमेजले
लय-ताल दुखावले, रुसले तुझ्यासवे

जमल्या सा-या स्मृती, तुझ्याच गाण्या भोवती
गायला कसे "नाकी", शब्द शब्द आठवे

" *सूर" तेची छेडीता*....🎼🎼

📝poetrymazi.blogspot.in

मुंबई बघायला आलेल्यांना यजमान मुंबई दाखवायला घेऊन निघतात. आज मंगळवार, प्रभादेवीच्या सिध्दीविनायकाला आधी जाऊ मग, सेना भवन जवळील मिसळीचा "आस्वाद' घेऊन   मग पुढे काय करायचे ते ठरवू असे यजमान ठरवतात
आता पाहूणे एकदम 'नास्तिक',  खरं म्हणजे सरळ ' मिसाईल' आपलं मिसळ खायलाच जायला पाहिजे असं त्यांना वाटत असतं पण यजमानांचा मान राखण्यासाठी मंगळवारच्या गर्दीत १-२ तास रांगेत उभारुन पाहुणे सिध्दिविनायकाचे दर्शन घेतात. यजमान उंदीर मामांच्या कानात काही तरी कान-गोष्ट करत आहेत म्हणल्यावर पाहुणे ही उगाच कानात तोंड खुपसतात. नास्तिक असून ही ते सगळं एन्जॉय करतात.

आता एक 'फ्यूजनस्टिक' उदाहरण 🤗

" काळी ४" हेच स्वगृह मानलेल्या आणी कायम इथेच आनंदात राहणा-या 'सप्त' सूरांना "काळे'(४)  एक दिवस 'तप्त' होऊन म्हणतात 'चंद्र' व्हा '
आता त्यांचाही मान राखण्यासाठी सप्त सूर तसा एकदा - दोनदा प्रयत्न करतात पण नंतर आपल्या मुळ कामाला परत लागतात.

आता आमचे तात्या.  हो अमरिका वाले. जावं लागलं त्यांना 'साबरमती' ला किंवा आता आज 'राजघाटावर'. बिघडलं कुठं? त्यांनी असं करायला नको होतं असं वाटणाऱ्यांनी परत एकदा वरचा लेख वाचा 😬

#पाहुणे_येती_घरा_

📝२५/०२/२०२०
poetrymazi.blogspot.in

Saturday, February 15, 2020

विधान_परिषद_पाहिलेला_असा_मी


#विधान_परिषद_पाहिलेला_असा_मी

*खबरदार!  त्या खुर्चीत बसलास तर*

आणि महाराष्ट्र आज एका मोठ्या विधानपरिषदेच्या सभापतीला मुकला.

मंडळी, पहिली जी ओळ आहे ती खुद्द आमच्या पिताश्रींनी आम्हाला उद्देशून वापरली आहे.

हे काय आता नवीन ?

काय आहे मंडळी, आमच्या शाळेच्या समुहात अनेक विषय रंगतात, राजकारण हा विषय तर असतोच असतो पण त्याचबरोबर लहानपणीच्या सुखद आठवणी वगैरे वगैरे विषय ही असतात. आमचा हा समुह मला वेगवेगळे लेखन करायला प्रवृत्त करतो.   त्यामुळे की काय  प्रत्यक्ष राजकारणा संबंधीत लहानपणीची आठवण लिहायचा मोह टाळू शकलेलो नाही

तर चला आमच्या 'बालपणीचा काळ सुखाचा' कालावधीत डोकावूया

मे महिन्याच्या सुट्टीत मुंबईला जायचे आणि नवी नवी ठिकाणे बघायची हे साधारण ठरलेले असायचे. एका सुट्टीत चक्क बाबा मला मंत्रालय,  विधानपरिषद दाखवायला घेऊन गेले. त्यावेळी विधानपरिषदेचे सभापती होते "श्री जयंतराव टिळक" आणि त्यांचे सेक्रेटरी श्री लेले आमचे नातेवाईक. बांद्र्याला त्यांच्या घरी गेलो असता त्यांनी सांगितले चल उद्या तूला विधानपरिषद दाखवतो. त्यावेळेला अर्थातच विधानसभा, परिषद या वास्तूचे महत्त्व कळण्या अलिकडचे वय होते. लेले काका जिथे काम करतात ती जागा बघायला जायची आणि नंतर आवडीचे 'गेट वे आॅफ इंडिया ' बघायला  मिळणार हाच काय तो आनंद होता

