रेकी

काल सांताक्रुझला शाळेची एक बस काही तासांसाठी हरवली. ती सापडल्यावर एक उल्लेख केला गेला की गाडी चालक नवीन होता आणि त्याने मार्गाची 'रेकी' केली नव्हती म्हणून तो गोंधळला आणि नियोजित ठिकाणांवर पोचायला बराच उशीर झाला

इतके दिवस केवळ गुन्हेगाराने / अतिरेक्यांनी अमुक तमुक ठिकाणांची , इतक्यांदा-तितक्यांदा 'रेकी' केली असे ऐकायला मिळायचे. त्यामुळे तुमच्या आमच्या सारख्या एका सामान्य वाहन चालकाबद्दल वापरलेला हा शब्दप्रयोग एक वेगळाच संदर्भ  देऊन गेला.

मग लक्षात आले की हा प्रकार नकळत ( म्हणजे याला रेकी बिकी असं काही म्हणतात हे माहिती नसताना) आपण अनेक वेळा आचरणात आणलाय. अगदी लहानपणी आपल्याला शाळेत घातल्यानंतर पालकांकडून त्या मार्गाची रेकी केली जाणे ( म्हणजेच घरापासून लागणारा वेळ, बसच्या वेळा,सायकल/ चालत जात असेल तर रहदारी,वस्ती, जवळचा मार्ग इ इ ) ते आपण नवीन ठिकाणी कामावर रूजू होण्यापूर्वी केलेली तिथली रेकी. अशी प्रत्येकाची विविध उदाहरणे असतील. मला आठवतयं लहानपणी नाटकात काम करताना नाटकाच्या तालमी इतरत्र कुठेही होत असल्या तरी मुळ प्रयोग जिथे व्हायचा तिथेच काही दिवस आधी 'फायनल रिहर्सल' व्हायची. एकप्रकारे ही सादर होणाऱ्या प्रयोगाची 'रेकीच' म्हणता येईल.

भारताचा परदेशात सामने खेळायला गेलेला संघ किंवा भारतात आलेले संघ ( क्रिकेट का इतरही? ) मुख्य मालिके आधी काही सराव सामने खेळायचा. हा ही एक 'रेकी' चा प्रकार असावा का?

दहावी/बारावी बोर्ड परीक्षा आधी आमचे हुsष्षार मित्र सराव पेपरांची 'रेकी' करायचे. या भानगडीत आम्ही मात्र फारसे पडलो नाही ☺️

रेकी ची ही मला आठवलेली काही उदाहरणे.

माझ्या मते या सगळ्याचा प्रमुख उद्देश प्रत्यक्ष तशी परिस्थिती येईल तेंव्हा आपल्याला त्या परिस्थितीशी जुळवून घेण्याचा   विश्वास ( काँन्फीडन्स) यावा, फिल गूड वाटावे,  आणि सहजतेने अतिरिक्त ताण वगैरे न घेता परिस्थिती स्वीकारणे वगैरे वगैरे असावा

अशी प्रत्यक्ष जागेवरून जाऊन 'रेकी' करण्यात ज्यांची इतिहासाने नोंद करून ठेवली असे उदाहरण म्हणजे छत्रपतींचे विश्वासू 'बहिर्जी नाईक'

त्यांचा उल्लेख केल्याशिवाय हा लेख पूर्ण होऊ शकत नाही.

प्रत्यक्ष उपस्थिती ( physical ) बरोबरच आपल्या कडे  'मन' या अत्यंत उपयुक्त  आयुधाचा  रेकी करण्यासाठी कसा विविध प्रकारे ( Meditation, Dream,Motivation, visualization इ इ प्रकारे)  उपयोग होऊ शकतो याबद्दल विस्तृत माहिती अनेकांना आहेच. 

तुर्त इतकेच

अमोल 📝

विनायकी चतुर्थी ( अंकातील योग)

५/४/२२

( अवांतर : आपल्या समुहात लिहिलेले लेखन हे माझ्या 'लेखी' आपलं माझ्यासाठी 'रेकी' चाच प्रकार म्हणा ना !.. 😷)

कचरा फाईली

 कचरा फाईली

मंडळी, अगदी काही दिवसापूर्वी आमच्या कार्यालयाच्या नुतनीकरणासाठी म्हणून काही कालावधीसाठी आम्हाला दुसरीकडे बसायला सांगितले. आजकाल बरीच कामे संगणकावर जरी होत असली तरी त्याच्या कित्येक आधीपासूनच्या अनेक फाइली या ठेवलेल्या होत्या. शिफ्टींग होताना एवढ्या प्रचंड प्रमाणात असणाऱ्या फाईलींचे काय करायचे हा मोठ्ठा प्रश्ण होता. ज्या अतिशय आवश्यक फाईली आहेत त्या घेऊन नवीन जागी जायचे, ज्या फाईली कदाचित पुढच्या काळात संदर्भासाठी लागतील त्यांना कार्यालयीन वास्तूचे नूतनीकरण होईपर्यंत 'काँमन स्टोरेज' मधे ठेवायचे असा निर्णय झाला. हे सोडून उरलेल्या जवळजवळ ८०% फाईली या तिथेच सोडण्याशिवाय गत्यंतर नव्हते. थोडक्यात त्या सगळ्या फाईली कचरा ठरवल्या जाऊन आता रद्दीच्या भावात जाणार हे पक्के झाले होते.

नुतनीकरणानंतर जेंव्हा आम्ही मुळ जागी परत येऊ तेंव्हा येताना ज्या अती आवश्यक / दैनंदिन लागणाऱ्या फाईली ज्या सोबत घेऊन गेलेलो त्या परत आणू.  पण इथे संदर्भासाठी लागतील म्हणून काँमन स्टोरेज मधे ठेवलेल्या किती फाईलीं वरची धुळ परत झटकली जाईल याबाबत मला तरी शंका वाटतीय. कारण जेंव्हा सगळं सुस्थितीत होतं तेंव्हाही फारशा त्या फाईलींना कुणी हात लावला नव्हता. 

