केम छो प्रेसिडेंट ?

कसं काय तात्या बरं आहे का?
अहमदाबाद ला येताय हे खरं आहे का?

*केम छो प्रेसिडंट?*🙋🏻‍♂( * )
मजामा?
तात्या, स्वागताची तयारी जवळजवळ झालीय.  वाटेतील झोपडपट्टी अजून थोडी झाकायची राहिलीय. एक दोन दिवसात होईल काम. विरोधकांना बोलायला काय जातय? त्यांच्या घरी कुणी अचानक पाहुणे आले तर घरातील पसारा आवरण्यासाठी काय काय युक्तया करतात आठवा म्हणावं
बाकी तात्या तुमच्यासाठी कायपणं!
अख्या जगाला 'हिंसेच्या' मुठीत ठेवणाऱ्या राष्ट्रप्रमुखाची  अहमदाबाद दौ-याची सुरवात 'अहिंसेच्या' कुटीतून

मान गये उस्ताद.

 काही काळजी करू नका, आमचे शेठजी समर्थ आहेत सगळ्यासाठी . निवडणूकीचं ही अजिबात टेन्शन नका घेऊ, आता आमचं पण लक्ष B - हार कडे लागलयं. तसंच तुमच्याकडे ही आहे म्हणा.

तात्या, बघा त्या स्टेडिअमच उद्घाटन झाल्यावर मुंबईत एखादी चक्कर मारताय का?

काय? बुलेट झाल्यावर?

झालं, आलात मग, वाट बघा. आपलं वाट बघतो.

पण तात्यानू मुंबईत पण तुम्ही याल म्हणून काही घोषवाक्य केलेलीना आम्ही मनसे,  वाया गेली ना भाऊ

सांगू?  आता तुम्ही म्हणताच आहात म्हणून सांगतो

"आवाज कुणाचा? ट्रम्प तात्यांचा"

ओ,काय हे? आं?
 पश्चिम महाराष्ट्राचे असलो म्हणून काय झालं? आमी बी आमच्या आबा-आज्जा पासून 'अमेरिकेलाच' जातो
असं म्हणता? मग हून जाऊ द्या.

(स्व)विकासासाठी घेतली आम्ही
महा- आघाडीत जंप
साखरेचे पोते देतो
स्वागत तुमचे 'तात्या ट्रंप " 💐

अय्या, तात्या येऊन राहिला का?
" येऊन राहिला तात्या
 द्या त्याला संत्र
घेऊ लगेच त्यांच्याकडून
अमेरिकेला जायचे पत्र"

कोकणचो होणार "कॅलिफोर्नियो"
तात्याची चुकली "अंगणेवाडी यात्रा"
भले प्रेसिडेंट असाल वा पंतप्रधान
"कोकण कन्येचे" तिकट मिळतय, पत्रा

तात्या, तात्या, बघा किती मराठी जनतेचे तुमच्यावर प्रेम आहे
पण एक गोष्ट तुमच्या लक्षात आली का?
पुणेकर लै नाराज तुमच्यावर

सगळ्यात जास्त अमेरिकेत पुणेकर आहेत आणि तुम्ही पुण्याला जाणार नाही?  रागावलेत. कुठल्याही प्रहरातील १-४ या वेळेत बालेवाडीला ही जायची त्यांची तयारी होती. पण त्यांच्या उत्साहावर पाणी फिरवलत तुम्ही. आता काय म्हणतायत बघा

सुन चंपा,  सुन तारा
तात्या पुना, नही आना
बडा दुःख हुअा, सुनलो मेरी बात
अमेरिका जायेंगे आज की रात

तात्यांनू, प्रवासास शुभेच्छा,. येताना ५ 'वेल' दोडा असलेली पुडी विमानात ठेवा म्हणजे चुकुन जरी विमान चिनवरुन आलं तरी काळजी नको आम्हाला

( *) - मनोरंजन हा हेतू

📝१४/२/२०२०
poetrymazi.blogspot.in

आमचे मिठी पुराण

"वचन दिन" ( प्राॅमिस डे)  बद्दल काल एके ठिकाणी वाचले की

"आधी लग्न कोंढाण्याचे,  मग रायबाचे "

हे वचन, आणि हे वचन पुर्ण करण्यासाठी जिवाचे रान करणारे स्वराज्याचे रक्षक , यांची यानिमित्ताने आठवण🙏🏻

 तर आज आहे "अलिंगन दिवस"
यानिमित्ताने
स्वराज्यासाठी मोठा धोका पत्करुन "अफजल खानाच्या मिठीचा " स्विकार करुन दगा- फटका होणार हे गृहीत धरुन पूर्ण तयारीनिशी उतरलेल्या महाराजांनी अफजलखानचा कोथळा बाहेर काढला

आणि हिंदवी स्वराज्याला अलिंगन देण्याचा मार्ग सुकर झाला.

भक्ती मार्गातील कृष्ण- सुदामा यांची मैत्रीपूर्ण 'मिठी' म्हणजे उत्कटतेचे प्रतिकच

पहिल्यांदा शाळेत जाणाऱ्या पाल्याची शाळेत सोडायला आलेल्या आई- किंवा बाबांना मारलेली मिठी, सासरी निघालेल्या कन्येची किंवा परदेशी चाललेल्या मुला/ मुलीची  पालकांना मारलेली मिठी,  सांघिक खेळात प्रतिस्पर्धी विरूद्ध विजय मिळवल्या नंतर संघातील खेळाडूंची एकमेकांना मारलेली मिठी, खूप दिवसानंतर भेटलेल्या मित्र/ मैत्रिणीला मारलेली मिठी, एखादे उद्दिष्ट साध्य झाल्यावर एकत्र एका संस्थेत काम करणाऱ्यांनी एकमेकांना मारलेली मिठी  ते एखाद्याचे सांत्वन करण्यासाठी मारलेली मिठी.

कृती एकच पण भावना वेगळ्या

अशीच एक मिठी,  प्रिती संगम कराडला असणारी. कृष्णा- कोयना भगिनींची,  निसर्गाचा अनोखा आविष्कार

हे सर्व सोडून इतर "मिठ्या" या "मुठीत" ठेवण्या संबंधीतच जास्त असण्याची शक्यता

📝अमोल १२/०२/२०२०
#आमचे_मिठी_पुराण

पुरस्कार शास्त्र

पुरस्कार शास्त्र. 🌷
( *काल्पनिक राजकीय लेख* : निव्वळ मनोरंजन हा हेतू , कुणाच्या ही श्रद्धास्थानांना ठेच पोहोचवण्याचा हेतू नाही. टोचला गेल्यास मंडळ जबाबदार नाही 📝 )

विरोधकांचे डोके ठिकाणावर आहे का ?

