सांगा पाऊस कुणि हा पाहिला

हवामान खात्याचे सर्व अंदाज,  जोतिष शास्त्राप्रमाणे लागलेले 'हत्ती ' वाहन या कुणालाही न जुमानता 'पाऊस'अजूनही  गायब आहे

त्यामुळे हा जालीम 'टुकार' उपाय योजला आहे.  ऐ वाचून तरी पाऊस पडेल ही एकमेव आशा

( चाल: सांगा मुकुंद कुणी हा पाहिला)

सांगा पाऊस कुणि हा पाहिला
 सांगा पाऊस कुणि हा पाहिला

जलक्रिडा करिता लोणावळी हो
आज झालो होतो गहनविचारी
फसवुनी गेला तो जलधारी
कुठे गुंतून बाई हा राहिला

सांगा पाऊस कुणि हा पाहिला

सारे आळविती रे, जलदुताला हे
वियोग आम्हालाही तुझा ना साहे
वेधशाळे चौकशी करिता हो
मार्ग सुकरझाला कमी दाबाचा
सप्तपदी लावूनी बेडकी-बेडकाचा
म्हणे 'टुकार',  ढग हा गडगडला

सांगा पाऊस कुणि हा पाहिला

📝 २६/६/१९ ⛈

योगा योगा अखंड करु या

विडंबन करणे म्हणजे काही  *खायचं* काम नाही बरं. त्याला ही *योग* लागतो.

*योगायोगाने* आज तो जमला.

( चाल: धागा धागा अखंड विणूया, विठ्ठल विठ्ठल मुखे म्हणू या)

योगा योगा अखंड करु या
"रोज उद्याला" असेच म्हणू या

हातापायांच्या आकृतींचे
उभे आडवे गुंतून अंगे
विविध ढंगी शरिराचे
योगा करण्या 'योगी'रंगे
नारायण तो भास्कर पहिला 🌞
नमस्कारुनी त्याला स्मरुया 🙏🏻

योगा योगा अखंड करु या
"रोज उद्याला" असेच म्हणू या

करचरणांच्या मागावरती
गुढगा उंचवून नाक टाका
घेऊन हात उंचावरती
कमरेमधून निट वाका
योगीत्वाचा घेऊन चरखा
सुदृढतेचे सूत्र धरूया

योगा योगा अखंड करु या
"रोज उद्याला" असेच म्हणू या

📝 २१/६/१९

मेगा डे

रविवारचा दिन

क्रिकेटचा खेळ

सत्यवान (फादर) आरामात

नाही सावित्रीला  वेळ

फराळाची लगबग

पूजेची कहाणी

सात जन्माचे फेरे

स्वयं-पाकाची पहाणी

अयोध्येचा दौरा

त्यात शपथ-विधी

'फादर्स डे' उसना घेऊन

संपणार दिवस कधी ?

📝 अमोल

१६/६/१९

वेध लागला....

नमस्कार. 🙏🏻☔

८ जून म्हणजे  'रवीचा मृग नक्षत्र' प्रवेश आणि त्यानिमित्याने पावसाळी ऋतूची सुरवात होते. यावर आम्ही इतके ठाम आहोत की भले  आजकाल ' पाऊस' स्वतः ही  यावर एवढा ठाम रहात नसेल.

पण या पावसाळी ऋतुचकातील जून महिन्याचा सुरवातीचा कालावधी हा

"रिमझिम घाम येई  सारखा,
चरबीला ही ज्वर चढे,
पाणीच पाणी कुठे गेले  ग बाई,
गेला  पाऊस कुणी कडे ।। "

असा असतो.

साधारण याच सुमारास  स्कायमेट, वेध शाळेने  आपल्या आपल्या धनुष्यातून 🏹सोडलेले तीर निघू लागतात. पावसाच्या बातम्या लक्ष वेधून घेऊ लागतात , मग एखादी बातमी अशीही असते अगदी आज सकाळी आली तशी

'नभं उतरू आलं, ढग केरळ पोचलं । 🌨
झाड आडवं  झालं, हिरव्या कोकणात  ।। '🌴

केरळ, गोवा, सावंतवाडी, रत्नागिरी, चिपळूण,  पेण करत करत एकदाचा "मान्सून" पनवेल च्या वेशीवर येतो हे तेंव्हाच समजायचे जेंव्हा सकाळच्या एसटी बसेस उशीरा यायला सुरु होते.पण त्यात ही हर्ष असतो.