घर आवरताना हा नेहमीचा अनुभव.  आज आवश्यक म्हणून ठेवलेली वस्तू पुढल्यावेळी घर आवरताना मात्र हमखास कच-यात जाते. पण पहिल्यांदाच त्या कच-यात घालायला मन तयार होत नाही 

वरती जो संगणकाचा उल्लेख केला त्यातील कच-या कडे ही आपले फारसे लक्ष जात नाही. नकळत पणे अगणित फाईल्स तयार होत असतात. अनेक फोल्डर+ फाईल्स आपण तयार करत असतो. यातील असंख्य फोल्डर्स/ फाईल्स , इमेल्स काम झाल्यावर सहज उडवले जाऊ शकतात आणि अनावश्यक कच-याची विल्हेवाट लावली जाऊ शकते. पण जेंव्हा हार्ड डिस्क भरून डेटा वहायला लागतो, नवीन इमेल येणे बंद व्हायला लागतात तेंव्हा जाग येते.

आजकाल हीच गोष्ट 'मोबाईल 'उपकरणा बाबतीतही  आढळते

थोडक्यात वेळोवेळी कचरा साफ होणे आवश्यक. वर उल्लेख केलेल्या ठिकाणचा तर आवश्यकच पण अशी एक जागा आहे प्रत्येकाची वय्यक्तिक, जिथे अशा नको असलेल्या भरमसाठ फाईली अगदी कळायला लागल्यापासून विनाकारण पडून आहेत, ती जागा म्हणजे आपला 'मेंदू'.

तिथेही एकदा साफ-सफाई करायची का?

निसर्ग सुद्धा स्वतःत बदल दरवर्षी करतो. तो निसर्गचक्राला अनुसरून असला तरी आपल्याला दरवेळेला वेगळी अनुभूती देऊन जातो. झाडांची पानगळी होऊन नवनिर्मिती होत असताना आपण आपल्या मनाला हीच गोष्ट सांगितली तर? 

जुने जाऊ द्या मरणालागुनी

जाळुनी किंवा पुरुनी टाका

सडत न एक्या ठायी ठाका

सावध!ऐका पुढल्या हाका

खांद्यास चला खांदा भिडवूनी

विक्रम संवत २०७८-२९७९ 🚩

शालिवाहन शक १९४४ 🚩

शुभकृत् नाम संवत्सर 🚩

तसेच गुढीपाडव्याच्या शुभेच्छा 💐💐

अमोल 📝

poetrymazi.blogspot.com

मानाच पान

 मानाचं पान 

जागतिक अमुक तमुक दिवसाच्या शृंखलेतील आजचा दिवस मानाचा आपलं पानाचा

होय ! आज ( २८ मार्च)' जागतिक पान दिवस'

खरं म्हणजे पाश्चिमात्य पद्धतीने खाण्याची पध्दत अवलंबून आपल्याला अनेक दशकं उलटली. अनेक समारंभ, पार्ट्या,कार्यक्रमातील जेवणातील खायचा क्रम म्हणजे स्टार्टर- मेन कोर्स - डेझर्ट . हे सोपस्कार झाल्यानंतर मात्र खरा खवय्यी मित्र ( बिल वगैरे देण्याच्या भानगडीत न पडता)  कुणाकुणाला कसले पान हवे हे विचारून बाहेर पानपट्टी गाठतो आणि रंगलेल्या खाद्य मैफिलीचा शेवट टिपिकल देशी पद्धतीने होतो ( परदेशात अशा पद्धतीने शेवट होतो की नाही याची कल्पना नाही )

'खाईके पान बनारस वाला' किंवा 'पान खाये सय्या हमारो' अशा हिंदी गाण्यातून भेटणारे पान, मराठी गाण्यात एकदम आठवणीत येत नाही.  अर्थात ' मेंदीच्या पानावर' हा संदर्भ इथे उचित नाही. 

राजा बढे यांनी लिहिलेली, श्रीनिवास खळे यांनी संगीतबध्द केलेली आणि सुलोचना चव्हाण यांनी गायलेली

 ' कळीदार कपूरी पान ' ही एक लावणी यानिमित्त्याने देत आहे

कळीदार कपूरी पान कोवळं छान केशरी चुना

रंगला काथ केवडा, वर्खाचा विडा घ्या हो मनरमणा

बारीक सुपारी निमचिकनी घालून

जायपत्री वेलची लवंग वरी दाबून

बांधले तसे या कुडीत पंचप्राण

घ्या रंगत करि मर्दुनी, चतुर्दशगुणी, सख्या सजणा

कमरेचा झुलता झोक नूर बिनधोक उरी मावेना

काजळी नजर छिनमिनी चांदणी रैना

छेडिता लालडी मुलाम तुमची गुलाम झाले सजणा

पायी पैंजण छ्न्नक छैना

अरे आजचे काय 'डिस्पॅच स्टेटस' ? २८ मार्च तारीख आहे माहित आहे ना? आजचा दिवस धरून फक्त ४ दिवस वर्ष संपायला.  का यंदा पण नेहमीसारख माझ्या *तोंडाला पाने पुसण्याचा* विचार आहे तुमचा?....

मंडळी इथंच थांबतो...

. ४ दिवस हेच वेगवेगळ्या शब्दात सायबाचे हे बोल ऐकायची तयारी करायचीय.

