शुभेच्छा

याने   काय  फरक पडतो
हिंदू  नववर्ष  वा  ख्रिस्ती
करणारा  करतोच
पाहिजे तशी मस्ती  :)

 १ जानेवारीच्या  शुभेच्छा

( झोपी गेलेले, जागे झाले )

' झाडून ' सारे पक्ष , 
मते  जनतेची काढली
निवडणूकीच्या  लढाईत
मर्जी  ' आपली ' वाढली

अमोल केळकर, ९ डिसेंबर २०१३

स्वप्नात खजिना येईल का ?

स्वप्नात खजिना येईल का ?
हंड्यात नाणी ही निघतील का ?

मी कुदळ हाती घ्यावे, तू ढिगास बाजू करावे
दोघांनी ठरवून घ्यावे, ही वाटणी नकळत ठरतील का?
स्वप्नात खजिना येईल का ?

ही झुंड मुंग्यांची संग, गांडुळाला आली जाग
डासांनी फोडले अंग, झुडपात कोंबडी धरशील का ?
स्वप्नात खजिना येईल का ?

सोन्याचा प्रतिमा दिसता, जणू स्वर्गच येई हाता
हातभरुनी घेता घेता  गजर ऐकून तू उठलीस का ?
स्वप्नात खजिना येईल का ?

( संधीसाधू ) अमोल केळकर
दिनांक ३१ ऑक्टोबर २०१३

दिपावलीच्या सर्वांना शुभेच्छा. 

३री गोष्ट

एका लग्नाच्याही आता

 गोष्टी होतात अनेक

टीआरपी वाढण्यासाठी
झी ची अचूक फेक

निषेध

मी  तयार ठेवलेत सर्वप्रकारचे
 निषेधाचे खलीते
 कारण सरकार आता उरलेय
 फक्त उपचारापुरते

अमोल केळकर
२४ ऑगस्ट २०१३

गटारी

 काय ठरला बेत ?  झाली का तयारी?

 अहो असं काय करता, आहे ना गटारी

यानंतर काही दिवस

विसरुन जा कालवण

बरोबर ओळखलंत

येणार आहे श्रावण........

To ' डे '

अमोल केळकर, १ ऑगस्ट २०१३

२६ जुलै

कुणी विसरु शकेल
ती काळी रात्र  ?
जणू सागरच बनले होते
मिठी नदीचे पात्र

तरीही आमचे सुरु
शहरीकरणाचे सत्र
शिकलो नाही आपण
यातून काडी मात्र

२६ जुलैग्रस्त  मुंबईकर

* जर्दा आणि मावा *

 सरकारने घेतला निर्णय
 सर्वांनी करुया  वाहवा
 गुट्ख्या बरोबर आता
 बंद होणार आहे मावा

जर्दावरही आता म्हणे
येणार आहे बंदी
मागील दाराने देणा-यांची
होणार की हो चांदी

अमोल केळकर
जुलै २३, २०१३

छम- छम-छम

रोजगाराचे लेबल लावून
सुरु झाली छम छम
रोजच गार होणा-यांना
सोडणार  नाही यम

उघडपणे आता परत
घेतली जाईल रम
आबा तुमच्या इशा-यात
आता राहिला नाही दम

अमोल केळकर
१६ जुलै २०१३

निमित्य आहे पावसाळा
आस असे  भेटीची
बघा सुरु झाली लगेच
लगबग चार ओळींची
------------------------------------
अमोल केळकर, जुलै १२, २०१३

चार - ओळी

एकदिवस अचानक
भेटल्या  ओळी चार
मी मात्र शोधत राहिलो
त्यातील गहन विचार
---------------------------
अमोल केळकर, जुलै ११, २०१३

बुध्द

काय करताय तुम्ही
आहे का तुम्हाला शुध्द
रडतोय म्हणे तिथे आता
हसणारा तो बुध्द ......