'थांबून ज्याची वाट पाहिली ते सुख आले दारी ।
जिथे तिथे 'एसटी'ही, घेई छान भरारी ।
छतावरच्या  पाण्याने  ओला झाला सदरा  ।।💧
'पावसात घन निळा बरसला  🌧

आता तुम्हाला पावसात सगळ्यात जास्त काळजी घ्यायची आहे  अशा वस्तूची :-

'आजवरी यांना किती जपलं जपलं ।
रिचार्जचे पैसे किती खपलं खपलं । चार्जिग करून यांना, दिला ग उभारा ।'

"आला आला वारा संगे पावसाच्या धारा । सांभाळून तुम्ही मोबाईल धरा !मोबाईल धरा"!!📲

गेले काही वर्षे पावसाचा जोर हा शनिवार-रविवार जास्त असतो असं दिसून येतंय. चाकरमान्यांना जास्त त्रास नको अशी एक भावना यात पावसाची असावी. मग घरात सुरक्षित बसून चहा,  भजीसह

पाऊस आला, वारा आला, पाणी  लागले साचू ।
हिंद-माता सायन सर्कल, भर भर बातम्या  वाचू ।। 💧💧 

यातली मजा काही औरच.

एरवी सकाळी घरातून निघताना  बातम्या बघा, बाहेर साधारण आकाशात कितपत काळोख झालाय याचा अंदाज घ्या त्यावरून अनुमान काढा नाहीतर :-

"टाकुनिया घरदार अडकणार, अडकणार ।नको नको म्हणताना, राहू नको ऑफिस विना ।।"🤦🏼‍♂

ये रे घना ।। ⛈

आणि मग पाऊस चांगला मुरला की  जुलै मध्ये  अशी घटना  म्हणजे नित्याचीच बाब होते

जसा ' सेंट्रलचा ' जीव घुटमळं ।
तसा 'हार्बरला' मिळतयं बळं ।
तुझ्या सिग्नल ला सिग्नल  माझं मिळं ।
ह्ये , बघून 'वेस्टर्न'  जळं ।

वर ढगाला लागली कळ ।
मुंबई तशीच पळं ।।"
 🏃🏃🏃🏻‍♀

नंतरच ' मुबंई  स्पिरिटच'  वगैरे  आम्ही बघून घेऊ , काळजी नसावी. 🙋🏻‍♂

पण लवकर ये, यावर्षीचा पावसाळी मुंबईचा आस्वाद घ्यायला आम्ही तयार आहोत

# ऋतू हिरवा ...🌨☔⛈💧🌊
👍🏻

📝 (मुरलेला मुंबईकर ) अमोल
विनायकी चतुर्थी ६/६/१९

काय टाकले ' व्हाट्सअप'वरती

सध्या गदिमांची एक कविता ( 'काय वाढले पानावरती ऐकून घ्यावा थाट संप्रती ) स्पृहा जोशी यांनी सादर केलेली सगळीकडे फिरते आहे.  त्यांनी ती ठसक्यात सादर केली आहे यात काहीच शंका नाही पण मुळ कवितेचे श्रेय हे गदिमांचेच ( जाची कुठेही चर्चा होत नाही आहे किंवा ब-याच जणांना ते माहीतही नाही आहे),

 निदान इथून पुढे forward करणा-यांनी गदिमांची  ही कविता स्पृहा जोशींनी खुप छान सादर केली आहे असा बदल करुन पुढे पाठवावे.