कामे पडली अनंत, वेळ मात्र मर्यादित

( पाने पुसली अनंत....           )

अमोल

२८ मार्च २२

घर दोघांचे, घरकुल आमदारांचे

 "चोराच्या मनात चांदणं" या चित्रपटासाठी श्री सुधीर मोघे यांनी लिहिलेले एक गाणे, आजच्या घटनेला कसे मस्त लागू पडतय बघा. (फक्त काही शब्द बदललेत)

विश्वास ठेवीला मी, विश्वास तू दिलास

जपलेस तू मला अन मीही तुझ्या मनास

एका क्षणात आपुल्या सुख साधले युगाचे

*घर दोघांचे, घरकुल आमदारांचे*🏠

वाटा कशा निराळ्या जणू एकरूप झाल्या

एका खुळ्या जगात त्याही खुळावलेल्या

जुळते अतूट नाते सत्ता- विरोधकांचे

*घर दोघांचे, घरकुल आमदारांचे*🏠

कधी भांडलोही थोडे ,थोडे दुरावलोही 

पण खूण त्या क्षणाची जपली मनात नाही

रुच(ज)ले कधी(च) बील,दोन्ही सभागृहांचे

*घर दोघांचे, घरकुल आमदारांचे*🏠

अमोल 📝

poetrymazi.blogspot.com

८३

 खरं म्हणजे ही घटना प्रत्यक्ष घडली तेंव्हा आम्ही ३ रीत होतो. ( आमच्या बँचचं एक बरंय. शाळेत कितवीत केंव्हा होतो हे लक्षात ठेवायला सोपं आहे. ८३ ला ३ री, ८५ ला ५ वी, ८९ ला ९ वी. सुदैवानं बेसिक पदवी शिक्षण होई  पर्यंत  हा क्रम ठेवण्यात आम्ही यशस्वी ठरलो 😷)

८३ साली म्हणजे आम्ही  ३ री त असताना भारताने क्रिकेटचा विश्व चषक जिंकला . त्यावेळी आम्हाला हे कितपत माहीत होते हे सांगता नाही येणार. अर्थात ही जाणीव व्हायला काही कालावधी जावा लागला.

 माध्यमिक शाळेत असताना मधल्या सुट्टीत साने या आमच्या शाळेजवळच राहणाऱ्या  मित्राच्या घरी जाऊन अनेक सामने बघितलेत ( कधी कधी तर पुढचे काही तास बंक करून तिथेच थांबायचो ) . ८३ च्या विश्वविजेत्या संघातील गावसकर,वेंगसरकर,अमरनाथ, वगैरे खेळाडूंची ओळख वाढायला लागली.खेळाची आवड निर्माण झाली. आमच्या शाळेच्या मैदानात मधल्या सुट्टीत तर हक्काने खेळ रंगला. सायकलचे चाक,  एखाद्या भिंतीवर विट घेऊन तीन स्टंप काढून,  किंवा काहीच नाही तर तीन दगडं ( अभासी स्टंप गृहीत धरून)  ठेऊन अनेक विक्रम अनेकांनी रचले. मोठ्या स्टेडिअम वर जाऊन सीझन चेंडू ने वगैरे खेळण्याइतपत मात्र माझी लेवल गेली नाही.

अर्थात पहिला क्रिकेट विश्वचषक भारताने जिंकला त्यावरचा " ८३" हा सिनेमा बघायची इच्छा होती. ती आज पूर्ण होणार आहे.

अवांतर :-

अगदी मनापासून सांगायचं तर हिंदी सिनेमा थेटरात जाऊन बघायला मला फारसं आवडत नाही. टिव्ही वर असंख्य जहिरातीच्या भडिमारात अधून मधून सिनेमा बघायाला मिळाला तरी मला हे जास्त सोईचे वाटते ( खिशाला न लागणारी कात्री हे खरे कारण) आणि आजकाल काही महिन्यातच असे सिनेमे टीव्हीवर लागतात 

टीव्हीवर लागल्यावर बघू की

या विचारसरणीचा आणखी एक विजय होणार आज  ✌🏻

#८३_🏏

अमोल 📝

२०/३/२२

रंगोत्सव

 रंगोत्सव - आठवणीतील गाणी 🌈🎨

आज सोसायटीत रंग खेळते राधी

गोपाळा, जरा जपून जा तुझ्या घरी

किंवा 

कृष्णे , उडवू नको रंग थांब, थांब ,थांब

अगदी बरोबर वाचताय. असे प्रसंग आजच्या काळात धुळवड/ रंगपंचमीला गावोगावी दिसून येतायत समस्त गोपाळां समवेत समस्त राधीका रंगांचा उत्सव साजरा करण्यात बरोबरीने पुढे आहेत. 

निसर्ग तर सर्वच ऋतूत कायमच 'रंगोत्सवात' दंग असतो. यातला खरा जादुगार  'आकाश'. 'नभाला बरोबर घेऊन वेगवेगळे प्रयोग नित्य चालू असतात.

बदलती नभाचे 'रंग' कसे?

क्षणात निळसर,क्षणात लालस,क्षण सोनेरी दिसे !

अशा बदलत्या नभाखालती

वसते अवनी सदा बदलती

कळी कालची आज टपोरे फूल होऊनिया हसे!

बदलती नभाचे 'रंग' कसे?

रोज सूर्योदयाला ;-

नवकिरणांचे दूत निघाले पूर्व दिशेहून नाचत नाचत

नवीन गाणी ओठावरती किलबिलते पक्षांची पंगत

सोनेरी स्वप्नांची झालर पहाटवा-यावरती विहरत

नवीन चेतना भरुन घ्यावी ज्याने त्याने हृदयागारी

उल्हासाचे 'रंग' भरले नभांतरी दशदिशांतरी

तर मंडळी तब्बल २ वर्षाच्या खंडानंतर आज हा रंगोत्सव * साजरा करायला मिळतोय. तेंव्हा

घुमवा लेझीम ढोल नगारा

आज नाचवू गावच सारा

सनई - पावा घुमवा सूर

संगीताला आणा पूर

टाळ्या झडवा द्या ठेका

रंग फेका रंग रे, रंग फेका 🎨

आणि मग

  "अवघा रंग एक " होऊ दे

आणि रंगी रंगू दे  श्रीरंग ( श्रीवल्ली)

शेवटी प्रत्येक सण ( क्षण) आपल्याला काय सांगतो  

नाही भेदाचे ते काम

पळोनी गेले क्रोध काम!

