माझी_फुसकुंडी

 गेले नाही दिवस सोशल मिडीयावर एका चित्रावरून बरीच चर्चा वाचली. अनेकांनी ते चित्र पाहिले असेल, लेख वाचले असतील,  अनेकांनी चॅनेलवर ती बातमी पाहिलीही असेल

तर सचिन आणि विनोद या खास मित्रांची,त्यांच्या आचरेकर सरांच्या स्मृतीस्थळा निमित्य  कार्यक्रमात झालेली भेट हा विषय.

अनेकांच्या दृष्टिकोनातून सचिन त्याच्या करिअर मधे  एकदम यशस्वी 

तर विनोद एकदम दुसरं टोक

त्यावर अनेकांनी सांगितलेले/ लिहिलेले  तत्वज्ञान. तर मंडळी माझ्याकडून त्यात ४ आणे ची भर

तुमच्या आयुष्यात तुमच्या क्षेत्रात/ जीवनात,  विनोद सारखे आयुष्य नको ( शेवटी प्राक्तन)

सचिनसारखे यशस्वी आयुष्य मिळावे या शुभेच्छा ( हे ही सहजा सहजी शक्य नाही, हजारात एखाद्याला सचिन बनता येते, इथेही शेवटी नशीब)

तर मंडळी यातील मधला दुवा बनणे जे जवळ जवळ सगळ्यांना शक्य आहे आणि ती फ्रेम आपण मिस करतोय ( बातम्यात दिसलीय)  ते म्हणजे ना विनोद, ना सचिन

आपण आयुष्यात 'प्रवीण आम्रे ' तर नक्कीच बनू शकतो.😁

म्हणलं तर

यशस्वी, म्हणलं तर नाही . फारशी चर्चा नाही. पण त्या फ्रेम मधे उपस्थिती नक्की

करा विचार तुम्ही कोण?

माझी_फुसकुंडी🔥

०८/१२/२४

बॅगा उघडून कळले सारे, बॅगाच्या आत-मधले

 प्रासंगिक * :-

प्रत्येक निवडणुकीत अशी एखादी संधी मिळतच असते 

( मुळ गाणे- शब्दावाचून कळले सारे) 

बॅगा उघडून कळले सारे, बॅगाच्या आत-मधले

प्रथम तुला अडविले आणिक रडू-रडू ते घडले

'अर्थ'  नवा 'नेत्यास' मिळाला

छंद नवा ताल निराळा

त्या दिवशी का प्रथमच माझे 'हेली पॅड' गडगडले 🚁

बॅगा उघडून कळले सारे, बॅगाच्या आत-मधले

आठवते इलेक्शनच्या रात्री 

लक्ष - कोटी मिळतात खात्री

पेटीत तुझिया या सुत्राचे रहस्य ना उलगडले 

बॅगा उघडून कळले सारे, बॅगाच्या आत-मधले

#माझी_टवाळखोरी 📝

१३/११/२४

( * मनोरंजन हा हेतू)

ताराबाई भवाळकर आणि माझी टवाळखोरी

 

ताराबाई भवाळकर आणि माझी_टवाळखोरी 📝

मी ११- १२ वीत असताना ( १९९२-१९९३ ) आईच्या एका पुस्तकाचे प्रकाशन ( पुस्तकाचे नाव बहुतेक: कृष्णस्पर्श)  नेमिनाथ नगरला झाले होते, ताराबाई भवाळकर अध्यक्ष होत्या. त्यावेळी पहिल्यांदाच त्यांना  पाहिले होते.

या कार्यक्रमात शेवटी होणारे आभार प्रदर्शनाचे काम मी केले होते.

त्यानंतर..

२०१७ साली आईच्या 'मृगजळाकाठी' या  कविता संग्रहाचे प्रकाशन सांगलीला ताराबाई भवाळकर यांच्या हस्ते मथुराबाई गरवारे महाविद्यालयात झाले.

या कार्यक्रमात ही आभार प्रदर्शन मी केले होते.

पहिल्या आणि दुस-या कार्यक्रमात फरक इतकाच होता की दुस-या कार्यक्रमावेळी माझी सांगली स्टेशनला हुबळी-दादर रेल्वे चुकू नये म्हणून 'आभार प्रदर्शन' सगळ्यात आधी केले गेले आणि मग मुख्य कार्यक्रम झाला होता 

माझी_टवाळखोरी पुस्तक प्रत्यक्ष भवाळकर बाईंना त्यांच्या घरी जाऊन देण्याच्या काही वर्ष आधीच त्यांना टवाळखोरीची चुणूक मी दाखवली होती. 🤪

अर्थात यापुढे लिखाण होईल न होईल पण ताराबाई भवाळकरांचे आशीर्वाद मिळाले हे मी माझं भाग्यच समजतो

#माझी_टवाळखोरी 📝

संकष्टी चतुर्थी

२०/१०/२४

कोजागिरी

 ' मी परत येईन, मी परत येईन '

म्हणायची, 

चंद्रावर नको येऊ दे वेळ...!

परतीच्या पावसाच्या ढगांचा 

आज तरी लवकर संपू दे खेळ...!

