तनू वेड्स मनू

तनू वेड्स मनू . . 

सगळा भारत . . 

आनंदलाय

जणू . 

कुणी पाहिला पाहिला पाहिला हो माझा ....सिनेमा कुणी पाहिला....

आज मी एक सिनेमा पाहिला

" अगं बाई! "

अरे यात 'अगं बाई 'करण्यासारखे काय आहे, हो आणी मराठी सिनेमा होता तो .

"अरेच्या "!
अरे, म्हणजे काय? मराठी माणूस आहे, मराठी सिनेमा पाहणारच की
आणी आता त्यावर माझे परिक्षण लिहितो आहे
"२ रे "
हुश: ! झालं एकदाच टायटल तयार
"अगं बाई! अरेच्या २ "
एकदमच कसही करुन जुळवून आल्यासारखं झालयं ना, सिनेमाचंही अगदी तसंच झालय, विशेषत : केधार शिंदे आणि पहिला सिनेमा यांची पार्श्वभूमी असताना.
साधारण पणे कुठल्याही सिनेमाचा भाग -२ म्हणजे भाग -१ चा काहीतरी उल्लेख, रेफरन्स असतोच, अपवाद हा सिनेमा. त्यामुळे या सिनेमाचा भाग -२ असे नाव न ठेवता काही वेगळे नाव दिले असते तर ते जास्त संयुक्तीक ठरले असते. भरपूर विनोद, गावाकडली माती, मन उधाण वा-याचे हे बाहेर ठेऊनच सिनेमा पाहणे
लहानपणी आपण ऎकलेली गोष्ट एक राजा असतो आणी तो ज्या गोष्टीला हात लावेल ते सोने होतं असत, या सिनेमाची ही अशाच प्रकारची कथा

प्रेम. - स्पर्श - अपघात
मुख्य नायिका शुभांगी (सोनाली कुलकर्णी)
लहानपणापासून (हो अगदी शि - शू वर्गात असल्यापासून) अगदी लग्नाच्या दाखवण्याच्या कार्यक्रमांपर्यंत, ज्यांच्या प्रेमात पडते आणी त्यांना स्पर्श करताच ते( प्रेमवीर) २४ तासाच्या आत डोक्यावर पडतात ( त्यांना अपघात होतो) .
मग ती लग्न न करायचे ठरवते
(आता परत इथे मंगळ, शनी, गुरु, अष्टम स्थान, शांती करुन ही लग्न जमत नाही असे दाखवून जोतिष शास्त्राला बदनाम केले आहे, अरे त्या शुभांगिनेच ठरवले होते की लग्न करायचे नाही म्हणून, मग कशाला रे आमच्या मागे लागायचे, असो)
मग तिच्या आयुष्यात एक लेखक येतो ( चला लेखकाला तरी बरे दिवस येवोत ...)
आणी मग उत्तरार्धात परत
"प्रेम - स्पर्श - अपघात- आनंद"
आजकालच्या सिनिमात आवश्यक असणा-या सर्व गोष्टी आहेत जसे उकळणारा चहा (हो तो आवश्यक्ता झालाय) , प्रेम गीत, पाहुणे कलाकार आणि हो आजकाल मराठी सिनेमात भेटणारी माऊली, माऊली , माऊली म्हणजे पंढरीचा राजा
असो, अगं बाई अरेच्चा १ या सिनेमाने प्रेरीत होऊन हा सिनेमा पहायला जाणार असाल तर तुमची मर्जी........
बाकी सोनालीताईंविषयी आम्ही पामराने काय बोलावे, छानदिसल्यात त्याहीपेक्षा छान अभिनय केलाय, फक्त सिनेमातील एका प्रसंगात शॅंपेन पिऊन ताईंनी केलेला अभिनय फारसा रुचला नाही.
यातील मला एक गाणे खूप आवडले (माझ्या अनुदिनीत ऎकू शकालwww.kelkaramol.blogspot.in)
कुणी पाहिला पाहिला पाहिला हो माझा
देव कुणी पाहिला
सावळी, विठाई, कान्हाई, कृष्णाई
काही दिवसानी केधार शिंदे साहेबांनी हे गाणे म्हणले नाही म्हणजे मिळवले
कुणी पाहिला पाहिला पाहिला हो माझा
सिनेमा कुणी पाहिला....
शुभेच्छा

डोक्यावर न पडण्यासाठी
आणि सिनेमाही न पडण्यासाठी

शायरी

राम राम पाव्हनं !

राम राम , राम राम 

लेखणी, " शब्द "  घेऊन ये पाव्हण्यासनी 

नगं ..........