अवघा रंग एक झाला 

रंगोत्सवाच्या सर्वांना शुभेच्छा 🙏💐☺️

अमोल

poetrymazi.blogspot.com

धुळवड/ रंगपंचमी * २०२२ 📝

महिला दिन. कृत्तिका नक्षत्र

 फुलांचा सुंदर गुच्छ, कर्रेबाज पण कर्तृत्ववान

                     " कृत्तिका " 💐

            ( महिला दिन विशेष) 

आज ८ मार्च २०२२. आज कृत्तिका नक्षत्र आहे.  श्री प्र सु आंबेकर यांनी त्यांच्या 'नक्षत्र ज्योतिष' पुस्तकात कृत्तिका नक्षत्राची माहिती देताना हे वरचे वाक्य लिहिले आहे.

 या नक्षत्राच्या उत्पत्ती बद्दलची कथा ही त्यांनी दिली आहे.

थंडीचे दिवस,उत्तर ध्रुवाजवळील काळोख्या रात्रीचा प्रदेश. सप्तऋषी आपल्या प्रियपत्नींसह प्रवासास निघाले होते. मुक्कामाला पोहोचण्याची सर्वानाच घाई होती.पण कडाक्याच्या थंडी मुळे पाय मात्र उचलत नव्हते.प्रवास करता करता मंडळी 'अग्नी' या प्रखर ता-याजवळ आली. अग्नीची उष्णता गारठलेल्या मंडळीना फारच सुखावह वाटली. जरावेळाने सप्तऋषी इच्छित स्थळी जाण्यास निघाले पण वसिष्ठांची पत्नी 'अरुंधती' फक्त त्यांच्याबरोबर निघाली. इतर सहा ऋषीपत्नी मात्र अग्नीजवळच शेकत बसल्या. अग्नी पासून मिळणारी उब त्यांना सोडवेना.

या मागे राहिलेल्या ऋषीपत्नी म्हणजेच "कृत्तिका" होत.

कृत्तिका नक्षत्रावर जन्म असणाऱ्या स्त्रियांचे वर्णन पुढे असं केलंय: - स्वभाव मानी, रागीट,करारी जरा गर्विष्ठ असतो. कृत्तिकेचे सौंदर्य हे लवंगी मिरचीप्रमाणे तिखट सौंदर्य आहे.बोलणे फटकळ असते.तरीही या स्त्रीया महत्वाकांक्षी, पराक्रमी व कर्तृत्ववान असतात. 

आज आंतरराष्ट्रीय महिला दिन साजरा करताना अनेक महिल्यांच्या कर्तृत्वाच्या गोष्टी ऐकताना/ वाचताना असे वाटते की यांच्या पत्रिकेत एखादा ग्रह नक्कीच कृत्तिका नक्षत्रात असेल.  

शिल्पा शेट्टी,वैजयंतीमाला, विजयालक्ष्मी पंडीत,नलिनी जयवंत या काही प्रसिद्ध स्त्रियांचे जन्म नक्षत्र ' कृत्तिका ' हे आहे

आता थोडं वरच्या ऋषींच्या कथेकडे .  नव-याच्या आज्ञेत राहणारी ऋषीपत्नी आणि नव-याला बोलू न शकणारी  'आई कुठे काय करते ' मधील पण स्त्री ' अरुंधतीच? नावातील असा ही एक योगायोग 😬

 तर, सध्याच्या जीवनशैलीला अनुसरून 'कृत्तिकेचा' एखादा गुण तुमच्याकडे असू दे, याच समस्त स्त्री वर्गास आजच्या आंतरराष्ट्रीय महिला दिनानिमित्य शुभेच्छा 💐

अमोल केळकर 📝

poetrymazi.blogspot.com

०८/०३/२२

प्रासंगिक

 प्रासंगिक 📝

'झुंड' असो वा 'झोंबी'(वली)

एकाच नाण्याच्या बाजू दोन

बुध्दी दिलीय ना देवाने

मग स्वतंत्र विचार करणार कोण?

दोन्ही गोष्टी मिळून जेंव्हा

जाती/पातीला मिळतो सहारा

आपणच आपल्यावर मग

द्यायचा असतो पहारा

#

झुंडीत_पाहू_झोंबीत_राहू_करीत_जाऊ_द्वेष_साजरा

फाल्गुन शु तृतीया

५/३/२२

रात्रं दिन आम्हा

 अनेक वर्षे मार्केटिंग मधे काम करणाऱ्या आम्हाला ही परिस्थिती नवीन नाही

'कस्टमर' ( रशिया ) - timely shipments,  shipment quantity, गुणवत्ता,  ,पेमेंट क्रेडीट, ट्रान्सपोर्टर इ इ मिसाईल्स 🚀