का हो काय झालं ?

काय झालं म्हणून मलाच विचारता ? अरे ज्या कुणाला पुरस्कार मिळाला आहे त्यांचे कार्य तरी बघा.

प्रश्नच नाही , कौतुक करावं तेवढं थोडं आहे सगळ्याचं . पण त्या एका ...

गप्प बसा. तो एक मास्टर स्ट्रोक आहे. तुमच्यासारख्या गल्लीतल्या कार्यकर्त्यांना  नाही कळणार ते

होय काय , मग तुम्ही सांगा

हो हो सांगतो की थांबा की जरा

का हो , भाऊंची वाट बघाताय का ? त्यांनी अजून लेख नाही केला प्रकाशित.   .

भाऊंची कशाला वाट बघायची , काही काही पुरस्कार  "ऑड मॅन  आउट " म्हणून द्यायचे असतात . गनिमी कावा असतो तो. असा उघड  करायचा नसतो .

नाही पण त्यांच्या वडिलांनी ६५ च्या युद्धात आपल्यावर बॉम्ब टाकले .

हेच म्हणतो मी तुम्हाला कळत नाही आहे. म्हणूनच आम्ही त्यांना पुरस्कार देऊन शत्रू राष्ट्रावर दबाब वाढवत आहोत. आता हे शत्रू राष्ट्रातील सगळे पायलट एका वेळी राजीनामा देतील आणि आपल्या मुलांना इकडच्या देशात पाठवतील. मग लढणार कोण आपल्याशी ?

पण त्याने बेकायदा वास्तव्य केले

पण आता तो भारताचा नागरिक आहे ना , गेली कित्येक वर्षे अनेक बेकायदा नागरिक इथे आहेत, तेव्हा कुणी त्यांना नागरिकत्व देऊन पद्मश्री दिलीय ? ही सुरवात आहे .

पण त्यांचे महान  कार्य ???

घ्या , आता हे ही आम्हीच तुम्हाला सांगायचे ? पाहिलं गाणं आलं तेव्हा केवढाsढा  होता तो , आता बघा बिचारा केवढांसा झालाय. सध्याच्या महागाईच्या काळात अचूक डायट कसे करावे याचा वस्तुनिष्ठ पाठ या महाशयांनी दिलाय आणि शाळेच्या अभ्यासक्रमात
"पद्मश्रींचा पँटर्न " म्हणून आम्ही लवकरच समाविष्ट करू .मध्यतंरी त्यांचा नवीन अलब्म आलेला
 " मेरा चेहरा क्यू नजर ना आये " आमच्या साहेबाच्या हस्तेच तो प्रकाशित झाला होता. तेव्हाच जवळजवळ ठरले होते 'कोअर कमिटीत 'आमच्या की या महान  व्यक्तीला पुरस्कार द्यायचाच

आणखी काही विशेष ?

त्यांचा जन्म दिवस माहीत आहे ? १५ ऑगष्ट , ते पण लंडन मध्ये . ज्या इंग्रजानी आपल्यावर दीडशे वर्ष राज्य केले त्यांचा  गावात आपल्या स्वातंत्र्य दिना दिवशी जन्म घायाचा आणि मग शत्रू राष्ट्राची गुपिते काढून आपल्या देशात स्थायिक व्हायचे. येरा गबाळ्याचे काम नाही हो

हो हो खरं म्हणताय तुम्ही , पण त्या तालुक्याने अनेक जणांचे अभिनंदनाचे फलक लावले , यांचे दिसले नाहीत कुठे ?

असं का म्हणता ? आमच्या पक्षाच्या कार्यालयात लावलाय की अभिनंदनाचा फलक . आणि ते ज्या शहरात सध्या राहतायत ना  तिथे सध्या विरोधी पक्षाचे सरकार आहे ना ? आम्ही परत आलो की लावू अभिनंदनाचे फलक

बर ते " भारत रत्न ?"

म्हणूनच म्हणतो  " विरोधकांचे डोके ठिकाणावर आहे का ?" उगाच काही तरी?
 विषय वेगळा आहे, मधेच
' भारत रत्न '  कुठे आले ? आणि आमच्या आधीच्या सरकारने ७० वर्षात काहीही केलेलं नाही , आम्ही निदान ७ वर्षात तरी करून दाखवूच .
२६ फेब्रुवारी आधी बघाच तुम्हाला चांगली बातमी मिळेल

ते ठीक व साहेब पण असं खाली मान घालून मिळमिळीत का बोलताय.

" कभी तो नजर मिलाओ "

 📝२७/१/२०२०

जिलबी

नक्की केंव्हा सुरुवात झाली माहित नाही पण गेले अनेक वर्षांपासून २६ जानेवारी  ( आणि १५ आॅगस्ट) निमित्य केल्या जाणाऱ्या  गोड पदार्थात   'जिलबी'  ने अगदी मानाचे स्थान पटकावले आहे यात शंका नाही.
जात, पात, धर्म , गरिबी, श्रीमंती याचे कुठलेच बंधन न ठेवणारी ही जिलबी.

  आमच्या इकडे बेलापूरला तिला आणताना तिचा मोठ्ठा भाऊ पंजाबच्या सामोसाला ही घरी आणायची पध्दत आहे. पण जिलबी खायची खरी मजा आम्ही घेतली ती सांगली मधील ( त्यातही मिरजेतील) अनेक मंगल कार्यालयात. अगदी
 गो-यांपासून, ख-यांपर्यत कुठल्याही कार्यालयात  पंगतीत वाढली जाणारी गरमागरम , स्वर्गीय चविची जिलबी आणि सोबतीला तिचा थंडगार पण जरा मठ्ठ मित्र म्हणजेच मठ्ठा. ( इथे मठ्ठ्याला ताक म्हणणे म्हणजे भयंकर अघटीत गोष्ट समजावी) ह्या जोडी शिवाय अनेक वर्षे सांगली/ मिरज ( आणि इतर शहरातलीही) येथील अनेक मंगल कार्य झालीच नाहीत. एकंदर लग्नाची व्यवस्था, जेवण आणि स्पेशली या जोडी साठी मुलगा/ मुलगी दुस-या गावचे पण लग्न सांगली/मिरजेत झालेली उदाहरणे प्रत्यक्ष पाहिली आहेत.