अवं , जोतिषाने  भविष्य सांगायला अन कवी ने कवितेला नग म्हणू नये । 

व्हय पण आम्ही  फक्त चारोळीच घेतो 

अन आम्ही काय 'शायरी ' वगैरे  घेतो होय , आम्ही  बी आमच्या आबा आज्जा पासनं   चारोळीच घेतो  …। 

असं म्हणता व्हय,  मग होऊन जाऊ द्या 

-----------------------------------------------

चार ओळी म्हणाल्या येता येता 

तू ही कर एका छान शायरी 

( शब्द म्हणाले मुळीच नको …. )

वेडा होऊन  जाण्या पेक्षा 

बरी आहे त्याची आहे ती पायरी …… 

तरीही म्हणाल्या चार ओळी 

भाषांतर कर शायरींचे 

गगनाला भिडणार आहेत  भाव 

यावेळी हापूस - पायरीचे 

( नि:शब्द )  अमोल 

गुढीपाडवा २१ ला आहे, २२ ला नाही

अरे या गुगल बाबाला  सांगा रे कुणी तरी , गुढीपाडवा  २१ ला आहे, २२ ला नाही 

स्वच्छ दिल्ली

कालच्या  लाटेपेक्षा 

मोठी आली त्सुनामी 

विरोधकांना बोलायला 

मिळाली संधी नामी 

' झाडू 'न केले अभियान 

स्वच्छ  केली  दिल्ली 

संधी मिळाली सर्वांना 

आयती उडवण्या खिल्ली 

आपला  आम आदमी 

अमोल केळकर 

१०/०२/२०१५

आम आदमी पार्टी

सुकलेल्या कमळांना 

झाडूने केले साफ 

दिल्लीमध्ये जिंकून 

आले आहे आप 

अमोल केळकर 

१०/२/१५

मंगळयान आणि पृथ्वी

मंगळयान आणि पृथ्वी मध्ये 

आला आहे रवी 

चार ओळींना घेऊन लगेच 

सरसावला हा कवी 

स्वयंभू झाले मंगळयान 

हाती आला कंट्रोल 

नशीब अजून अवकाशात 

भरावा लागत नाही टोल 

(कवी) अमोल केळकर 

८/१/२०१५

टोल मुक्ती

विसरून गेले सगळे 

करायची टोल  मुक्ती 

निवडणूक जिंकण्यापुरती

होती ती एक युक्ती 

अमोल केळकर 

६/१/२०१५

व्हा पुढं … २०१५ साठी

२०१४ च्या उत्तरार्धात  एक महत्वाची गोष्ट माझ्या लक्षात आली ती म्हणजे कुठल्याही फालतू  चारोळी कवितेला  वारेमाप  प्रसिध्दी  मिळवून  द्यायची असेल  असेल तर त्या कवितेच्या/ चारोळीच्या खाली   फक्त लिहायचे 

 कवी: " तुम्हाला माहीतच आहे ", " सांगायला हवे का? " , "आपले नेहमीचेच" इ. इ. 

बस ! ती कविता/ चारोळी अशी प्रसिध्द पावते की विचारायची सोय नाही 

कुणी तरी म्हणले आहे ना , नावात काय आहे ?

 (  हे कोण म्हणले , आठवले का…. ? असे कृपया विचारू नये )

तर असो  मला काय म्हणायचे आहे  की ….  मला काय म्हणायचे आहे  की ….

कवीचे नाव नसेल तर कविता,   करू नका सादर 

कवीचे नाव नसेलतर कविता,   करू नका सादर 

पुढील इलेक्शनसाठी माझा 

मतदार संघ असेल ' दादर '

********************************************

कवी: आठवले का ?  आठवले, आठवले ,  नक्कीच आठवले…. 

काही क्षणात ही कविता ग्रुपच्या ग्रुप वर फिरायला लागेल. बिन नावाने का होईना झालात ना प्रसिध्द , नावात काय आहे ? 

आणखी एक गोष्ट आमच्या लक्षात आली आहे , ते म्हणजे 

फेसबुकवर विचारत नाही कुत्र

फेसबुकवर विचारत नाही कुत्र

आणि आजकाल Whatsapp नेच 

हाती घेतली आहेत सुत्रं …. 

कवी: परत तेच नेहमीचे यशस्वी …. 

***********************************************

तळ टिप :

३१ डिसेंबर साठी सर्व कार्यकर्त्यांना विशेष सुचना:

आजच्या दिवशी चंद्राचे !

नक्षत्र आहे भरणी !

दारू पिऊन घशाची! 

करू नका बरणी !

कवी: सांगायला हवे का?

अशारितीने मी सर्व कार्यकर्त्यांना सांगू इच्छितो की   हा फेसबुकवरचा माझा शेवटचा धागा … 

तुमचा राम राम घेतो ! २०१५ साठी व्हा पुढं - 

विशेष सूचना  : फक्त आलिया साठी ( इतरांनी वाचण्यास हरकत नाही )

. 