#माझी_टवाळखोरी 📝 अनुदिनी कडून आजच्या कोजागिरी पोर्णीमेच्या खूप खूप शुभेच्छा 💐💐

१६/१०/२४

टोल माफी

 अत्यंत आनंदाने आज हलके वाहन घेऊन आँफीस ला निघालोय

  अर्ध्या वाटेवर आल्यावर लक्षात आले, अरे आपल्या मार्गात तर 'टोल नाकाच' नाही 😁

#ठाणे_बेलापूर रोड 

#माझी_टवाळखोरी 📝

१५/१०/२४

उत्सव

 प्रत्येक गावाची उत्सव साजरी करण्याची एक पध्दत तयार होत असते आणि ती त्या गावालाच शोभून दिसते.

इतर शहरं काॅपी  करतात, आणि जमलं नाही की मग  x$%#&  देत बसतात

 

#डाॅल्बी

#ढोल_ताशा

#लेझीम

#प्रभात_फेरी

#जत्रा

#भंडारा

#दुर्गा_माता_दौड

#नव_रंग

०३/१०/२४ 📝

poetrymazi.blogspot.com

नवसाचा_लेख

 नवसाचा_लेख 

न.मा.न २ बद्दल थोडंसं. तर मंडळी न.मा.न १ हा तुमचा आवडता सिनेमा होता म्हणून जर तुम्ही सिनेमाला जाणार असाल तर जरा

द.मा.न च घ्या

न.मा.न १ ची जशी प्रत्येक फ्रेम खिळवून ठेवते तसं  २ मधे वाटत नाही.

१ बघताना  मुंबई -गणपतीपुळे एशीयाडचे आपण प्रवासी आहोत इतकं वास्तव चित्रण होतं, तसा भास होण्यास २ थोडा अपयशी ठरतो.

दादर हून रत्नागिरी कडे जाणारी कोणती रेल्वे इतकी मोकळी असते ओ 🤷‍♂️, डब्यात आत सहज फिरता येतं? 

एरवी प्रवाश्यांपेक्षा दुप्पट संख्येने फेरीवाले असतात, इकडे फक्त चहा-कॉफी सूपवाला? 

क्राॅसिंग हा या प्रवासाचा अविभाज्य घटक असताना ही अशी कोणती गाडी होती जी सुसाट धावते? कोकणी माणसाला हे पचणे शक्यच नाही.

कोकण रेल्वेच्या डब्यात 'तिकीट चेकर' असतो? 

बसण्याच्या सिट्स सोडून तिथेच खाली बसलेले ,दरवाजात बसलेले प्रवासीच नाहीत? 

दादर- पनवेल-खेड- रत्नागिरी या स्थानकावर गाडी थांबली असताना एक ही वडा-पाव विक्रेता नाही?

 कसं शक्य आहे हे?

नाही म्हणलं तरी 'पनवेल' स्टेशन वर डब्याचे दार उघडले जात नसल्याने वैतागलेला प्रवासी,  शौचालयातून दोन वेळा एकदम ३-३ प्रवासी एकत्र बाहेर येणे हे चित्रण त्यातल्या त्यात 'कोकण रेल्वे' प्रवासास धरून आहे असं म्हणता येईल.

 बस मधून प्रवास करताना कोकणाचा जो निसर्ग अनुभवता येतो त्याच्यापेक्षा किती तरी पटीने जास्त चांगले निसर्ग सौंदर्य हे प्रत्यक्ष कोकण रेल्वे रुट वर आहे असं मला वाटतं. पण फक्त अधून मधून ड्रोन मधून काही सेकंद  धावणारी रेल्वे दाखवून 'उकडीच्या मोदकाची' भूक, तळलेल्या मोदकावर भागवली आहे असे म्हणता येईल. समांतर धावणारा मुंबई - गोवा महामार्ग हा ही या प्रवासाचा एक घटक असतोच असतो. ती फ्रेम ही मिस झालीय.

( ५० खोक्यांचा ओझरता उल्लेख आला,  आता आणखी गोवा हायवेची खपली कशाला काढायची असा सूज्ञ विचार झाला असण्याची शक्यता 😊)

तर मंडळी महागुरु सचिन आणि मराठी सिनेसृष्टीचा 'अनिल कपूर' म्हणजेच 'स्वप्नील जोशी ' ही प्रत्यक्षात भावा-भावांची वाटणारी जोडी , सासरेबुवा - जावई म्हणून कशी वाटते हे मात्र आम्हाला बिलकुल सांगता येणार नाही, त्यामानाने आई-मुलगी-सासू त्रिकूट फ्रेश वाटलं

अशोक मामा मात्र सुपर डुपर हिट ✌🏻

( यांच्या फॅन्सनी सिनेमा चुकवू नये)

नवसाचं ही एक क्राॅस कनेक्शन दाखवलयं म्हणजे पुळ्याच्या गणपतीचा  नवस फेडला जावा म्हणून इकडे सिध्दिविनायकाला साकडे घातले जाते आणि त्याचाही  कौल मिळतो. हा प्रकार जाम आवडला