अमोल केळकर, १० जुलै २०१३

राज - मार्ग

टोल ( वा ) टोल ( वी)

रुपया

जेष्ठ नागरिकांच्या पंक्तीत

जाऊन बसलाय रुपया

आराम करु दे त्याला

नका  देऊ त्रास कृपया

अमोल केळकर, २७ जून २०१३

चांदी

     सोन्यासारख्या संहितेची

     करुन टाकली चांदी
     रस्त्यावर येणारच आडवी
     कधी म्हैस कधी फांदी

    पु.ल करुन कथेला
    दिला गेला नवा लूक
    मराठीच्या प्रेमापोटी
    माफ करु ती ही चूक 

                                                               

अमोल केळकर
                                                              १४ जून २०१३

** एका खेळाची गोष्ट **

  ** एका खेळाची गोष्ट **

येणारा पुढचा चेंडू
झाला होता फिक्स
फलंदाजाने मारली
घणघणाती सिक्स

तीन तासाच्या सिनेमाप्रमाणे
गोष्ट घडते खेळाची
किंमत ठरते ' शून्य ' मग
सामान्य जनतेच्या वेळेची

अमोल केळकर
मे २०, २०१३
( www.poetrymazi.blogspot.in)

विचारपूस ...

दरवर्षी गणपती बाप्पाला
मिळतात आंबे हापूस
करतील का कधी आंबेवाले बंधू
सामान्य माणसांची विचारपूस ...

अमोल केळकर
मे १४, २०१३
( विनायकी चतुर्थी , अंगारक योग ) 

ये है मुंबई मेरी जान !!!!!!!

ज्या शहराने दिले नाव
त्याचाच आला कंटाळा
खाल्या मिठाला जागून तरी
तोंडाला लावून घ्या टाळा

बदल असतो आवश्यक
त्याला आमची ना नाही
बदलापूरला लक्षात आले
मुंबई यांची राहिली नाही

( मुंबईकर )  अमोल केळकर
एप्रील ३०, २०१३

झाडाझडती

 काका मला वाचवा
 पुरे झाली झाडाझडती
आम्हा दोघांच्यातच आता
वाटून द्या सगळी खाती

अमोल केळकर
एप्रील २७,२०१३

' ' एक ' असत्य ' प्रयोग

वर्मावर बोट ठेवताच
असत्य आले बाहेर
रामू लक्षात ठेव आमचे
सगळीकडे आहेत हेर

माफीनाम्याचा खलिदा
ताबडतोब झाला प्रकाशीत
' आवाज कुणाचा ' प्रश्णाला
उत्तर मिळाले खणखणीत

अमोल केळकर
एप्रील २४, २०१३

आयपील

टीआरपीच्या नावाखाली
माफ होतील यांच्या चूका
म्हणूनच हे विराट सामने
गंभीरपणे पाहू नका

आयपीलचे प्रतेक वर्ष
नवे वादळ येत असते
यावरच तर खेळाडूंचे
सर्व गणित ठरले जाते

अमोल केळकर
१३ एप्रील, २०१३

IPL

देशासाठी खेळताना
तूलाच होते हरवले
पैशासाठी मात्र लगेच
सर्व काही विसरले

अमोल केळकर

मी - माझे फेसबुक

सकाळचा चहा  माझा, लॉगीन शिवाय होत नाही
तरीही  फेसबुकवर मी  आजकाल जास्त येत नाही

लोकलमधे  उभे रहायला जागा मुळीच नसते
चवथ्या सीटच्या जागेसाठी आस कायम असते
उभ्याने खरं सांगतो मोबाईलही येत नाही सांभाळता
इथे येण्यासाठी म्हणूनच  घेतलाय पाय आखडता

सकाळी सकाळी  साहेबाला होते मिटिंग घ्यायची इच्छा
मग कशा देणार हो  मित्रांना वाढदिवसाच्या  शुभेच्छा
शिळ्या पोस्टना लाईक करण्यास अर्थ उरत नाही
म्हणूनच  फेसबुकवर मी  आजकाल जास्त येत नाही

व्हॉटस अप म्हणत शेजारचा मित्र मेसेज पाठवतो सारखे
म्हणून का मी व्हावे माझ्या फेसबुकला पारखे ?
अवघड जागीचे दुखणे असे यात काहीही नाही
तरीही  फेसबुकवर मी  आजकाल जास्त येत नाही

मैत्रीचा हात स्विकारायला कष्ट आहेत अनेक
कळत नाही यातील कोणते अकांट असेल फेक
कालचा मित्र आज लगेच ओळख दाखवत नाही
म्हणूनच  फेसबुकवर मी  आजकाल जास्त येत नाही

अमोल केळकर
मार्च ७, २०१३

मी कॉपी केली नाही, मी पेस्टही केले नाही

            अल्बम - कॉपीपेस्ट वर बोलू काही

  

        मी कॉपी केली नाही, मी पेस्टही केले नाही

        मी राईट क्लिक साठी ,कधी माऊस घेतला नाही.....