जेवायला जेंव्हा आम्हाला वेगळं बसवायला लागले ( आई/ बाबा, काका/ काकू, मोठा भाऊ/ बहिण यांच्या पाना शिवाय )तेंव्हा आम्ही ख-या अर्थाने ' खायच्या वयात ' आलो. हळूहळू पंगत कशी अंगीकारायची हे ही जमू लागले
एखाद्या मंगल कार्यात जेवायला बसल्यावर सवयीने सुरवातीचा पांढरा भात, नंतरचा मसाला भात किती घायचा हे  समजायला लागले. मग मसाला भाताच्या मागून जिलबीचे ताट घेऊन येणारे काका/ दादा दिसले की पटकन मसाला भाताचा राहिलेला घास कसाबसा गिळून , बाजूच्या कोशिंबीरीचा ओघळ बाजूस करुन ,येणाऱ्या जिलबीला खास जागा जरुन देणे हा जेवणाच्या कार्यक्रमातील एक महत्वाचा घटक असायचा. आपल्या ताटात १-२ जिलब्या वाढून पुढे गेलेल्या काकांना, ओ अजून एक वाढा न असं सांगून १-२ अधिक जिलब्या ताटात पाडून घेतल्यावर एखादं युध्द जिंकल्याच फिलींग यायचे.

अर्थात पंगतीत एकावेळी १-२ ताटं जिलब्यांचा लिलया पडशा पाडणा-या जून्या सांगलीकर/ मिरजकरांशी मात्र बरोबरी करणे कधीच शक्य नव्हते

काळ बदलला. मंगल कार्यालयात जिलबीला अनेक पर्यायी गोड पदार्थ आलेत. आता तर अशी वेळ आली आहे की ' जिलबी ' पक्वान्न ठेवणे म्हणजे काहीतरी वेगळी ( स्पेशल) गोष्ट केलीय. पंगत जाऊन स्वत: स्वतःसाठी वाढून घेणे आणि त्यापेक्षाही भयंकर म्हणजे ते शूगर फ्री जिलबी, डायट जिलबी इत्यादी इत्यादी

तरीपण या जिलबी बद्दलचा लळा, जिव्हाळा कायम राहिलच 😋

📝(जिलबी प्रेमी) अमोल
poetrymazi.blogspot.in
२६/०१/२०२०

जागतिक हस्ताक्षर दिवस

*सुंदर अक्षर हाच खरा दागिना आहे*.

मंडळी, नु. म.वि पुणे शाळेतले काही मित्र महिन्यातील एका रविवारी एकत्र भेटतात आणि शाळेतील आपल्या जून्या आठवणींना उजाळा देतात असा एक व्हिडिओ ( मित्रांच्या गेट टू गेदर बद्दल) काल पहाण्यात आला. त्यात सुरवातीलाच विजय कदम फळ्यावर लिहिलेला *~सुंदर~* हा शब्द खोडून *अक्षर हाच खरा दागिना आहे* असे करुन आपल्या वाईट अक्षराबद्दलचे अनुभव सांगतात. मग कुणाचे अक्षर चांगले होते आणि इतर आठवणी,  चर्चा रंगतात.

 शाळेच्या अनेक समुहात एकदा तरी कुणाचे अक्षर चांगले होते वगैरे आठवणी काढल्या जातातच. त्यावरुन कुणाला कसे एखादा, अर्धा मार्क जास्त मिळाला ही आठवण ही येते ( आमचा शाळेचा समुह ही याला अपवाद नाही)

मंडळी, हे आठवायचे कारण म्हणजे आज काय '
*जागतिक हस्ताक्षर दिन वगैरे आहे* .

काही काही जणांची अक्षरे दृष्ट लागण्यासारखी चांगली असतात यात शंका नाही. पण कितीही प्रयत्न केला तरी चांगले अक्षर लिहिणे मला स्वत:ला कधीच जमले नाही. अगदी लहानपणी आईने अक्षरांना वळण लागावे म्हणून एक प्लॅस्टीक ची पाटी आणून दिली होती ज्यावर संपूर्ण बाराखडी,  इंग्रजीतील अल्फाबेट्स होते, जे पेन्सिल घेऊन गिरवायचे आणि आपल्या अक्षरांना वळण लावायचे असा उद्देश होता. मात्र माझ्याबाबतीत तो अजीबात सफल झाला नाही.

शाळेतील सर्व विषयांच्या वह्या ते अगदी २०२० ची डायरीतील फक्त पहिल्या पानावरील 'श्री ' आणि काही ओळी सोडल्या तर छान अक्षर काढायला जमलेले नाही.

जे या क्षेत्रात म्हणजे 'सुंदर अक्षर लिहिण्याच्या' क्षेत्रात अजून ही आहेत त्यांचे अभिनंदन आणि पुढील सुंदर लेखनास शुभेच्छा 💐

सध्याचे संगणक,  मोबाईल आणि विविध अॅप यांचे ,यानिमित्ताने विशेष आभार की प्रत्यक्षात आमचे हस्ताक्षर कसे आहे याचा थांग पत्ता ते लागू देत नाहीत, पत्र लेखन तर आता इतिहासजमाच आहे.

तरी यदाकदाचित आमचे हस्ताक्षर पहाण्याचा कुणाला योग आलाच तर मंडळी एक गोष्ट आधीच सांगतो

मोठ्या लोकांचे हस्ताक्षर हे वाईटच असते बरं ! 🤗

📝२३/०१/२०२०
अमोल
poetrymazi.blogspot.in

दत्ता डावजेकर यांनी संगीत दिलेले आणि जयवंत कुलकर्णी यांनी स्वरबध्द केलेले एक गाणे आज उगाचच आठवत आहे

मुळ गाणे: वाट संपता संपेना, कुणी वाटेत भेटेना, इथे आलो असा कसा, कुणी काहीच सांगेना

आम्हाला ऐकू आलेले गाणे 🙉

'खातं' मिळता मिळेना
कुणी 'खायला' देईना
इथे आलो तरी कसा
महा- विकास होईना.

खातं' मिळता मिळेना...

लांब आता पाच वर्षे
वाट वाकडीतोकडी
दूर दूर बांद-यात
एक दिसते 'मातोश्री'
तिघे येती जुळवती
कुणी 'पद' ही देईना

खातं' मिळता मिळेना...