'आणि म्हणून'  याच धर्तीवर. 'मंथ एन्ड' ची गडबड संपल्यावर आम्ही 'इच्छापूर्ती वरदविनायका' कडे जाऊन नवस बोलणार आहोत की

आम्हाला ही आयुष्यात एकदा तरी आमच्या कुलदैवताला दर्शनाला कोकण रेल्वेने जाताना ' न.मा.न.२' मधे दाखविल्याप्रमाणे निवांत रेल्वे प्रवास होऊ दे. मग महड ला येऊन

 ' गणेश यज्ञ'  करु

अवांतर: ज्यांचा विश्वास आहे त्यांनी अवश्य नवस करावेत, इच्छा पूर्ण झाल्यावर फेडावेत. पण नवस फेडण्याची प्रक्रिया  पूर्ण कपडे घालून ही करता येते हे एक ज्योतिष अभ्यासक म्हणून आवर्जून सांगेन.

चला ना, चला ना,  चला ( आला) वेन्सडे....

#नवसाचा_लेख_टवाळखोरीही_नवसाची 📝

२५/०९/२४

कलियुग

 घोर कलियुगात आहोत आपण

२ -या स्त्री नंतर

आता

( नवसाचा ) नवरा पण २ रा

 🙆‍♂️

२४/०९/२४ 📝

#माझी_टवाळखोरी

खड्डा रस्त्यात माझ्या मायेन

 गुरुवारचे आमचे आवडते गाणे

'दत्त दर्शनाला जायाचं जायाचं, आनंद पोटात माझ्या मायेना'

गणेशोत्सवाच्या पार्श्वभूमीवर जरा बदलून

 ( आणि गणेश-दत्तात्रयांची माफी मागून 🙏🙏)

होळी गणपतीला कोकणात

जायाचं जायाचं

( आता लगीचं काय?  लगीच लगीच)

होळी गणपतीला कोकणात जायाचं

( काय आच-याला? )

*खड्डा रस्त्यात माझ्या*

( वैभववाडी?  )

*खड्डा रस्त्यात माझ्या*

( सावंतवाडी राहिलीये )

*खड्डा रस्त्यात माझ्या*

( अरे पनवेल ते सिंधुदूर्ग सगळीकडेच जायचयं)

होळी गणपतीला कोकणात

जायाचं जायाचं

(पण)

*खड्डा रस्त्यात माझ्या मायेना मायेना*

गेलो पोलिस स्टेशन थेट घेतली इन्स्पेक्टरची भेट

या या गाडीला , या या गाडीला

टोल नको लावूना

खड्डा रस्त्यात माझ्या मायेना

'कोकण' सावळं सुंदर गोजिरवाणं मनोहर

गावा-गावातील ट्रॅफिक काही हटेना

खड्डा रस्त्यात माझ्या मायेना

नजरबंदीचा हा खेळ खेळे पुढारी प्रेमळ

खेळ खेळीता 'हाय-वे' पुरा होईना

खड्डा रस्त्यात माझ्या मायेना

भक्तीवान चाकरमानी, घरी जाण्या दंग

त्याची उत्सवाची हौस पुरी होईना

खड्डा रस्त्यात माझ्या मायेना

सर्वांना गणेशोत्सवाच्या शुभेच्छा. मुंबई - गोवा महामार्ग लवकरात लवकर चांगला बनो ही सुबुध्दी राजकारण्यांना मिळो हीच गणपती चरणी प्रार्थना 💐

#माझी_टवाळखोरी 📝

भाद्रपद शु द्वितीया 

गुरुवार, ५/०९/२४

माफी

 कशाचीच नसती गॅरंटी

चुकलं तर मागायची माफी

' अब की बार ', मेरे मित्रों,

यही ' मंत्र' है  काफी 

३१/०८/२४ 📝

गोविंदा

 दही-हंडीच्या उत्सवात

गौतमी -अन् राधा...

कसा होणार सांगा

कार्यक्रम अगदी साधा...

थरावर थर लावत

'आला आला गोविंदा'

सब घोडे- बारा टक्के

कधीच लिहून गेलेत विं.दा.

#माझी_टवाळखोरी 📝

२७/०८/२४

Poetrymazi.blogspot.com

दही-हंडी

 बालकवी आणि इतर सर्व संबंधित घटकांची क्षमा मागून

मुंबई-वासी हर्ष मानसी

हंडी दिसे चोहीकडे

क्षणात येते मंडळ इकडे

क्षणात सलामी दुसरीकडे

वरती बघता मोठ्या क्रेनने हंडी उंचवून ठेवी असे

मंगळ-वारी सिने तारका नृत्यकरुनी बघा हसे

'भावी' आता 'आमदारांच्या' ,अनंत 'दही-हंडी' पहा

सर्व चौकांमधे दिसले त्यांचे,बक्षिसांचे 'फलक-महा"

तडफड करूनी डोलारे आपुले,बघा गोविंदा सावरती

धावुनी वाहिन्या बातमी घेऊनी, निज-बाळांना दाखवती

'संकल्प' करुनी 'सार्थकतेचा 'जय जवान' सरसावला 

'संस्कृती' जपूनी उत्सवाची,  हर्ष मनीचा वाढविला

#माझी_टवाळखोरी तर्फे दहीहंडी ते महाराष्ट्र नवीन मुख्यमंत्री शपथविधी सोहळ्यापर्यंतच्या सर्व उत्सवास शुभेच्छा 💐📝

#गोकुळाष्टमी

२६/०८/२०२४

माझी_टवाळखोरी

 

1. 