. 

. 

. 

. 

. 

. 

. 

शेवटचा धागा म्हणून मला फोन बिन करू नकोस. शेवटचा म्हणजे शे - व्होटचा ( १०० लाईकाचा ) असा त्याचा सुप्त अर्थ आहे. पुढील वर्षी मराठीची शिकवणी लावायची असेल तर अवश्य संपर्क कर. 

तुझा मित्र बंधू 

क. वी . आठवले 

३१ डिसेंबर - पार्टी

३१ डिसेंबरच्या पार्टीसाठी 

तुकोबा लागलेत  आठवायला 

काय धाड भरली होती का 

वर्षभर पैसे साठवायला … 

पुढल्या वर्षीच्या तयारीला 

आत्ता पासून लागा 

अन ग्रुप एडमीन  सांगेल  

अगदी तसेच वागा 

व्हा पुढं  !!!!

( तुमचा ) ग्रुप एडमीन 

२४/१२/२०१४

नवीन वर्षाचे संकल्प

नवीन वर्षाचे संकल्प

शाकाहारी ओनर्स असोसिएशन

स्वप्नातले घर बघताना  

नको कुणाच्या आहारी … 

फक्त एकच लक्षात ठेवा 

तुम्ही पाहिजे  शाकाहारी…. 

मांसाहारी असाल तर 

बिल्डर दाखवतो लाल झंडी….

असाने कशी बनणार 

घरी आमच्या चिकन हंडी … 

अमोल केळकर 

२८/११/१४

हातच्या रेषा

एकवार भिंगामधूनी बघ माझा हात,

शेवटची आशा माझी तुझ्या भविष्यात 

९० मिनीटाचा उपवास …

ए , " एलिझाबेथ म्हणजे काय रे ?"

ते एका राणीचे नाव आहे !

हो, पण अर्थ काय ?

एलिझाबेथ म्हणजे, टिकाऊ !

टिकाऊ ?

हो , ती खूप वर्ष टिकली ना !!

" दगड ! दगड ! दगड ! दगड ! "

एलिझाबेथ एकादशी या सिनेमातील हा संवाद. अशा अनेक संवादाने, लहान मुलांसहित सर्वांच्या उत्तम अभिनयाने नटलेला, सरळ,सोपा कौटुंबिक सिनेमा " एलिझाबेथ एकादशी" !

एकादशी म्हणले की आठवतात ते वर्षातल्या दोन महत्वाच्या एकादशा . अर्थात पंढरपुरचा विठूराया आणि एकादशीचे अतूट नाते. वर्षातील दोन महत्वाच्या एकादशीपैकी कार्तिकी एकादशीच्या पार्श्वभूमीवर या सिनेमाचे कथानक गुंफले आहे

सिनिमाच्या सुरवातीची काही मिनिटे " श्रीहरीच्या " सकाळच्या पूजेच्या दृश्याने होते . यावेळेचे पंढरीच्या राजाचे जे दर्शन चित्रीत केले आहे ते केवळ अप्रतीम. अभ्यंग स्नान ते आरती फारतर २-४ मिनिटे पण त्या विठूरायाचे जे दर्शन मिळते ते खरोखरच सुरेख. संपुर्ण सिनेमाचे चित्रीकरण, विषय पंढरपूरशी संबंधीत असूनही हा देवळातील विठोबा सिनेमात दिसतो तो फक्त सुरवातीला. त्यानंतर अगदी शेवटी नेहमीप्रमाणे सिनेमाचा शेवट गोड होतो(चमत्कार होऊन)तो होण्यासाठी दिग्दर्शक परत या विठोबाकडे येत नाही ही मोठी जमेची बाजू . नाहीतर विठूरायाला साकडे घालून, मोठे मोठे संवाद म्हणून चित्रपटाची लांबी १० - १५ मिनिटाने तरी लांबवता येणे सहज शक्य होते . असो

एका गरीब कुटुंबातील आई, आजी, छोटा मुलगा ( ज्ञाना ) त्याची बहिण ( झेंडू उर्फ मुक्ता ) यांचे हे कथानक . घरातल्या घरात मशीनवर कपडे विणून चरितार्थ चालवणारी आई , तिचे हे मशीन कर्जाची परतफेड न केल्याने जप्त होते. पैसे भरण्याची अंतीम तारिख दिल्यानंतर , आणि किती पैसे भरल्यावर हे मशीन परत मिळेल हे सांगितल्यावर संपुर्ण कुटूंब कसा प्रयत्न करते याचे हे कथानक ..