दिसे प्रकाश अंधुक
मंत्रा लयाचा कंदिल
अंतर काही मैलाचे
आता गाठीन मंझील
जवळचा 'बंगला' नसे
काय करावे कळेना

खातं' मिळता मिळेना
कुणी 'खायला' देईना
इथे आलो तरी कसा
महा- विकास होईना.

📝अमोल
०४/०१/२०२०
poetrymazi.blogspot.in

पाऊले चालती

देशातील काही मूर्ख अप्सरांसाठी

पाऊले चालती JNU ची वाट
'देश एकतेची' तोडूनिया गाठ

पाहूनिया भारी, नाट्य अप्सरेचे
राहिली रिकामी थेटरची सिट
पाऊले चालती.  ..

आप्त इष्ट सारे,  बाॅलीवूड तारे
पाहुनिया सारे जाती पाठोपाठ
पाऊले चालती.  ..

येता शिणेमा मूर्ख अप्सरांचा
"छपाक" विचारांचा व्हावा नायनाट

पाऊले चालती JNU ची वाट

📝९/१/२०२०
अमोल
poetrymazi.blogspot.in

खेळ मांडला

📝 खेळ मांडला
🏇🏻🤺🤾‍♀/ 🎲♟🐍

मंडळी नमस्कार 🙏🏻

नवीन २०२० वर्षातला हा पहिला रविवार. तर आजच्या या पहिल्या रविवारी मुलांबरोबर सकाळी सकाळी जाऊन लहान मुलांचाच एक सिनेमा पाहिला

  ' जुमानजी द नेक्स्ट लेवल '

सिनेमा हिंदीत होता पण मुळ कल्पना (सिनेमा )अर्थातच बाहेरची( परदेशातली)

काय म्हणजे कुठल्या लेवल पर्यत हे कल्पना करु  शकतात हे पाहून अचंबीत व्हायला झाले. नाही म्हणजे लहान मुलांचा सिनेमा म्हणजे आपल्याकडे एक तर पौराणिक काळातील राम - कृष्ण- गणेश फार तर ज्ञानेश्वर- तुकाराम ,  इतिहासातील बाल शिवाजी, संभाजी किंवा फारच कल्पना  करायची झाल्यास  राजा-राणी,  जादुगार, राक्षस/ चेटकीण.  या पलिकडे आपण ( म्हणजे आपली सध्याची वय वर्षे  ४० आणि त्या पुढची पिढी) तरी कधी गेलो नाही.

पण सध्याचा जमानाच वेगळा आहे. लहान पणा पासूनच मुलांच्या हातात संगणक/ मोबाईल आलेत. आजकाल मुलांचा 'घरचा अभ्यास ' ही पालकांच्या मोबाईलवर येतो, वर्गातील मुलांच्या पालकांचे व्हाटसप ग्रुप आहेत. मोबाईल/ संगणकातील खेळ ( गेम)  हे ही अगदी सवयीचे झाले आहे. किंबहुना तो जीवनाचा अविभाज्य घटक बनले आहेत. त्याच्या  अती आहारी जाणे, अनेक खेळातील लेवल्स पार करता करता  अपघात होणे, आत्महत्त्या करण्यापर्यत मजल गेल्याच्या बातम्या आपण ऐकल्या आहेत वाचल्या आहेत.

या मोबाईल / संगणकातील गेम्सच्या वेडापाई काही मित्र मैत्रिणी त्या गेम मध्येच त्यातील एक कॅरेक्टर बनून जातात, वेगवेगळ्या लेवल्स, प्रत्येकाला मिळालेल्या ३ लाईफ लाईन्स , या प्रकारात घरातील एक अजोबा व त्यांचे मित्र ही या मुलांबरोबर गेम मधे एक कॅरॅक्टर बनून ओढले जाणे, यात मदतीला येणारे  हेल्पर्स , ड्रामा, कोडी सोडवणे ( सुता वरुन स्वर्ग गाठणे)  वृध्द मित्रांची पुर्वीची भांडणे , गेम खेळताना एकमेकांना मदत करताना  त्यांना होणारा पश्चात्ताप, आणि परत गेम जिंकून सगळ्यांचे मुळ रुपात परत येणे असा फूल टाईम पास सिनेमा आहे.

आपल्या ही सिनेमाची थीमच भन्नाट वाटली.

म्हणजे असं की तुम्हाला रोड रॅश खेळ खेळायचा आहे तर तो संगणकावर किंवा मोबाईल वर न खेळता आपण स्वत: त्या दुनियेत जायचे, मॅप निवडायचा, बाईक, इंजीन, हेल्मेट सगळं आपण ठरवायच आणि प्रत्यक्षात रेसला उतरायचे,  हिरवा दिवा लागला की
 धू ssम ..🏍
(आता "रोड रॅश" च का तर या गेमच्या पुढे आम्ही कधी पोहचलोच नाही😬)

भारीच ना?  आता तुम्हाला कुणाचा गेम आपलं कुठला गेम खेळायला आवडेल हे तुम्हीच ठरवा. 🙂

 पण एक विचार मनात आला
आज आपल्या पालकांना जर विचारले ही थीम घेऊन तुम्हाला कुठला खेळ स्वत: खेळायला आवडेल तर ते म्हणतील एक तर ते मोबाईल संगणकावर  कधी खेळले नाहीत. विरंगुळा म्हणून त्यांनी सह कुटुंब साप-शिडी वगैरे मर्यादित  खेळ खेळले असण्याचीच शक्यता जास्त. आता त्यांना सांगितलं जर त्यातली एका रंगाची सोंगटी बनून तुम्ही स्वत : तिथे जायचे,  जसे फासे पडतील तसं शिडी चढत जायचं,  सापाने गिळलं तर परत खाली यायचं तर त्यांनी जरा आवाज चढवूनच  सांगितलं असतं की मग इतकेदिवस या आयुष्याच्या पटावर काय करत आलोय? सापशिडी, व्यापार डाव,  बुध्दीबळ, अगदी बदाम सात यातल्या युक्त्या आयुष्याचा खेळ खेळताना मदतीला आल्याच की. मग कशाला हे अभासी जगात रमून स्वतःचे समाधान करणे?