दुस-या दिवशी सकाळी काकांच्या कार्यालयात पोहोचलो. त्यांनी स्वतः मग सगळी माहिती दिली. समोरची मंत्रालयाची बिल्डींग दाखवली. विधान परिषदेतील वेगवेळ्या नेत्यांची दालने,  इतर कार्यालये दाखवत ते आम्हाला विधानपरिषदेच्या मुख्य सभागृहात घेऊन आले. शिपायाने कुलूप काढले आणि त्या सभागृहात फक्त काका, बाबा आणि मी. इतर माहिती ते बाबांना देत होते काही राजकीय संदर्भ ते बाबांना सांगत होते. पण माझे लक्ष कुठे होते ते काकांनी बरोबर ओळखले.
मला म्हणाले, जा,  बसून बघायचे आहे ना तूला त्या अध्यक्षांच्या खुर्चीवर बस. मी उत्सूकतेने जाणार तेवढ्यात बाबा ओरडले

त्यावेळेला ते काय म्हणाले हे शब्दश: आठवत नाही पण त्या वेळेला त्या सभागृहात झालेल्या बाबांच्या बोलण्याचा मतितार्थ इतकाच होता :-

खबरदार!  त्या खुर्चीत बसलास तर

*तेंव्हा पासून आजतागायत आम्ही पण आमच्या बाबांना दिलेले वचन निभावतोय*

एकवेळ राजकारणावर ' टुकार लेखन लिहू ' पण त्या राजकीय खुर्चीत बसायचा हट्ट कधीच करणार नाही ✌🏻

#विधान_परिषद_पाहिलेला_असा_मी
#आमचीही_वचनपुर्ती

📝अमोल
१६/०२/२०२०
poetrymazi.blogspot.in

Thursday, February 13, 2020

केम छो प्रेसिडेंट ?


कसं काय तात्या बरं आहे का?
अहमदाबाद ला येताय हे खरं आहे का?

*केम छो प्रेसिडंट?*🙋🏻‍♂( * )
मजामा?
तात्या, स्वागताची तयारी जवळजवळ झालीय.  वाटेतील झोपडपट्टी अजून थोडी झाकायची राहिलीय. एक दोन दिवसात होईल काम. विरोधकांना बोलायला काय जातय? त्यांच्या घरी कुणी अचानक पाहुणे आले तर घरातील पसारा आवरण्यासाठी काय काय युक्तया करतात आठवा म्हणावं
बाकी तात्या तुमच्यासाठी कायपणं!
अख्या जगाला 'हिंसेच्या' मुठीत ठेवणाऱ्या राष्ट्रप्रमुखाची  अहमदाबाद दौ-याची सुरवात 'अहिंसेच्या' कुटीतून

मान गये उस्ताद.

 काही काळजी करू नका, आमचे शेठजी समर्थ आहेत सगळ्यासाठी . निवडणूकीचं ही अजिबात टेन्शन नका घेऊ, आता आमचं पण लक्ष B - हार कडे लागलयं. तसंच तुमच्याकडे ही आहे म्हणा.

तात्या, बघा त्या स्टेडिअमच उद्घाटन झाल्यावर मुंबईत एखादी चक्कर मारताय का?

काय? बुलेट झाल्यावर?

झालं, आलात मग, वाट बघा. आपलं वाट बघतो.

पण तात्यानू मुंबईत पण तुम्ही याल म्हणून काही घोषवाक्य केलेलीना आम्ही मनसे,  वाया गेली ना भाऊ

सांगू?  आता तुम्ही म्हणताच आहात म्हणून सांगतो

"आवाज कुणाचा? ट्रम्प तात्यांचा"

ओ,काय हे? आं?
 पश्चिम महाराष्ट्राचे असलो म्हणून काय झालं? आमी बी आमच्या आबा-आज्जा पासून 'अमेरिकेलाच' जातो
असं म्हणता? मग हून जाऊ द्या.