ज्ञाना, झेंडू , गण्या आणी इतर मित्र यांचा सहजसुंदर अभिनय, प्रासंगिक विनोद , उत्तम संवादलेखन हा या सिनेमाचा आत्मा

हा सिनेमा मला एका दृष्टीने वेगळा वाटला ते म्हणजे श्रध्दा आणि शास्त्र यांचा घातलेला योग्य मेळ. पांडूरंगा बरोबरच संत न्यूटन यांचे विचार ही इथे दिले गेले आहेत. सिनेमात अवास्तावी धार्मिकता , अंधश्रध्दा दाखवणे सहज शक्य होते पण ते टाळण्यात यश आले आहे आणि ही मोठी जमेची बाजू . प्रामाणिक प्रयत्न,विश्वास आणि कृती तुम्हाला अपेक्षित यश देते हे इथे मुलाना समजून देण्यात हा चित्रपट यशस्वी झाला आहे

" एलिझाबेथ एकादशी " च्या संपूर्ण टीम चे त्यासाठी अभिनंदन
मराठी सिनेमाला संजीवनी देण्यासाठी हा सिनेमा पहिला ' श्वास ' ठरो या शुभेच्छा …

आजकाल सिनेमा संपल्यानंतर एक ( प्रसिध्द ) गाणे दाखवणे ही हिंदी सिनेमाची पध्दत याही सिनेमात आहे . तेंव्हा पिक्चर संपला रे संपला की लगेच जाऊ नका. ज्ञाना , गण्या आणि झेंडु ने या गाण्यातही धमाल केली आहे ती बघूनच जावा ।

हा ९० मिनीटाचा एकादशीचा उपवास तुम्हाला नक्कीच २१ एकादशीचे पुण्य देईल ही आशा

आता परीक्षण म्हणले की १० पैकी या सिनेमाला किती गुण द्याल ? असा प्रश्ण आला
मी तरी १० पैकी ८ गुण देईन
२ मार्क का काटले? माहित नाही पण मराठीत पैकीच्या पैकी गुण मिळत नाहीत ना भौ …।

परीक्षक ) अमोल केळकर
सी ५, ३३, ०:२, सेक्टर ५
सीबीडी बेलापूर , नवी मुंबई
९८१९८३०७७०
a.kelkar9@gmail.com

स्वच्छता अभियान

स्वच्छता  अभियानाला , आले नेते 

फटाक्याने करू स्वागत ...

तोच कचरा साफ करायला 

मग वेळ नाही लागत ...

अमोल केळकर

12/11/14 

शिक्षण

कुणी शिका मराठी , कुणी शिका उर्दू 

मात्र जो घेईल शिक्षण 

त्यालाच आम्ही वंदू 

अमोल केळकर 

११/११/१४

तळ्यात - मळ्यात

खूप झालं आता 

तळ्यात - मळ्यात 

घाला लवकर हात 

एकमेकांच्या गळ्यात 

स्वाभिमाना बरोबरच 

सत्ताही आहे महत्वाची 

अशी नामी संधी 

परत नाही यायची 

अमोल केळकर

 १०/११/१४

विरोधक

वाटलं तर सरळ सांगतो 

विरोधात बसा जाऊन 

बहुमत कसे मिळेल ते 

आम्ही घेऊ ना  पाहून 

अमोल केळकर 

८/११/१४

ओळखलत का साहेब मला?’

ओळखलत का साहेब  मला?’ परत  आला कोणी,
कपडे होते फाटलेले पण , मधाळ त्याची वाणी 

क्षणभर बसला नंतर हसला बोलला वरती पाहून,
‘पक्षामध्ये फुट पडली, आलो तिकडे  राहुन’.

कार्यकर्त्यांसह आम्हाला,  चार आश्वासने भेटली,
स्वबळावर सत्ता येता,  आमची वाट लावली .

पक्ष सोडला ,चूक झाली  , होते नव्हते ते गेले,

निवडणूक होईपर्यंत त्यांनी फक्त, राबवून घेतले 

कार्यकर्त्यांना  घेउन संगे ,  साहेब  आता लढतो आहे
राहिलेली कामे पुर्ण करून , मतदारसंघ घडवत आहे

खिशाकडे हात जाताच हसत हसत उठला
‘पद  नको साहेब ’, जरा एकटेपणा वाटला.

आलेल्या   लाटेत खुर्ची गेली  तरी मोडला नाही कणा,
पक्षात परत घेउन तुम्ही,  फक्‍त लढ म्हणा

(लढाऊ ) अमोल केळकर 

६/११/१४

Happy New Year

त्याचा तो सिनेमा ना 

खूपच आहे सुमार !

कारण त्यात नाही 

माझा लाडला कुमार !!

अमोल केळकर 

६/११/१४