मंडळी, किती वास्तवादी होते ते खेळ आजच्या व्हर्चयूअल खेळां पेक्षा.मोबाईल वरचा एखादा खेळ खेळतोय आपण अशी कल्पना करुन आपण सिनेमा काढू शकतो फार तर तास- दोन तासाचा
पण इथं आपल्या मागच्या पिढीचं आयुष्य गेलं हे सगळे खेळ प्रत्यक्ष खेळून ' आपला खेळ रंगवण्यात '

#खेळ मांडला ♟🎲🐍🏍🤺🤾‍♀🏇🏻

📝५/१/२०२०
poetrymazi.blogspot.in📝 खेळ मांडला
🏇🏻🤺🤾‍♀/ 🎲♟🐍

स्वागत २०२०

संध्याकाळी दिवेलागणी झाल्यावर "शुभंकरोती कल्याणम्" वगैरे स्तोत्र म्हणून झाल्यावर,
 हं , ' कुठं चाललात ' ?
 म्हणा पाठे !
निदान २० पर्यत तरी म्हणा असा आदेश वडीलधाऱ्यांकडून निघायचा .

मग २ ते ११ पर्यत फास्ट ट्रॅक वरुन सुटलेली पाढ्यांची गाडी, १२ ते १९ पर्यत स्लो ट्रॅकवर कशी यायची ते कळायची नाही.

२० चा पाढा मात्र परत सुसाट मेगा हायवेसारखा.

तो पाढा म्हणतानाची सहजता, आनंद आणि उत्साह तुम्हाला या आगामी २०२० वर्षात पुन्हा एकदा भरपूर मिळो या नवीन वर्षाच्या पूर्वसंध्येला सर्वांना

प्रेमळ शुभेच्छा 🙂
🙏🏻🙏🏻:💐💐


📝अमोल✌🏻
३१/१२/१९

'गणित' या विषयात ज्यांना
" लळा, जिव्हाळा " आहे त्यांना दंडवत 🙏🏻.
आमच्या साठी हा विषय म्हणजे

वजा ➖ बेरीज ➕
रहस्य मोठे 🙄
फुल्या ✖ फुल्या ✖
येई
' गणित'  आमचे नाही राजा
'गणित ' आमुचे नाही

तरीपण :-

सर्व आंतराष्ट्रीय  'कवी ' मंडळीना ' गणिती'  दिवसाच्या शुभेच्छा💐

'आकडे' मांडून 'गणीत' सोडवणे जसे अवघड तसेच योग्य 'मात्रेत' 'अक्षरांचे ' गणित मांडून त्यावर 'अलंकारिक' वृत्ताचा साज चढवून सोपे जिवनाचे गणित अधिक अवघड भासवणारी 'कवी' मंडळी ही आजच्या दिनी कौतुकास पात्र आहेत 😉💐

याकाही ओळी त्यांच्यासाठी

'१३' मेरा '७' असो
' १७६० ' वेळा
पण काहीही असो तुम्ही
'४' ओळीतच खेळा

#'आंतराष्ट्रीय गणिती दिवसाच्या ' शुभेच्छा 💐

0⃣ ▶↔🔢
➕➖➗✖💲💱

📝 ७ वीत एकदाच शंभरपैकी शंबर मिळवणारा गणिती तज्ञ🤪

२२/१२/१९
poetrymazi.blogspot.in

शाळच्या मितरांची 'पार्टीत' भेट झाली

२०१९ ची शेवटची ' रविवारची टूकारगिरी '📝
 (  यावर्षीचे हे शेवटचे विडंबन आता २०२० मधे  "मी परत येईन" ✌🏻  )

मूळ गाणे : भन्नाट रानवारा मस्तीत शीळ घाली , रानच्या पाखरांची रानात भेट झाली

भरला ग्लास सारा, बाटली बाजू केली
शाळच्या मितरांची 'पार्टीत' भेट झाली 🥳

एकाच वर्गामंदी वाढलो एका ठायी
पुरान्या वळखिला पिण्याची नवलाई
खाण्याला 'शेव डाळ', चकली(ही) साथ आली
शाळच्या मितरांची 'पार्टीत' भेट झाली  🍾🍺

पुढ्यात रम व्हिस्की,वेटर घेऊन आला
बारच्या हॉलमध्ये  खमंग  वास भरला
काहूर आठवणींचे, 'प्रिती'ही आठवली 
शाळच्या मितरांची 'पार्टीत' भेट झाली 🍷🍻

बेवड्यांची  खूप गर्दी , काळोख दाट  झाला
उत्साह फेसाळला, विचार तेजाळला
सुचते तशातही " गाण्याच्या टुकार ओळी "
शाळच्या मितरांची 'पार्टीत' भेट झाली  🥂🥃

📝 अमोल ✌🏻
poetrymazi.blogspot.in

मूळ गाणे : -
भन्‍नाट रानवारा मस्तीत शीळ घाली
रानंच्या पाखरांची रानात भेट झाली

येकाच रानामंदी वाढलो येका ठायी
पुराण्या वळखीला ज्वानीची नवलाई
मनींची खूणगाठ लगीन गाठ झाली

रानाचा हिरवा शालू आकाश नीळा शेला
हवेच्या कुपीमंदी मातीचा वास ओला
बाशिंग डहाळीचं, वेलींच्या मुंडावळी

पानांची गच्च जाळी काळोख दाट झाला
काळोख गंधाळला काळोख तेजाळला
झुलती काळोखात गाण्याच्या दोन ओळी

स्टेटस अच्छे होते है

" स्टेटस " अच्छे होते है ✌🏻

एव्हान सोशल मिडियाने ब-याच जणांना आपल्या मगरमिठीत घेतलेले आहे. डिपी, टँग, ट्विट यासारखे शब्द/ क्रिया आपल्या आता परिचयाच्या झाल्या आहेत. मध्यंतरी सुरु झालेला 'स्टेटस' ठेवणे/ लावणे हा प्रकार एक अनोखी गोष्ट ( क्रिएटिव्हिटी) असं मी मानेन. फेसबुक, व्हाटस अप वर आपण आजकाल सतत ते करत ही आलोय. किंबहूना समुहात एखाद्या मेसेजला प्रतिक्रिया न मिळता त्याच मेसेजला स्टेटस मधून रिप्लाय मिळण्याचे प्रमाण वाढतयं. कुणी कुणी अगदी किती वाजता आपलं स्टेटस पाहिलं हे कळतयं.

'स्टेटस'. समाज मनात असलेली ( की आपण करुन घेतलेली)   आपल्या बद्दलची प्रतिमा. खरं म्हणजे आपल ' स्टेटस ' काय हे इतरांनी ठरवायचे.
पण आजच्या या सोशल मिडियाद्वारे आपण आपली प्रतिमा/ इमेज/ विचार पुढे करुन आपले "स्टेटस" आपणच प्रोजेक्ट करायचे ही एक प्रकारे चांगली? / कौतुकास्पद  प्रक्रिया.