हार कर भी जीत ने वाले को बाजीगर कहते है'

 

सोशल मिडियावरच कुठं तरी वाचलेलं की नंबर १ पटकावलेला लक्षात राहतो, नंबर २ वर कोण आहे हे कोणी लक्षात ठेवत नाही.

आपल्याकडे ही म्हणतात

'जो जिता वही सिकंदर ' वगैरे वगैरे.

मंडळी, चित्रातील या टर्किश अर्जुनाने आपल्या 'अँटिट्यूड' ने ( मराठी शब्द रोखठोक वागणूक? ? )  वरती जे लिहिले आहे ते अगदी खोटं पाडलं आहे. पॅरिस आँलिम्पिक मधे त्याने पदक जिंकलेल्या प्रकारात नंबर १ वर कोण आहे या पेक्षा सध्या सोशल मिडीयावर नंबर २ वर आलेल्या याचीच जास्त चर्चा आहे. 

साला ,भाव खावा तर असा !

मला वाटतं तो हिंदी सिनेमांचा भक्त असावा आणि मिथूनदा, रजनीकांत यांचे सिनेमे पाहूनच त्याने एवढी 'सहजता' मिळवली असणार आहे अशा पध्दतीने गोळ्या मारण्यात

एखाद्या समुहाची मैफिल जमलीयं, गाणं म्हणणा-या मित्र - मैत्रिणीला गाण्याची फर्माइश झाल्यावर कुठल्याही वाद्यांची साथ, माईक , नोटेशन वगैरे नसताना 'प्रोफेशनल सिंगरला' लाजवेल असं गाणं त्याच्या/ तिच्याकडून सादर होणं अगदी असंच हे घडलयं

अशीच काहीजण व्हाट्सप ग्रुप / फेसबुकवर वर असतात,  कधीतरी एकदाच येऊन अखादीच गोळी योग्य ठिकाणी  मारून जातात आणि लाईक, कमेंटचा ढिग पडतो. 

" एरवी उगाच रोजचं AK47 घेऊन ठो,ठो,ठो ठो करणा-यांकडे  कुणाचं लक्षही नसतं फारसं " 

असो,  थोडक्यात सांगायचे झाले तर

'हार कर भी  जीत ने वाले को बाजीगर कहते है' हा संवाद ' जो जिता वही सिकंदर'  पेक्षा सध्या तरी भारी ठरलाय 🎯

#माझी_टवाळखोरी 📝

०३/०८/२४

आषाढ कृ. चतुर्दशी

poetrymazi.blogspot.com

नोकरदार भुलला

 ज्ञानेश्वर माऊलींची माफी मागून, निर्मलादेवी चरणी अर्पण 

🙏🌸

नोकरदार भुलला

नोकरदार भुलला

टँक्स मोजिता करु,खुळीयासी झाला

नोकरदार भुलला

नोकरदार भुलला

इतुकेसे स्लँब, फेकियले स्वारी

तयाचा भरणा, गेला गगनावरी

नोकरदार भुलला

नोकरदार भुलला

पगाराची पुंजी,गुंतविला झोला

माय 'निर्मलादेवीवरी' इन्क्कम अर्पिला

नोकरदार भुलला

नोकरदार भुलला

आषाढी संकष्टी चतुर्थी

२४/०७/२४

#माझी_टवाळखोरी 📝

क्लाऊड' चुकीचा ठरतो

 

मुळ कविता ; पाऊस कधीचा पडतो

विडंबन :- अर्थात #माझी_टवाळखोरी  📝 

( कवी ग्रेस यांना स्मरून 🙏)

'क्लाऊड' चुकीचा ठरतो

'मायक्रोची' फेल बटणे 

बोंबाबोब 'हार्ड' झाली

'विंडोजच्या' निळ्या धुराने

डोळ्यात उतरले पाणी

'सर्व्हरचे' डोके फिरती

'आय-टी' चा चढला पारा

आज आपुल्या  धरणीवरती

'रिस्टार्ट' कसे होईना?

'सिस्टीम' वर पडला घाला

सा-यांचा जमिनीवरती

प्रवास असा अडखडला

संदिग्ध 'प्रोग्रँम'च्या ओळी

'बायनेरी' कोड सारा

अशाच घटनांवरती

शनीचा वक्री पहारा

शनिवार

आषाढ शु.चतुर्दशी

२०/७/२४

#माझी_टवाळखोरी 📝

हवामान खात्याचे आभार

 हवामान खात्याचे मी एका गोष्टीसाठी अत्यंत आभार मानू इच्छितो. त्यांनी जर परवा ' रेड अलर्ट' वगैरे दिला नसता तर ही गोष्ट माझ्या लक्षातच आली नसती.