मॅनेजमेंट ( NATO) - घ्या रे आँर्डर आम्ही आहोत. करु व्यवस्थित सगळं,   

सेल्स मॅन ( युक्रेन)  - नाही साहेब बघताय ना परिस्थिती,  लाॅकडाऊन,  सुट्या,  पेट्रोल-डिझेलचे वाढलेले भाव, युध्द, पुढल्यावेळेला आधीच देतो साहेब, बस का साहेब !आत्तापर्यंत असं झालं का? , लागून सुट्ट्या आल्या ना, सर्व्हर डाऊन होता ना, दोन दिवस SAP प्राँब्लेम होता, अहो शनिवारीच मी डिओ ( DO) देऊन ठेवलेला तुमच्या माणसानं घेतला नाही तर आम्ही काय करणार ?, थोडं तरी पेमेंट करा ना मग मॅनेजमेंट ला सांगता येईल,  नक्की साहेब, होय साहेब, राॅ मटेरियल किती वाढलय बघताय ना? आम्ही मार्जीन काहीच ठेवले नाही आहे यावेळेला सर,  ट्रान्सपोर्ट चा स्ट्राईक नव्हता का? डाॅलर चा रेट बघा की साहेब, तुम्ही काळजी करु नका आम्ही तुमच्या सोबत आहोत, तुम्हीच तर आमचे टाॅप कस्टमर आहात की

साहेब, मार्च महिना आलाय शेवटचा महिना, नवीन 'परचेस आँर्डर ' ( PO) उद्या पर्यंत पाठवाल ना? मी प्रोसेस चालू करतोय, याच महिन्यात शिप करतो.

टार्गेटच्या जरा जवळ तरी जाऊ 

काय पण होऊ दे 'झुकेगा नही' अँडीट्युड असणाऱ्या आणि ' इयर एन्ड टार्गेट' साठी रात्रंदिन आम्हा युद्धाचा प्रसंग या परिस्थितीतून जाणाऱ्या सर्व लेवल वरच्या सेल्समॅन/ सेल्स गर्ल्सना समर्पित  👩🏼‍💼👨🏻‍💼🙏💐

( साधा विक्रेता )  अमोल 📝🏃🏻‍♂️

poetrymazi.blogspot.com

पोळीचा मामला

 पोळी- पुराण 📝 ( प्रासंगिक *- मनोरंजन) 🫓

( मुळ गाणे:- चोरीचा मामला, मामा ही थांबला) 

पोळीचा मामला,मामु ही थांबला

प्रेमानं घास खाती

होय त्यांची मैना, उडवते दैना

या ' किचन कट्ट्यावरती' 

डाळ सारी घेतली, वाटूनही काढली

तुम्ही माझ्या 'कटाचे ' साथी

थोडा वेळ बसा, तोंड बंद ठेवा 

या पस्तीस पोळ्यां साठी 

( ये ना मामी, तू गा ना ... )

तूप अशी तू, ठेवू नको

पोळी अरधी घालू नको

पोट उपाशी, भूक लागली

कसला हा सुटलाय वारा 🤧

जास्त जिवाला खाऊ नको

ध्यास असा हा घेऊ नको

गडी व-हाडी उभा टाके हा

खर्ड्याचा लागे ठसका

( ये ना मामी, तू गा ना ... )

पोळीचा मामला,मामु ही थांबला

प्रेमानं घास खाती

होय त्यांची मैना, उडवते दैना

या ' किचन कट्ट्यावरती' 

१८/०२/२२

poetrymazi.blogspot.com

झुकेगा नही.. साला

 ' झुकेगा नही  .. साला ...... ' 🙅‍♂️

' दुनीया झुकती  है , झुकानेवाला चाहिये' या डायलॉग ला काउंटर  अँटेक  केलेला एक  डायलॉग सध्या सगळीकडे धुमाकूळ घालत आहे तो  म्हणजे  ' झुकेगा नही  .. साला '. हे वाक्य  माणसाचा अँटिट्यूड दर्शवतो.  राशी स्वभावानुसार सिंह रास किंवा लग्नी रवी, मंगळ  असणा-या व्यक्ती सर्वसाधारणपणे  अशा स्वभावाच्या असण्याची शक्यता जास्त असते. 

सर्वपक्षीय भ्रष्ट राजकारणी नेते, कार्यकर्ते किंवा गुंड  लोकांनी हे वाक्य उचलून धरले नसते तर नवल पण तुमच्या आमच्या मध्ये ही असा attitude  दाखवणारे सहज भेटतील. सध्या अशी कॉमन जागा म्हणजे कुठलाही ' काय अप्पा ' समूह . इकडच्या तिकडच्या ढकली मेसेज वरून, ऐकीव माहिती, चार न्यूज चॅनेलवरून घेतलेल्या माहितीवर कुठलाही अभ्यास न करता  एकाद्या मुद्यावर व्यक्त होताना  त्यांचा आवेश

 ' झुकेगा नाही ... साला ' असाच असतो . मला वाटत अशा लोकांना खालील  काही गाणी 👇🏻अशी ऐकू आली असणार

' झुकाना  भी नाही आता , 

झुक जाना नाही तू काही हार के , 

झुक झुक के न देख झुक झुक के 

गब्बरसिंह ये कहके गया , जो झुक गया, वो मर गया 

'मुलाचे पाय पाळण्यात दिसतात'  त्याप्रमाणे अशा व्यक्ती तुम्ही शाळेत वर्गात असतानाच ओळखल्या पाहिजे होत्या. एक तास संपून  दुसरे  शिक्षक येईपर्यतच्या कालावधीत साधारण सर्वच  दंगा करतात पण नवीन सर येऊन  पुढचा वर्ग सुरु झाल्यावरही  दंगा सुरु ठेवणारे  आणि  सरांनी वर्गाबाहेर कोंबडा करून उभे केल्यावरही मनातल्या मनात  ' झुकेगा नाही साला ...  अशी समजूत करुन घेणारे ते हेच 😷

 या शब्दाचा भावार्थ ' नमतं न घेणे ' असा बरोबर वाटतो. पण कितीही झुकेगा नाही असा attitude  असणारे  लहानपणी  लपंडाव वगैरे खेळताना झुकून कुठे कुठे लपलेत, त्यांची  मुलं -बाळं  लहान असताना  स्वत: झुकून घोडा झालेत आणि अजूनही  बायकोसमोर ... राहू दे  जास्त व्यय्यक्तिक   नको. ☺️

पण हा शब्द प्रयोग प्रत्यक्षात आचरणात आणलेल्या   आणि परकीय आक्रमणापुढे खंबीर उभे राहणा-या राजे, महाराजे, स्वातंत्र्यसैनिक आणि त्याचा वारसा पुढे चालवणारे आपले शूर जवान यांच्यामुळे आज आपले जीवन सुसह्य आहे यात शंका नाही 🙏

बरं , मी काय म्हणतो, ' झुकेगा  नही .. ' वाल्यांनी एकदा नमतं घेऊन बघायला काय हरकत आहे ???