किती वेळ राहतो / दिसतो हा स्टेटस ? फक्त ३० सेकंद. किती लावायचे? कितीही
पण या 'स्टेटसचा' आपल्या सोबत रहायचा कालावधी फक्त २४ तास

म्हणजे तुमचे " स्टेटस" ही किती *क्षणभंगूर* आहे हेच तर सुचवायचे नसेल?  📝

दुस-या अर्थाने २४ तासात तुम्हाला बदलायची, आणखी चांगले व्यक्त होण्याची, चुकांची दुरूस्ती करण्याची संधी असंही बघता येईल

पूर्वी 'रिन' का 'सर्फ ' पावडरची जहिरात असायची 'डाग' अच्छे होते है

 आजचे माझे स्टेटस थोडेसे असेच
' स्टेटस' अच्छे होते है

समुहात व्यक्त न होता आपल्या वेगवेगळ्या "स्टेटसद्वारे" विचार करण्यास प्रवृत्त करणाऱ्या सर्व प्रभुतींना सादर समर्पित 🙏🏻

📝२७/१२/१९
 अमोल
poetrymazi.blogspot.in

बाॅक्सिंग डे, सूर्यग्रहण

बाॅक्सिंग डे 👊🏻👊🏻

नाताळ नंतर चा दुसरा दिवस म्हणजे
 "बाॅक्सिंग डे ". या दिवसाच्या अदल्या रात्रीच मोठा भाऊ 'राडा' करुन घरी आलाय.  आईला आधीच याचे वेध लागल्याने ती त्याची वाटच बघतीय. तो सकाळी घरी आल्याआल्या दोघांच्यात धडपकड सुरु झालीय.

अशा वेळी छोटी बहिण भावाला वाचवण्यासाठी मधे पडलीय आणि तिच्या मागे लपून (सावलीत) भाऊ आई पासून वाचण्याचा प्रयत्न करतोय

हं,  कवी कल्पना आहे 🤗
काहींना टुकार वाटेल

पण

 आकाशात बघा आज ८ ते ११. हेच दिसेल


हॅपी ' बाॅक्सिंग डे ' 👊🏻


आकाशाशी जडले नाते
ग्रह ता-यांचे
सूर्यग्रहण पहा कवीचे
लक्ष तिकडेच सा-यांचे

जोतिषाने सहज पाहिले पंचांग आsजचे
एक जाहले रविचंद्रकेतू धनू राशीsचे
उभे ठाकले ग्रह सावळे समोर दुहीतेचे

सूर्यग्रहण पहा कवीचे
लक्ष तिकडेच सा-यांचे

लुब्ध जनता दुरुन न्याहळी ग्रह 'धनू'र्धारी
चषम्या मध्ये एकटवुनिया निजशक्ती सारी 😎
सुरू जाहले मंत्र हळू हळू  'कृष्ण हरीचे '

सूर्यग्रहण पहा कवीचे
लक्ष तिकडेच सा-यांचे

उंचावुनिया पहा पापण्या पाहत ती राही
तडिताघातापरी भयंकर नाद तोची होई
ढगांनीमग केले वाटोळे आज ग्रहणाचे ☁☁

सूर्यग्रहण पहा कवीचे
लक्ष तिकडेच सा-यांचे
             
🌞(🌚)     🌝            🌏


📝अमोल
poetrymazi.blogspot.in
२६/१२/१९
#💍ग्रहण
#दे दान ( प्रतिक्रिया)सुटे गि-हाण
#बाॅक्सिंग डे 👊🏻👊🏻
#घाला शेण तोंडात 🥴आम्ही प्रसाद समजू 😋

हा ' टॅग ' गाडीला लावीतसे

विडंबन असे  ' फास्ट  टॅग '   केले की छान वाटते 🚧🚥🚘😬

हा ' टॅग ' गाडीला लावीतसे
( मुळ  गाणे : हा छंद जिवाला लावि पिसे ! )

तिथे टोल सखे भरपूर दिसे
खिशात ' मनी ' सर ले भलते 
दिनरात तुझा रे ध्यास जडे
हा ' टॅग ' गाडीला लावीतसे 

ती रांग  तुझ्या नजरेमधली
गाडी आपली नेहमीच बळी
'टॅगात ' असेल जादुखरी
गेलो ओलांडुनी  'फास्ट' कसे

आरशाच्या मागे चिकटव वरी
हा स्कँन होतसे लईभारी
तो मार्ग मग घायाळ करी
वेगात पळाली कार दिसे

📝अमोल
१८/१२/१९
poetrymazi.blogspot.in

मुळ गाणे :
तुझे रूप सखे गुलजार असे
काहूर मनी उठले भलते
दिनरात तुझा ग ध्यास जडे
हा छंद जिवाला लावि पिसें!

ती वीज तुझ्या नजरेमधली
गालीं खुलते रंगेल खळी
ओठांत रसेली जादुगिरी
उरिं हसति गुलाबी गेंद कसे!

नखर्यांत तुझ्या ग मदनपरी
ही धून शराबी दर्दभरी
हा झोक तुझा घायाळ करी
कैफांत बुडाले भान असे!

अधिक महिमा ➕

अधिक महिमा ➕

मंडळी नमस्कार 🙏🏻

इंग्रजी  कालनिर्णयानुसारचे सन २०१९  वर्षातील शेवटचे काही दिवस शिल्लक आहेत . नवीन वर्ष २०२० च्या दिनदर्शिकांची खरेदी ही एव्हांन अनेकजणांची झाली असेलच . आजकाल मोबाईल मध्ये पुढील ५० वर्षांपर्यत ( किंवा त्याहून जास्त ) च्या दिनदर्शिका जरी मिळत असल्या  तरी  दरवर्षी भिंतीवरील दिनदर्शिका घेऊन नवीन वर्षात सुट्ट्या केव्हा आहेत हे पहाण्याची मजा अजूनही मी घेतो. सर्वात पहिल्यांदा नवीन वर्षात आपला वाढदिवस कोणत्या वारी आहे , रविवारला लागून कुठल्या सुट्ट्या आल्यात , गणपती केव्हा आहेत ? इ इ .