तर गोष्ट अशी की त्या अतिवृष्टीच्या शक्यतेमुळे आम्ही सकाळी आँफीसला निघताना जास्त सुरक्षितता असावी म्हणून  छत्रीसह फूल रेनकोट घालून निघालो. अर्थात हवामानखात्याच्या भकितांचा अनुभव गाठीशी असल्याने लोकलला खच्चून गर्दी होतीच. नेहमीप्रमाणे डब्यात शिरून दोन पायावर स्थिरस्थावर झाल्यावर आपसूक हात मोबाईल कडे गेले. पण मोबाईल मुळ विजारीच्या कप्प्यात आणि त्यावर रेनकोटची विजार असल्याने मोबाईल काढता आला नाही.

" अशारितीने आमचा लोकल मधील प्रवास ब-याच दिवसानी खिडकीतून बाहेरचं बघण्यात  गेला. "

( याठिकाणी एक गोष्ट नमूद करु इच्छितो की सामान्य लोकलवासी मुंबईकरांना खिडकीच्या बाहेरही न बघता, स्वत:च्या मोबाईल मधे पूर्ण वेळ व्यस्त असतानाही आपले स्टेशन केंव्हा येणार,जागेवरून दरवाज्याकडे केंव्हा जायचे याचा 'सेन्स' बरोबर असतो)

यातून एक गोष्ट मात्र लक्षात आली की मोबाईल, पाकिट लोकलच्या गर्दीत मारले जाऊ नये म्हणून हा वेश उत्तम

आणि म्हणून सूर्य नारायण दर्शन देत असताना, अंगातून घामाच्या धारा वहात असताना वरचा रेनकोटचा कोट न घालता फक्त विजार घालून जायचा धाडसी निर्णय ( किमान पावसाळा संपेपर्यत)  घेतला आहे.

आता विरारपर्यंत फास्ट असो वा खोपोली फास्ट आपला खिसा कायम सेफ आणि तेवढ्यापुरते सोशल मिडीयावरुन सुट्टी

ही गोष्ट लक्षात आणून दिल्याबद्दल हवामान खात्याचे परत एकदा आभार

आषाढ शु. पंचमी

११/०७/२४

#माझी_टवाळखोरी 📝

कंपनी कल्चर

 

आषाढस्य प्रथम दिवसे

 आषाढस्य प्रथम दिवसे

मेघांनी ठरवलं ब्रेक घ्यायचा

विकेंडला लोणावळा-खंडाळा करुनच

कालिदासांच्या बायकोला निरोप द्यायचा

पुणे- मुंबईकरांसारखेच

आकाश मार्ग करायचा जाम

कालिदास काहीही म्हणोत

निर्णयावर आपण रहायचं ठाम.

#पावसाळा_विकेंड_लोणावळा_शास्त्र

#माझी_टवाळखोरी 📝

आषाढ.शु.प्रतिपदा

मरीन_लाईन्सचा_महापूर

 या विश्वात अगणित आकाशगंगा आहेत. त्यात  आपली आकाशगंगा, मग पृथ्वी, भारत आणि मग आपले गावं त्यात आपणं  म्हणजे  आपण किती लहान आहोत वगैरे आध्यात्मिक प्रवचन ब-याचदा ऐकले आहे

पण त्याचं एक छोटं माॅडेल काल मरीन लाईन्सला प्रत्यक्ष  अनुभवलं.

गर्दी मुंबईकरांना नवी नाही

लोकल रद्द/ उशीरा आल्याने होणारी गर्दी, गणेशोत्सव, दहीहंडी, राजकीय सभा, जयंत्या, अंगारकी, नवरात्रोत्सव, आणि कुठलाही शनिवार-रविवार गर्दी असणार हे गृहीत असतेच

पण कालचा गर्दीचा महापूर मात्र अचंबीत करणारा होता आणि याची चुणूक दादर स्टेशनलाच आली

काल पहिल्यांदाच कदाचित असं झालं असेल की संध्याकाळच्या वेळेला बोरिवली -विरार कडे जाणा-या लोकल पेक्षाही चर्चगेट कडे जाणाऱ्या लोकल मधे जास्त गर्दी होती

चर्चगेट स्टेशनवरून बाहेर पडायलाच ५  मिनिटे लागली. स्टेशन समोरच्या एका छोट्या गल्लीतून मजल-दलमजल करीत कसंबसं मुख्य रस्त्यापर्यंत येता आलं. 

५ ते ६ रोड शो ची वेळ असताना, साधारण पावणे सहा वाजताही चँम्पीअन्स ना आणणारी बस  उजवीकडे वानखेडेच्या बाजूने, ट्रायडंट कडे मुंगीच्या गतीने जाण्याचा' ट्राय ' करत होती. ही G पासींगची बस तिकडे पोहोचणार मग खेळाडूंना घेणार आणि परत येईपर्यंत आमच्या 'निलांबरीने ( आपली डबलडेकर) सहज २ - ४ फे-या केल्या असत्या हा विचार मनात येऊन गेला 🤪

*या अथांग जनसमुदायाचा भाग बनताना वय्यक्तिक तुम्ही अगदीच 'शून्य' आहात याची जाणीव वेळोवेळी मोबाईल नेटवर्क देत होते*