अहो तो  फ्रान्स मधला तो टॉवर  पण झुकलाय, तुम्हाला काय झालं ओ  न झुकायला ??? 🤷‍♂️

निसर्ग ही वेळोवेळी झुकतो जसे 

" वो झुक गया आसमान भी '   तेव्हा  कुठं  ' इष्क नया रंग लाया ' 🌈

 कधी कधी #झुकना_अच्छा_है 🙋🏻‍♂️

( लवचिक ) अमोल  🙇🏻‍♂️

माघ पौर्णिमा 

१६/२/२२

टीप : किती पण लिही चुकूनही ( झुकूनही ) लाईक देणार नाही  यावर ठाम असणा-या सर्व प्रिय मित्र मैत्रिणीना सदर लेखन  समर्पित 😝

मिर्च्ची रेडिओ

 दादर पूर्व आणि दादर पश्चिम जोडणारा परळ/ प्रभादेवी बाजूचा पादचारी पूल,  तसेच त्या पूलापासुन कबुतरखाना आणि पूर्वेला पनवेलचा बस स्टाँप एवढा विस्तृत आमचा माॅल होता. इथल्या खरेदीची मजा त्रिखंडात नाही. अँमेझाँन वगैरे हे आत्ताचे लाड. खरेदीसाठी दादरला जाणे किंवा कामासाठी दादर ला गेल्यावर या 'ओपन टू स्काय ' माॅल मधील खरेदी न होणे म्हणजे फाँल समजायचा

तर साधारण १५-२० वर्षापूर्वी जेंव्हा एवढा ' मोबाईल स्मार्ट नव्हता ' किंवा फक्त संपर्कासाठी ज्याचा उपयोग व्हायचा त्याकाळात या आमच्या ओपन माॅल मधे एक मिरची सारखे उपकरण आले होते. आणि अल्पावधीत ते भयंकर लोकप्रिय झाले होते.

त्या मिरची सारख्या उपकरणात दोन तिन बटणे, अँटेना ,कानात घालायला हेडफोन आणि दोन पेन सेल

एकेकाळी मुंबई मार्केट मधे अधिराज्य केलेला हाच तो ' मिर्ची रेडीओ'

सुरवातीला १५० ते २०० रु पर्यत मिळणारा हा रेडिओ नंतर नंतर सर्रास १०० रु मिळाला लागला आणि खास घासाघीस करुन अगदी ८० पर्यत

असा हा रेडिओ खिशाला पेनासारखा अडकवून रस्त्यावर फिरणे ही एक क्रेझ होती

मात्र ही मिरची घालून बस किंवा रेल्वेत बसलं की तिने मान टाकलीच समजायचं

चायनात पिकलेली ही मिरची वाशी खाडी पूल ओलांडे पर्यत जरी टिकली तरी पैसे वसूल असे वाटायचे

आज १३ फेब्रुवारी  , विश्व रेडिओ दिवसा निमित्य या  'तिखट ठरलेल्या मिर्च्ची रेडिओची ' एक आठवण

(📻) अमोल 📝

माघ.शु द्वादशी

१३/२/२२

ग्रहांकीत प्रेम

 

पाडगावकरांची माफी मागून सादर करतोय

 'ग्रहांकीत प्रेम ' 📝❣️

प्रेम म्हणजे प्रेम म्हणजे प्रेम असतं

तुमच्या आमच्या पत्रिकेत अगदी सेम नसतं

काय म्हणता?

या ओळी चिल्लर वाटतात?

काव्याच्या दृष्टीने अगदी थिल्लर वाटतात?

असल्या तर असू दे

फसल्या तर फसु दे

तरीसुद्धा 

प्रेम म्हणजे प्रेम म्हणजे प्रेम असतं

तुमच्या आमच्या पत्रिकेत अगदी सेम नसतं 💕

पंचमातील शुक्राकडून 

प्रेम करता येतं

सप्तमातील 'राहू' कडून

आंतरजातीय होता येतं

घरचा विरोध पत्करून

गुरुजींना धरता येतं

'गुण-मिलन' न करता ही 3️⃣6️⃣

पळून जाता येतं 

म्हणूनच म्हणतो, -

प्रेम म्हणजे प्रेम म्हणजे प्रेम असतं

तुमच्या आमच्या पत्रिकेत अगदी सेम नसतं 💞

जसं डोक्यात राग घातलेल्या 'मेषेच' असतं

तसंच डंख मारणाऱ्या ' वृश्चिकेचं ' असतं

या राशी आपल्या मानणा-या मंगळालाही 

प्रेमाचं मर्म चांगलच माहित असतं 

प्रेम म्हणजे प्रेम म्हणजे प्रेम असतं

तुमच्या आमच्या पत्रिकेत अगदी सेम नसतं 💕

नटण्या मुरणा-या ' वृषभेला '

समतोल 'तुळेची ' साथ असते

राशी स्वामी 'शुक्राचे' मात्र

'शनिशी ' अधेमधे नाते तुटते

'प्रजापती' ची उलटी भूमिका

पालकांना अधून मधून डसत असते 

( जरा बघता का हो पत्रिका म्हणत

ज्योतिषाकडे त्यांची विनंती असते) 

त्यांनाही परत तेच सांगतो...