 एखादा जोतिषी  असेल तर वर्षात होणारे ग्रहांचे राशीबदल , ग्रहणे  इ गोष्टी त्याच्यासाठी आपुलकीच्या असू शकतील. धार्मिक कार्य करणा-यांसाठी  विवाह - वास्तू - व्रतबंधन  मुहूर्त आपुलकीचे होऊ शकतात .

 तर मंडळी  यंदाच्या २०२० साल हे समस्त जावई  मंडळींसाठी ही विशेष आहे कारण सप्टें / ऑक्टोंबर मध्ये येणारा अधिक महिना ( अधिक अश्विन).
 अधिक महिना का असतो, त्याचे महत्व वगैरे ही माहिती आत्ता तरी आपल्याला घ्यायची नाही आहे  पण या  " अधिक  ( + )"  शब्दाशी आपण कसे परिचित आहोत हे पाहण्याचा केलेला हा एक ( टुकार ) प्रयत्न.

लहानपणी गणित शिकताना  अधिक  ( + )  हा शब्द  पहिल्यादा आपण शिकतो/ आपल्याला समजतो.  माझ्याबाबतीत बरीचशी बेरीज ( अधिक + ) असलेली गणिते वजाबाकी असलेल्या गणितापेक्षा जास्त बरोबर आली आहेत किंवा वजाबाकीच्या गणितां पेक्षा बेरीज असलेली गणिते मला जास्त आवडायची . थोडे मोठे होत गेल्यावर परीक्षेत अगदी  इतर विषयाच्या पेपरात  ' अधिक + पुरवण्या ' लावण्या एवढी मजल मात्र मी मारू शकलो नाही . 

अधिक / जास्त / अजून  या गोष्टीशी आपले नाते मानवी स्वभावानुसार  अगदी नैसर्गीक  आहे कारण जन्माला आल्यापासून आपले 'शारीरिक वय ' हे  वाढतच असते ( अधिक + ) , उणे कधीच होत नाही. ' मार्केटींग स्कीम ' मध्ये या  ' अधिक + ' गोष्टीचा अगदी पुरेपूर वापर केलेला दिसतो.  २ गोष्टींवर एक गोष्ट  फ्री ( अधिक ) , अमुक एक गोष्ट अमुक कालावधीत घेतली तर तिसरी एखादी गोष्ट अधिक मिळेल , एखादी  पॉलिसी/ ट्रॅव्हल प्लॅन / एखाद्या क्लबची मेंबरशीप घ्या आणि ही ( अधिक + ) बक्षिसे मिळवा इ इ इ.
दिवाळी/ होळी साठी  कोकणात सोडण्यात येणा-या जादा ( अधिक ) रेल्वे , पंढरपूर यात्रेसाठीच्या अधिक बसेस, दिवाळीत काही नशीबवान कर्मचा-यांना  मिळणारा बोनस ( अधिक )  एखाद्या उत्तम कलाकाराने सादर केलेली कलाकृती याला मिळालेला ' वन्स मोर ' ( अधिक + ) , शनिवार/ रविवार काही  मालिकांचा सादर होणारा एक तासांचा  विशेष ( अधिक + ) भाग , कुठल्याही मॉल मध्ये सिनेमाच्या तिकिटाबरोबरच खादाडी करण्यासाठी घेतलेला ( अधिक + ) कॉम्बो पॅक , मराठीतील काही म्हणी जशा ' आधीच  उल्हास त्यात फाल्गुनमास ' किंवा 'दुष्काळात तेरावा महिना' या सगळ्या गोष्टींचा  कुठे ना कुठेतरी  " अधिक + " शी संबध येतो असे वाटते . अगदी आजारी पडलो , अपघात  झाला  तर आयुष्यमान  वाढण्यासाठी जिथे आपण पोचतो त्या जागेचे चिन्ह ही '  लाल रंगात +  ' हेच असते.

 आणि शेवटी ते म्हणतात ना
 ' नॉट बट लिस्ट '  का काय ते .

 राजकारण ?  होय राजकारण या प्रकारातही आपण अनेकदा ' बेरजेचे राजकारण ' ऐकतो / पहातो की + ✌🏻

तर असा हा " अधिक + महिमा" आपणास आवडला असेल. तर सन २०२० हे लीप वर्ष असल्याने फेब्रुवारीही १ दिवस अधिक घेऊन आला आहे. आधी लिहिल्याप्रमाणे सर्व जावयांसाठी ' अधिक मास ' पर्वणी आहेच . पण कधी तरी वाटत  ही  'अजून अजून / अधिक अधिक'  ची हाव  मर्यादित हवी . एकंदर मिळणा-या गोष्टीत समाधान आहे/ बास आता अजून अधिक नको . किती पळायचे त्या अधिक/अधिक च्या मागे? असे वाटणे ही महत्वाचे .

 लेखनाचा शेवट ' धीर ' धरी  असा मोलाचा सल्ला देऊन

होसी का भयकंपित धरसी का शंका
गाजतसे वाजतसे तयाचाच डंका 
'जय गोविद' 'जय मुकूंद'  'जय सुखकारी'

धीर धरी धीर धरी जागृत गिरिधारी

📝अमोल
१७/१२/१९
poetrymazi.blogspot.in

# ' अधिक ' (  + ) चांगलं लिहायला पाहिजे अजून असं सतत वाटून सतत लिहिते राहणा-या समस्त लेखक लेखिका/ कवी, कवयित्रींना समर्पित 🙏🏻

हीच वेळ 'फजितीची'

सध्याच्या 'स्थगिती सरकार ' प्रती 📝

( चाल: एकवार पंखावरुनी फिरो तुझा हात, शेवटचे घरटे माझे तुझ्या अंगणात)
⏱🏹✋🏻

हीच वेळ 'फजितीची', सामील त्याला हात
शेवटची 'प्रगती' होती 🌷,तुझ्या प्राक्तनात

पदासाठी भांडून बसलो
मंत्रा -लया साठी अडलो
कधी युती मध्ये सडलो, आता आघाडीत

आरे, बुलेट, जा(ना)णार नाई
काही यांचा नेमच नाही
'समृध्दी'  शिवाय नाही, काहीच मनात

मुका बावरा तू भोळा?
दिसेल का तुझीया डोळा?
*संपेल का स्थगिती आता, तुझ्या निर्णयात*