अगदी हाकेच्या अंतरावर परिजन आहेत पण तुमच्या संपर्क क्षेत्राच्या बाहेर ( किंवा तुमच्या अवती भवती आहेत तेच सध्या तुमचे परिजन) या वेगळ्या अलिप्तपणाची जाणीव झाली

या सगळ्यात आकाशातील ड्रोन मात्र सुदैवी होते. ही एकमेव गोष्ट पूर्ण मरिन-लाईन्सवर इकडे तिकडे ( वर-खाली ) सहज करु शकत होती 😛

"येतोस का? आम्ही असू तिकडे" असा सकाळी ९:३० ला पुण्याच्या मित्राला दिलेला मेसेज आणि ३:१५ ला त्याचे आणखी एका मित्रासह छत्रपती शिवाजी महाराज टर्मिनल्स वर झालेले आगमन,(पण शक्य न झालेली भेट )

#लाडके_मित्र _योजने अंतर्गत, जे असे लाखो फाॅर्वर्ड्स काल दिवसभर ढकलले गेले त्याने 

'न _भूतो_न_भविष्यति!' अशीही परिस्थिती काल मुंबईच्या मरिन लाईन्स वर उद्भवली,

आणि म्हणून 

#लाडके_मित्र_योजना अंमलात आणणा-यांवर कठोरात कठोर कारवाई करण्यात यावी , अध्यक्ष महोदय   !

#मरीन_लाईन्सचा_महापूर

अमोल

०५/०७/२०२४

माझी_टवाळखोरी 📝

प्रासंगिक टवाळखोरी

शपथविधी

 "सगे - सोयरे " सोबत घेऊन

शपथविधी तिसरा

पुढील निवडणुकी पर्यंत ( तरी)

भांडण-तंटे विसरा 😛

#माझी _टवाळखोरी 📝

०७/०६/२४

नसतेस कधी तू जेंव्हा,

 नसतेस कधी तू जेंव्हा, जीव तुटका तुटका होतो

मुंबईचे तुटती धागे, प्रवास फाटका होतो

'महा ब्लाॅकची' न्यूज पडावी,कल्लोळ तसा ओढवतो

सेंट्रल दिशाहीन होते अन हार्बर पोरका होतो

येताच फलाटावरती, हिरमसून जातो मागे

स्टेशनावर थबकून सारा, मग चाकरमानी जातो

तव डब्यात शिरण्याच्या,मज स्मरती घातक वेळा

घामाविन शरीर असावे, मी अजून अगतिक होतो

तू सांग सखे मज, काय सांगू मी घरदारा

सिग्नलचा जीव उदास, माझ्यासह लाललाल होतो

न अजून झालो मोठा, न गाडीवाला झालो

तुजवाचून ट्रॅफिक वाढे, तुजवाचून प्रवास नासतो

( लोकल प्रेमी ) अमोल 📝

#माझी_टवाळखोरी

स्वरगंधर्व सुधीर फडके

 

*देव देव्हा-यात नाही, देव नाही देवालयी*

सुधीर ना तू ?

अरे तुझ्या नावातच धीर धरणे आहे.

काळजी करु नकोस, 

आम्ही सगळे तुझ्यासोबत आहेत.

सर संघ चालकांचे हे प्रेरणादायी शब्द सुधीर फडके यांना अडचणीच्या वेळी उभारी देऊन गेले.

काही दिवसांपूर्वी  जागतिक पुस्तक दिनानिमित्य एका शाळेत माझ्या पुस्तकातील 'उत्प्रेरक' या प्रकरणावर बोलताना मी म्हणालो होतो की आयुष्यात अशा काही व्यक्ती / घटना- प्रसंग  / गोष्टी येतात की ते तुमच्यासाठी 'कॅटॅलिस्ट' बनतात.

आज 'स्वरगंधर्व सुधीर फडके' सिनेमा पाहिल्यावर माझ्यासाठी हा सिनेमा नक्कीच 'उत्प्रेरक ' ठरेल. स्वातंत्र्यवीर सावरकरांवरचा सिनेमा पहायचा राहिला हे शल्य हा सिनेमा पाहून थोडे का होईना कमी झाले.

स्वत: निर्माण केलेल्या वीर सावकर सिनेमाची ४ तिकीटे विकत घेऊन फडके सिनेमा बघायला येतात ही सिनेमाची सुरवात. दूरदर्शन वरील प्रतिभा आणि प्रतिमा या कार्यक्रमातील मुलाखतीतून बाबूजींचा जीवनपट फ्लॅशबॅक स्वरूपात उलगडू लागतो.