प्रेम म्हणजे प्रेम म्हणजे प्रेम असतं

तुमच्या आमच्या पत्रिकेत अगदी सेम नसतं ❤‍🔥

असाच एक जण चक्क मला म्हणाला,

आम्ही कधी पत्रिकेच्या 

मागे लागलो नाही

दोन मुलं झाली तरी

त्यांचीही पत्रिका काढली नाही

आमचं काही नडलं का?

पत्रिकेशिवाय अडलं का?

त्याला वाटलं मला पटलं!

तेंव्हा मी इतकचं म्हणलं 

कर्म कर्म कर्म म्हणजे कर्म असतं

ते ही सगळ्यांच्या पत्रिकेत सेम नसतं 💘

(पंचमेश)  अमोल 📝

माघ. शु. एकादशी

१२/०२/२२

poetrymazi.blogspot.in

श्रध्दांजली

 ग्रहांच्या उच्च - निच राशी असतात तसा काहीसा प्रकार स्वरांचा ही असावा. 

म्हणजे स्वर एकच पण तो काहींच्या गळ्यातून येताना उच्च होतो तर काहींच्या गळ्यातून येताना नीच होतो.

पण एक गळा, ज्यातून उमटणारे स्वर हे कायमच उच्च, वर्गोत्तम होऊन

ल - य

ता- ल 

यांचा अलौकिक सोहळा बनायचे .

आज ते स्वर , संगीत विश्व  पोरके झाले.

 श्रध्दांजली 🙏🙏

अमोल केळकर 📝

#लता_मंगेशकर

मुंबई _लोकल_नवीन_जहिरात ( प्रासंगिक)

 मुंबई _लोकल_नवीन_जहिरात *

 ( प्रासंगिक )

फलाटाची उंची, लोकलचे पायदान

काळजी घ्या किंचीत

३% घटस्फोटापासून मग

कायमचे रहा  वंचित

वसंत पंचमी 📝

५/२/२२

#पळती लोकल पकडू या, मामींचे फंडे ऐकू या 😷

रेश्माच्या बाबांनी

 सरकारच्या या निर्णयावर मात्र अनेक भाविकांकडून स्वागतच झाले असल्याचे  एकंदर चित्र सोशल मिडियावर दिसते आहे🍷*

मग आमच्या रेश्माचे बाबा कसे मागे राहतील?

( प्रासंगिक 📝 * )

रेश्माच्या बांबानी, 'लाल पांढ-या' वाईननी

आठवडी बाजार हा आणिला

उगा नका पाहू त्यांच्या यादीला 

नवी कोरी यादी लाख-मोलाची

पाहिली ती रांग पुढे जाण्याची

घुसले बंडू नाना, मित्रवर्ग जोडीला 

उगा नका पाहू त्यांच्या यादीला 

जात होते सारे सारे तो-यात

शुक्र-मंगळाच्या त्या हो-यात

कुणी चकण्याला, डाळ-शेव घेतीला

उगा नका पाहू त्यांच्या यादीला

भीड नका ठेऊ, आल्यागेल्याची

मिरवा ओझी दहा पिशव्यांची

कुणी काही म्हणू  (दे) तुमच्या खरेदीला (खोडीला)

उगा नका पाहू त्यांच्या यादीला

( प्रासंगिक)  अमोल 

सोमवती पौष अमावास्या

३१/०१/२०२२

सांत्वन

 सांत्वन

काल एक आमचा मित्र गेला. वर्गमित्र नव्हता पण आम्ही एका शाळेत होतो. एक दोन वर्ष लहान असेल  पण शाळेला एकत्र जाणे,  कौटुंबिक परिचय, सुट्टीत एकत्र खेळणे, कालांतराने त्याचे शिक्षणासाठी आणि आमची नोकरी निमित्य एका गावी येणे,  आणि मध्यंतरी सुटलेला संपर्क परत सोशल मिडियामुळे प्रस्थापित होणे,  विविध राजकीय - सामाजीक आणि धार्मिक गोष्टीत सहभागाने परत एकदा ऋणानुबंध तयार होणे हे आजकाल सर्रास आढळणा-या चक्रातून आमचा ही झालेला प्रवास

आणि काल सोशल मिडियावरच त्याच्याबद्दल कळलेली बातमी. वयाच्या ४३-४४ मधे तो गेला. केवढा प्रचंड आघात त्याच्या कुटुंबीयांवर झाला असेल. नात्यानुसार जवळच्या व्यक्तीला सावरायला वेळ लागेल. सोशल मिडियापासून ते प्रत्यक्ष घरी जाऊन अनेक जण मानसिक आधार देतील, सांत्वन करतील, आणि कालचक्र पुढे जात राहील

सर्वसाधारण घडणारी ही गोष्ट . पण यात एक महत्वाची व्यक्ती दूर राहते आणि माझ्या मते त्या व्यक्तीला ही आधाराची गरज असते ती व्यक्ती म्हणजे गेलेल्याचा जवळचा मित्र. त्या जवळच्या मित्राचा कदाचित कुटुंबातील सदस्यांशी  जवळीक नसते पण ते एकमेकांचे अगदी खास दोस्त आहेत अशी ख्याती मित्र परिवारात असते. तेंव्हा अशा मित्राला ही आधार देणे, त्याला बोलते करणे, त्याच्यावरचा ताण कमी करणे हे इतर मित्रांना नक्की करण्यासारखे आहे.

काहीही असो पण अशा घटनांना इथूनपुढे आपल्याला सगळ्यांनाच सामोरे जावे लागणार आहे.

'जन काय, पळभर म्हणतील हाय हाय!