        भवताली सतत चाले, ते इंटरनेट बघताना

        कुणी  धाग्यातून चिडताना, कुणी एकट्याने लढताना

        मी सदस्य होउनी बसलो, फेसबूकवरती जेंव्हा

        ते पहायला देखिल, मग कुणी राहिले नाही.....

        एकच ब्लॉग मी पाहे,   मूळ लेखन जिथल्या तेथे

        काढूनी प्रिंटही  त्याची   वेळीच टॅगली पाने

        पण झोपेतून एकदम, जागच आली नाही

        कुणी लाईकही केले नाही, कुणी लाईटली घेतले नाही......

        काढलेला एकच धागा, चाहत्यांची उलटी मुंडी

        जालावर अजुनी दिसती , डिलीट पोस्टच्या  नोंदी

        मी  सोम्यालाही भ्यालो, मी गोम्यालाही भ्यालो 

        मी मनाशी  सुध्दा माझ्या , कधी पंगा घेतला  नाही

        मज जन्म स्थळाचा मिळता, मी ‘याहू’ झालो असतो

        वाढवायची असती यादी  तर ‘हॉटमेल झालो असतो

        मज डिलीट करता कोणी  रडलो वा हसलो नाही

        मी फॉलो केले नाही अन करुन घेतले नाही 

     

      अमोल केळकर
     फेब्रुवारी १२, २०१३ 

लिलाव

 इकडून तिकडे तिकडून इकडे
  संघ बनवले मालकांनी
  बँक खाती सर्वांचीच
  भरून वाहतील पैशांनी

 जून्या बरोबर नव्यांचाही
 दणक्यात झाला लिलाव
 ' सचिन दादा ' यंदा तरी
  बॅटला बॉल लाव

अमोल केळकर
फेब्रुवारी ०४, २०१३

विश्वरुप दाखवा हो ...... !

 नशीब या कलीयुगात
अवतार घेतला नाही
भगवंताने !

विश्वरुप दर्शनासाठी त्यालाही
फटकारले असते
हायकोर्टाने !!

अमोल केळकर
फेब्रुवारी १, २०१३

कुणीच  नाही म्हणत
आम्ही आहोत विकाऊ
तरी सर्वाना पाहिजे
मिळणारा सोपा खाऊ

'आम' दाराने आलेलेही
'खास' दार हुडकतात
नेते मात्र विनाकारण
तोडघाशी पडतात

अमोल केळकर
जाने २९,२०१३ 

जोशी Vs आपटे

जोशी आपटेंच्या वादात
मिडिया घालतीय फोडणी
यातूनच होणार आहे आता
अध्यक्षपदाची जुळणी.

अमोल केळकर
जाने २७,२०१३


 

अध्यक्ष - उपाध्यक्ष

कुणाचा बनतो अध्यक्ष
कुणाला उपाध्यक्षाची माळ
काय माहित कसा असेल
येणारा पुढचा काळ

सहा  - नऊ च्या गणितात
जनता झालीय त्रस्त
नेत्यांना मात्र रोज नवीन
चरायला कुरणे मस्त

अमोल  केळकर
दिनांक - २३/१/२०१३

८६ व्या अ.भा मराठी साहित्य संमेलनास हार्दीक शुभेच्छा

८६ व्या अ.भा मराठी साहित्य संमेलनास हार्दीक शुभेच्छा

हित साध्य करण्यासाठी

घेतले जातात मेळावे

अशी स्थिती असताना

मागे का रहावे ?

साहित्य संमेलनात उपस्थिती

राजकीय नेत्यांची नवी रीत

साहित्यीक मात्र जमू लागले

मैदानात  भीत भीत

अमोल केळकर

जाने ११, २०१३

चार दिवस सुनेचे

' चार दिवस सुनेचे ' 

सासूच्या चार दिवसानंतर
सुनेचेही येतील दिवस चार
प्राईम टाईमच्या या खेळात
स्वतःच होऊ या तडीपार

अमोल केळकर
जाने. १०, २०१३

थंडी

थंडी

मुंबईतील घराघरात
बंद झालेत फॅन
आठवणीत राहील थंडीने
दोन हजार तेराचा जॅन

अमोल केळकर
जान ९,२०१३