अत्यंत संघर्षमय तारुण्याचा काळ, आत्महत्या करावी इतका टोकाचा विचार पण सुदैवाने संघ स्वयंसेवक म्हणून मिळत जाणारी मदत आणि एका  टप्यावर आयुष्याला मिळालेली कलाटणी. थक्क करणारा बाबूजींचा हा प्रवास

मुंबई - नाशिक- मालेगाव - पंजाब-कोलकत्ता- कोल्हापूर - पुणे या त्यांच्या प्रवासाबरोबर प्रत्येक घटनेला अनुसरून त्यांचीच गाणी,यांची छान गुंफण झाली आहे

हा माझा मार्ग एकला - ते - फिटे अंधाराचे जाळे व्हाया गीत रामायण ऐकता ऐकता ३ तास कसे संपतात कळत नाही 

गदिमा - बाबूजींची जुगलबंदी छान रंगलीय

काही टवाळखोर निरीक्षणे

१) दूरदर्शन च्या आवारात बाहेर फिरताना काही क्षण सुनील बर्वें मधे अजीत पवार यांचा भास  झाला. तर सिनेमातील आशा भोसलेंच्या केसांचा रंग जरा पांढरा असता तर अगदी सुप्रिया ताई...😬

२) गीत रामायण रौप्य महोत्सवी कार्यक्रमात पुण्याला अटलजी त्यांच्या भाषणात म्हणतात 'सुधीर फडके और मेरा पुराना रिश्ता है'😳  ( इथे आमचाच घोळ झाला)

३) अंकित काणे हे आमचे फेसबुक मित्र. त्यांनी आधीच एक पोस्ट टाकून या सिनेमात त्यांनी पु.लं.ची भूमिका केली हे सांगितले होते म्हणून बरं. नाहीतर हे पु.लं आहेत हे कळलेच नसते 😷

४) किशोर कुमार हे विनोदी नट होते पण त्यांचं फारच विनोदी पात्र इथे सादर केले गेले आहे . 😄

बाबूजींनी संगीतबद्ध केलेले आणि त्यांनी म्हणलेले गाणे 

' दिन है सुहाना आज पहिली तारीख है ' 

तर योगायोगाने आज १ ल्या तारखेलाच 

गुरु ग्रह मेषेतून, वृषभ या रसिक राशीत गेला असताना आमच्यासाठी 

*ग्रह आले जुळुनी, अनुभवली सगळी सुरेल गाणी* 🎼

#माझी_टवाळखोरी 📝

#स्वरगंधर्व_सुधीर_फडके

०१/०५/२०२४

राजकीय_टवाळखोरी

 बहिणीने बांधली राखी

तरी भावाला नाही दया...

'भावनेची' ओवाळणी 'गेली'

आता रडत बसलीय बया.

#राजकीय_टवाळखोरी 📝

#पापमोचनी एकादशी 

५/४/२४

( कुठे फेडाल ही पापे)

तिढा कळेना, तिढा मिटेना

 सध्याच्या एकंदर  महाराष्ट्रातील राजकीय परिस्थितीला समर्पित:-

* मनोरंजन हा हेतू 

( मुळ गाणे येईल लक्षात)

तिढा कळेना, तिढा मिटेना

तिढा खंत करी काही केल्या सुटेना !

गेले 'वर्षाच्या' बनी

चालली नेत्यांची वाणी

"जिंकू पायात पाय अडकवून रे"

गेले 'सागर' किनारी

गंध पोचला राजधानी

शत्रूसंग गळाला आली 'सिट' रे !

चल ये रे, ये रे गड्या

नाचु उडू घालू फुगड्या

खेळू 'इडी' 'झिम्मा झिम्' हीच आपली थीम्

 आ sssss आ ass आ 🎼

तिढा कळेना, तिढा मिटेना

तिढा खंत करी काही केल्या सुटेना !

महा-राष्ट्राचे आंगण

आम्ही करु भांडण

जुने उकरु  आपण सारे 'वाद'रे

'जन' दुर्लक्षित 'किडे'

यांची धाव व्हाटस्पकडे

आपण करु 'शुध्द' लूट-मार रे !

'तिढा' गाठी आला सुटून

नाव आले, यादीत छापून

कोण मी?  - पक्ष?  'आया' की 'गया' राम रे ? ?

#राजकीय_टवाळखोरी 📝

अमोल केळकर,बेलापूर 

०३/०४/२४

फाल्गुन.कृष्ण नवमी,

#माझी_टवाळखोरी 📝

 

एक तुतारी द्या मज आणुनि

 कवी केशवसुत यांची मनोमन माफी मागून 🙏

( * मनोरंजन हा हेतू )

एक तुतारी द्या मज आणुनि

भिजवेन ती ही  स्वबळाने

भेदुनि टाकिन सगळी गगनें

दीर्ध जिच्या त्या किंकाळीने

( *काका मला वाचवा !* )

अशी तुतारी द्या मजलागुनी

निवडणुकीच्या गणितातले

सूत्र प्रमेय जे आजवरी

होतील ते वाचाल सत्वरी

फुंक मारीता जिला जबरी

कोण तुतारी ती मज देईल?

युती, महायुती यांची भेसूर

संताने राक्षसी तुम्हाला

फाडूनी खाती ही हतवेला

जल्शाची का? पुसा मनाला!

तुतारीने ह्या सावध व्हा तर!