या कविता लिहिण्यामागचा इतिहास , जो पुण्याच्या शनिवारवाडा/ पेशवे यांच्या संबंधित आहे तो इच्छुकांना इथे वाचता येईल

https://www.google.com/url?sa=t&source=web&rct=j&url=https://www.gadima.com/marathi-articles-lekh/27/536/Kai-Wadhale-Panawarti.php&ved=2ahUKEwiW4vXD-criAhXL7XMBHRrrAe4QFjAAegQIAhAB&usg=AOvVaw0sf3JejKdZVst12im0i6Yz&cshid=1559484806991

आता एवढ्या 'चविष्ठ' काव्याचा कच्चा माल मिळाला असताना त्याचे वेगळे रुप येणारच. मुळ कविता खाद्यसंस्कृतीवर तर बदललेली कविता Whatsapp आणि फेसबुक ही ज्यांची (खाद्य) संस्कृती झालीय अशांना समर्पित

*काय टाकले ' व्हाट्सअप'वरती*

काय टाकले व्हाट्सअपवरती,वाचून काही नाही कळती
सरळ लेखन हे पुढे टाकले , वाचलेल्यांचे निळे दिसले
'आले' आमचे बहु मुरलेले,मित्र मैत्रिणी हिरमुसलेले

कुठुन पुढारी मधूनच आले,राजकारणाचे वांदे आणले
खमंग त्याचे विवाद केले,निरनिराळे नखरे नटले
चमच्यांचे बहु नवे मासले,संमेलनची त्यांचे भरले

तिरपे उत्तर त्यासह आले,क्लेश  भाजूनी त्यात वाटले
तामस गुणांचे मिलन झाले, पंचप्राण हे जवळी आले
द्वेष त्यांचे हवेत भरले , व्हाट्सअप 'अण्णा' बधीर जाहले

प्रभात काळी 'टिप्स' आल्या, काही वाचल्या काही सोडल्या
काही पाहून सुरेख पाळल्या , चारोळीच्या ओळी जमल्या
अर्थ त्यातही देती चिमुकल्या, मुळात विसंगती धरतो 'अमल्या'

'केक' धाडून शुभेच्छा दिल्या, फिरून त्याच्याही 'पेस्टी' सजल्या
एकरूप त्या सहज झाल्या, मेंबर आले जणू अवकाळी
जानभरली आज सकाळी, सुरस बोलणे आणि मखमली

फेसबुकातही मैत्री जमली,शहर शाळा कॉलेज जवळी
'ऑन लाईनची हिरवी खेळी, स्टेट्सचीही गोडी निराळी
दुःखी हसरी तेथे स्माईली,किती  प्रकारे वेगवेगळी

सार गोड हे सोशिकतेचे,शोभत पोस्टी मधुर लाइकचे
भरदार होई भिंत सुगंधी,पुढचे लिहिण्या काही अवधी ........

आता ' आरोप प्रत्यारोपांसाठी '  दर्दी जमणार  म्हणून इथेच थांबणे  योग्य 🙂

 📝 अमोल केळकर ३/६/१९


( मूळ गदिमांचे  काव्य वरील दिलेल्या लिंक वर वाचता येईल )

वडा, इडली रहस्य मोठे

मुंबईतील रस्त्यावरच्या खाद्यसंस्कृतीची काही रूपे सध्या व्हायरल झाली आहेत. यावरूनच  गदिमा/ बाबूजी यांचं
 'लळा जिव्हाळा शब्दच खोटे ' हे गाणे असे  लिहावेसे वाटले

वडा, इडली रहस्य मोठे
माशा , त्याही येई
घाब - रायचे नाही राजा, घाब रायचे नाही

'चटणी' कुठे रुप साधते या नगरीची माया ?
कोण जातो कुर्ला येथे, कुणी बोरिवलीत खाया
करताच मागणी नुसती,  जो तो आपुले पाही

'घाम'- टायचे नाही राजा, घाब रायचे नाही.

इथे रस्त्यावर गाड्या जमवी, जीलबी काढी कोठे?
पाणीपुरी खाऊन जगती, चाकरमानी छोटे
अतिक्रमणाची येता फेरी, भय्या पळून जाई
कुणी कुणाचे नाही, वेड्या कुणी कुणाचे नाही

📝अमोल
# मुळ गाणे- लळा, जिव्हाळा शब्दच खोटे