अमोल 

२३/१/२२

शेंदूर लेपन

 सध्या अनेक देवदेवतांचे आँन- लाईन दर्शन, सकाळ- संध्याकाळ आरतीची सोय त्या त्या देवस्थानने करुन दिली आहे. अनेक भाविक अशाप्रकारे दर्शनाचा लाभ घेतच असतात

प्रभादेवीच्या सिद्धीविनायकाला पूर्वी महिन्यातून एकदा जायचोच पण गेली २ वर्ष हे शक्य होत नाही आहे. पण  देवस्थानने करुन दिलेल्या सोईने दर्शन घेणे मात्र सहज साध्य झाले आहे. 

असेच दर्शन घेतानाचा हा कालचा फोटो. नियमित दर्शन न  घेणाऱ्यांना हा सिद्धीविनायक थोडा वेगळा वाटेल. होय ते बरोबरच आहे कारण ही धातूची मूर्ती काही दिवसासाठी दर्शनाला ठेवतात . मग मुळ मूर्ती?

तर साधारण गणेश जयंतीच्या आधी मुळ मूर्ती जी गाभाऱ्यात आहे तीला शेंदूर लेपन करतात आणि तोपर्यत मुळ गाभाऱ्याचे दार बंद करुन ही उत्सव मूर्ती भाविकांसाठी दर्शनाला ठेवतात.

थोडंसं वैचारिक. आपलं दैवत ही छान दिसावं, त्याच्याकडे पाहून मन प्रसन्न व्हावं, आनंद वाटावा म्हणून दरवर्षी मूर्तीला अपडेट करतो आपण. 

असं आपण ही अपडेट व्हायला काय हरकत आहे? 

आपल्या अवतीभवती अशी अपडेट करुन देणारी जी 'सौंदर्य मंदिरे' आहेत आणि तिथून बाहेर पडणारी आपली आजी/आई/बायको/ बहिण/ मुलगी/पुतणी/भाच्ची /काकू/मावशी/आत्या/वहिनी आणि हो 'मैत्रीणी'  पण जेंव्हा 'ब्यूटी' 'फूल ' होऊन येतात तेंव्हा त्यांचा नक्की आदर करा हेच यानिमित्याने  सांगणे ☺️

शुभ रविवार 📝

पौष शु. चतुर्दशी

१६/०१/२२ 

www.poetrymazi.blogspot.com

मंगळवारची पहाट

 मंगळवारची पहाट . सिध्दिविनायक मंदिरात दर्शनाला  जाण्यासाठी पहिली लोकल पकडून दादरला उतरलो आणि टिळक ब्रीजच्या बाजूने प्लाझाकडे चाललो. रात्री दुतर्फा रस्त्यावर ठिकठिकाणी लागलेल्या शेकोट्या अजूनही धुमसत होत्या. 

पहाटेच्या धुक्यात मंद दिसणारे दोन दिवे हे शेअर टँक्सी चे असू देत अशी मनोमन प्रार्थना केली आणि तसेच घडले.

खच्चून भरलेल्या टँक्सीत फूल हिटर लावल्यानंतरही घामाचा एक ही बिंदू न येता प्रभादेवीला उतरून दर्शन रांगेतून पुण्याच्या सारसबागेतील स्वेटर मधे असलेल्या गणपतीप्रमाणेच प्रभादेवीच्या बाप्पाला बघताना मन प्रसन्न झाले. कुडकुडत कुडकुडत त्याही अवस्थेत उंदीर मामाच्या कानात इच्छा व्यक्त केली की बाप्पाला सांग पूर्वीचे 'घामाचे'( अन कामाचे) दिवस लवकर आण रे देवा'

दर्शन घेऊन परत दादरला आल्यावर छबिलदासच्या दुकानात गरमगरम वडा पाव बरोबरच शेगडीवरची कणसं विकली जात होती. प्रसादाचे कणीस घेऊन स्टेशन कडे निघालो 

दादर स्टेशनच्या फलाट नं १ वर टिटवाळा स्लो पकडून खिडकी कडे झेप घेतली आणि थबकलो. चक्क बर्फ बिंदू जमा झाले होते. हाताचा स्पर्श करुन तो बर्फ थोडा ओंजळीत घेण्यासाठी हातातील ग्लोज काढले तोवर शीव स्टेशन आले होते आणि ओळखीच्या आवाजात उद्घोषणा होत होती

शीव,  शीव , शीव. वर्क फाॅर्म होम म्हणत सूर्य डोक्यावर येईपर्यंत एवढी ताणून द्यायची?  त्यात काय थंडीची फूस. आम्हाला नाही वाटत आराम करावा? पण आहे का सूट  #@*&&

आणी गाडी जी सुसाट सुटली.. .की विचारु नका 😷

 

( गारठलेला ,आजच्या पुरता WFH वाला)  अमोल 📝

११/१/२२

रामदास कामत

 रामदास कामतजी,  

भावपूर्ण श्रध्दांजली 🙏

"प्रथम तुज ऐकता, जीव वेडावला"

 नाट्यगीतांची आवड निर्माण व्हायला अर्थातच तुमच्या स्वरांचा मोठा वाटा होता .

देवा तुझा मी सोनार

नको विसरू संकेत मिलनाचा

हे आदिमा  हे अंतिमा

बहुत दिन नच भेटलो सुंदरीला

प्रेम वरदान स्मर सदा

ही काही गाणी तुमच्या आवाजात ऐकणे हा सुखसोहळा असायचा

अर्थात शेवटी

' देवाघरचे ज्ञात कुणाला '?

तरीही नाट्यसंगीत आणि रामदासजी कामत ही केमिस्ट्री कायम लक्षात राहील अगदी

'विश्व'नाट्य' सूत्रधार,तूच श्यामसुंदरा'

 या ओळींप्रमाणे

म्हणूनच म्हणावेसे वाटते

' चिरंजीव राहो जगी नाम रामा' 

🙏🙏

📝 ९/०१/२२

poetrymazi.blogspot.com