(स्व)विकासासाठी घेतली आम्ही
महा- आघाडीत जंप
साखरेचे पोते देतो
स्वागत तुमचे 'तात्या ट्रंप " 💐

अय्या, तात्या येऊन राहिला का?
" येऊन राहिला तात्या
 द्या त्याला संत्र
घेऊ लगेच त्यांच्याकडून
अमेरिकेला जायचे पत्र"

कोकणचो होणार "कॅलिफोर्नियो"
तात्याची चुकली "अंगणेवाडी यात्रा"
भले प्रेसिडेंट असाल वा पंतप्रधान
"कोकण कन्येचे" तिकट मिळतय, पत्रा

तात्या, तात्या, बघा किती मराठी जनतेचे तुमच्यावर प्रेम आहे
पण एक गोष्ट तुमच्या लक्षात आली का?
पुणेकर लै नाराज तुमच्यावर

सगळ्यात जास्त अमेरिकेत पुणेकर आहेत आणि तुम्ही पुण्याला जाणार नाही?  रागावलेत. कुठल्याही प्रहरातील १-४ या वेळेत बालेवाडीला ही जायची त्यांची तयारी होती. पण त्यांच्या उत्साहावर पाणी फिरवलत तुम्ही. आता काय म्हणतायत बघा

सुन चंपा,  सुन तारा
तात्या पुना, नही आना
बडा दुःख हुअा, सुनलो मेरी बात
अमेरिका जायेंगे आज की रात

तात्यांनू, प्रवासास शुभेच्छा,. येताना ५ 'वेल' दोडा असलेली पुडी विमानात ठेवा म्हणजे चुकुन जरी विमान चिनवरुन आलं तरी काळजी नको आम्हाला

( *) - मनोरंजन हा हेतू

📝१४/२/२०२०
poetrymazi.blogspot.in

Wednesday, February 12, 2020

आमचे मिठी पुराण


"वचन दिन" ( प्राॅमिस डे)  बद्दल काल एके ठिकाणी वाचले की

"आधी लग्न कोंढाण्याचे,  मग रायबाचे "

हे वचन, आणि हे वचन पुर्ण करण्यासाठी जिवाचे रान करणारे स्वराज्याचे रक्षक , यांची यानिमित्ताने आठवण🙏🏻

 तर आज आहे "अलिंगन दिवस"
यानिमित्ताने
स्वराज्यासाठी मोठा धोका पत्करुन "अफजल खानाच्या मिठीचा " स्विकार करुन दगा- फटका होणार हे गृहीत धरुन पूर्ण तयारीनिशी उतरलेल्या महाराजांनी अफजलखानचा कोथळा बाहेर काढला

आणि हिंदवी स्वराज्याला अलिंगन देण्याचा मार्ग सुकर झाला.

भक्ती मार्गातील कृष्ण- सुदामा यांची मैत्रीपूर्ण 'मिठी' म्हणजे उत्कटतेचे प्रतिकच

पहिल्यांदा शाळेत जाणाऱ्या पाल्याची शाळेत सोडायला आलेल्या आई- किंवा बाबांना मारलेली मिठी, सासरी निघालेल्या कन्येची किंवा परदेशी चाललेल्या मुला/ मुलीची  पालकांना मारलेली मिठी,  सांघिक खेळात प्रतिस्पर्धी विरूद्ध विजय मिळवल्या नंतर संघातील खेळाडूंची एकमेकांना मारलेली मिठी, खूप दिवसानंतर भेटलेल्या मित्र/ मैत्रिणीला मारलेली मिठी, एखादे उद्दिष्ट साध्य झाल्यावर एकत्र एका संस्थेत काम करणाऱ्यांनी एकमेकांना मारलेली मिठी  ते एखाद्याचे सांत्वन करण्यासाठी मारलेली मिठी.

कृती एकच पण भावना वेगळ्या

अशीच एक मिठी,  प्रिती संगम कराडला असणारी. कृष्णा- कोयना भगिनींची,  निसर्गाचा अनोखा आविष्कार

हे सर्व सोडून इतर "मिठ्या" या "मुठीत" ठेवण्या संबंधीतच जास्त असण्याची शक्यता

📝अमोल १२/०२/२०२०
#आमचे_मिठी_पुराण
Related Posts Plugin for WordPress, Blogger...