चमत्कार! ते ई.डी पाठवूनी

सुंदर, सोज्वळ गोड मोठे

अलिकडले ते सगळे खोटे

म्हणती धरुनी ढेरी पोटे

धिक्कार अशा मूर्खांलागुनी

जुने जाऊ द्या मरणालागुनी

जाळुनी किंवा पुरुनी टाका

"सडत जाऊ दे घडीचा काटा"

सावध!ऐका पुढल्या हाका

फायद्यास चला फायदा भिडवूनी

"लोकसभा" हा विशाल भूधर

'विधान' सभा ही तयात शोधा

निजनामे त्यावरती नोंदा

बसुनी का वाढविता मेदा?

विक्रम काही करा, चला तर!

" एक तुतारी द्या मज आणुनि "

#माझी_टवाळखोरी 📝 *

२३/०२/२४

ड्रीम रन

 #हर_🧡_मुंबई 

#पळतीय_मुंबई 🏃🏻‍♂️

वर्षातले किमान ३०० दिवस तरी सामान्य मुंबईकर सकाळ - संध्याकाळ पळतच असतो. 

*On Your Mark*

 ( घरातून निघताना)

*Get Set* 

( जवळच्या स्थानकापर्यंतचा प्रवास)

*Go*

( फलाटावर येणारी नेहमीची लोकल पकडून कामाच्या ठिकाणी वेळेत पोहोचणे)

प्रत्येक जण या प्रोसेस मधूनच जातो. फक्त कुणाची Get,set, go ची  वेळ ६:१७ कुणाची ७:२८, तर कुणाची ८:०३ इतकाच काय तो फरक

परतीचा प्रवास ही असाच ठरलेला, वेगवेगळ्या वेळेत घडणारा

आणि हे सगळं कशासाठी ? 

" अनंत स्वप्नपुर्तीसाठी "

मुंबई पळते, धावते,  अडखळते, धडपडते पण अगदी अपवादानेच बंद राहते, ती ही अगदी क्षणभरच.

समाजा बद्दल कृतज्ञता म्हणून तसेच रोजच्या 'रन' मधून विरंगुळा आणि मुंबई बद्दलचा जिव्हाळा, तमाम मुंबई-नवी मुंबई- कल्याण- ठाणे, पनवेल- वसई-विरारपर्यतच्या ( महामुंबई) सर्वांना आज वर्षातून एकदा एकत्र आणतो ते या

"ड्रीम रन "साठी 🏃🏻‍♂️🏃🏼‍♀️

अर्थात मुंबई मॅरेथाॅनच्या निमित्याने 

एकदम साजेसे नाव. कोण म्हणतं नावात काय आहे?

५९,००० नोंदणी

 त्यातील किमान ५०-५५ हजारजण तरी नक्कीच पळतायत. 

रोज वेगवेगळ्या लोकलमधून येणारे आँफीस सहकारी आज एकत्र गप्पा- गोष्टी, हास्य- विनोद,अन् नेहमीच्या ठिकाणी गाॅसिपींग न करता मरीन ड्राईव्हर समु्द्राला साक्षी ठेऊन गाॅसिपींग करत चाललेत ( sorry पळतायत 😬)

हक्काची सुट्टी असून ही आज १ दिवस सर्वजण जमलेत ते मुंबईवरील प्रेमाखातर. हे ही एक #मुंबई _स्पिरीट

आणि हो मुंबईकरांसाठी डिजिटचे महत्व किती असते हे वेगळं सांगायला नको. लोकलच्या वेळापत्रका प्रमाणेच ही ड्रिम रन पण ५.९ किमी बरं का!  ( ६ किमी नाही) 

मरीन ड्राईव्ह तर नुसती जत्रा. एरवी याच रोडवर चारचाकी गाड्यांच्या पुढे जाण्यासाठी जी कसरत करावी लागायची तीच आज एकमेकांना ओलांडून पुढे जाताना माणसांना करावी लागत होती.

या मॅरेथाॅनचे खास निमंत्रित मात्र अगदी अगदी थोडावेळ का होईना हजेरी लावून गेले.  तशीही त्यांना मुंबई फारशी आवडतच नाही म्हणा!

कोण काय विचारताय? थंडी/ गारवा ओ 😁

असो, यानिमित्याने तमाम मुंबईकरांना एक प्रेमळ सल्ला:-

*पळणे इथल्या जगण्याचे,तत्व मनी तू जाण!*

 *ही एकची गोष्ट मनी वसो, जोवरी देही प्राण!*

आणखी एक टिप: ज्यांना पुढल्या वेळेला पहिल्यांदाच ड्रीम रन मधे भाग घ्यायचा आहे त्यांनी यंदाच्या वर्षी लालबागच्या राजाच्या दर्शन रांगेत उभे राहून सराव करावा. Starting point येईपर्यंत रांगेतच खुप वेळ जातो.

🏃🏻‍♂️🏃🏼‍♀️🏃🏻‍♂️

          🏃🏼‍♀️🏃🏻‍♂️🏃🏼‍♀️  

                          🏃🏻‍♂️🏃🏼‍♀️

अमोल केळकर ( नवी मुंबई)

२१/०१/२०२४ 📝

#मुंबई_मॅरेथाॅन #Mumbai_Marathon 

#ड्रीम_रन #Dream_Run 

#टीम_मुकंद #Team_Mukand

#माझी_टवाळखोरी 📝