हीच वेळ 'फजितीची', सामील त्याला हात
शेवटची 'प्रगती' होती 🌷,तुझ्या प्राक्तनात

📝१२/१२/१९
अमोल
poetrymazi.blogspot.in

तिन तिगाडा काम बिघाडा

तिन तिगाडा काम बिघाडा

काही काही गोष्टींचा आपल्या मनावर एवढा पगडा असतो की तशी वेळ आली की आपोआप मनात विचार येतातच. उदा. तीन जण एका विशिष्ठ कामासाठी एकत्र आले तर आता  या कामात काहीतरी 'बिघाड' होणारच किंवा एखादी गोष्ट सलग दोनदा झाल्यावर आता 'इजा,बिजा,तिजा ' होणारच यावर आपण ठाम असतो. अर्थात असे मत बनण्यात ब-याच दा अनुभवाचा ही वाटा असतो

पण याच ३ अंकाशी आपले फार ऋणानुबंध आहेत. अगदी आपला भूतलावरचा अवतार 'जन्म, जीवन , मृत्यू ' या तीन प्रमुख घटनांशी संबंधित आहे. जीवनप्रवाहात पुढे जात असताना 'भूतकाळ, वर्तमानकाळ, भविष्यकाळ' या तीन खिडक्यातून आपण सतत डोकावत असतो. वेगळ्या पद्धतीने सांगायचे झाल्यास बाल्य, तरुण,  वृध्दत्व या ३ अवस्था सर्वसाधारणपणे आपल्याला चुकलेल्या नाहीत. अगदी पत्रिका बघतानाही ज्योतिषी 'लग्न कुंडली',  'राशी कुंडली' आणि 'नवमांश कुंडली' अशा ३ पत्रिका बघतात

सृष्टीचे चे जे चक्र अव्याहतपणे सुरु आहे त्यातही हवामाना प्रमाणे आपण मुख्यत्वे ३ ऋतू येतात:- 'उन्हाळा, पावसाळा, हिवाळा'

लेख थोडासा धार्मिक अंगाने न्यायचा झाल्यास आपण प्रामुख्याने ३ लोक ( स्वर्ग, पृथ्वी, नरक) मानतो. देव धर्म,  पूजा अर्चा, देवदर्शन करतानाही तीनाचे महत्व दिसून येते. साधारण कुठल्याही देवळात देव दर्शन झाल्यावर किमान ३ प्रदक्षिणा आपण मारतो ( किंवा माराव्यात). पूजेच्या वेळी आचमन करताना 'केशवाय नम:, नारायणाय नम:, माधवाय नम: असे तीन वेळा आचमन करुन गोविंदाय नम: असे म्हणून उदक सोडतो.

आपल्या देशाचा राष्ट्रध्वज 'तिरंगा' म्हणून ओळखला जातो तर शत्रूच्या उरात धडकी भरवणारी तीन सेना दले आपल्याकडे आहेत. २६ जाने,  १५ आँगस्ट ला  राष्ट्रगीत म्हणल्यावर 'भारत माता की जय' चे नारे साधारण पणे ३ वेळा देतो

मंडळी म्हणूनच प्रत्येक वेळी एकत्र आलेल्या ३ गोष्टी वाईट नसतात. उद्याचा दिवस तर या दृष्टीने किती महत्वाचा आहे हे वेगळे सांगायला नको. ब्रह्मा,  विष्णू,  महेश या तीन बालकांचा 'अवधूत चिंतन श्री गुरुदेव दत्त' रुपी जन्म झाला तो मार्गशीर्ष पोर्णीमेला. बाकी यामागील गोष्ट सगळ्यानाच माहिती असेल.

तेंव्हा जेंव्हा जेंव्हा ' तिन तिगाडा काम बिगाडा ' असं वाटेल तेंव्हा तेंव्हा एकच गोष्ट आठवायची

ब्रह्मा विष्णू आणि महेश्वर सामोरी बसले
मला ही दत्तगुरु दिसले. 🙏🏻🌺

असा बदल आपल्यातच झाला की जणू
 ' तिन्ही लोक आनंदाने,  भरुन गाऊ दे ' अशी भावना व्हावी

'तिन्ही सांजा सखे,  मिळाल्या,
देई वचन तुला.

 देणार वचन?   लागायच कामाला परत?
चला,
१, २, साडे माडे , तीन

📝१०/१२/१९
अमोल
poetrymazi.blogspot.in

कांदे (अश्रू ) पूरम

आमच्या काही आवडीच्या मिसळी मग ती ठाण्याची 'मामलेदार' असो, शिवसेना भवन जवळची 'आस्वाद' असो किंवा थेट पनवेल जवळची 'दत्त स्नॅक' ची असो. बिचाऱ्या 

ऐका त्यांचे कांदे(अश्रू) पुरम् 🙁
( चाल: मेंदीच्या पानावर मन अजून झुलते गं)

कांद्याच्या दरावरुन वाट आमची लागली गं
शेव, फरसाणाचेही मन अजून झुलते गं

चिरचिरतो स्वयंपाकात तोच गार मूळा गं
हिरमुसतो मिसळीचा अजून 'कट' सारा गं

अजून तुझे क्विंटलचे दर कसे चढते गं
अजून आमच्या डोळ्यातील अश्रूपण कवळे गं

कांद्याच्या दरावरुन वाट आमची लागली गं
शेव, फरसाणाचेही मन अजून झुलते गं

📝८/१२/१९
poetrymazi.blogspot.in

स्क्रिन शाॅट

# स्क्रीन शॉट

 तुम्ही जो संगणक , लॅपटॉप , स्मार्टफोन  वापरता/ बघता  त्याच्या स्क्रीन / दृश्य भागाचा हुबेहूब फोटो काही  युक्ती वापरून घेणे  म्हणजे "स्क्रीन शॉट" घेणे.
जे  स्मार्ट फोनसारखी आधुनिक उपकरण वापरत आहेत त्यांना हे काही नविन नाही.

 आता तर अनेक फोन मध्ये "स्क्रिन शाॅट"  घेण्यासाठी  विशेष सोय  असते .संगणकात ही " प्रिंट स्क्रीन"  म्हणून पहिल्या पासून एक आॅप्शन आहे.

 पूर्वीच्या म्हणजे साधारण ५-६ वर्षांपूर्वीच्या स्मार्ट फोन मध्ये मला अजून आठवतंय "स्क्रीन शॉट " घेणं हे खायचं काम नसायचं .  ते व्हॉल्यूम आणि  मोबाईल चालू बंद  करायचं बटन एकाचवेळी दाबून चित्र पकडावं लागायचं. मला हे जमायला खूप वेळ लागला होता. ब-याच वेळा मोबाईल बंद व्हायचा. व्हॉल्यूम कमी जास्त व्हायचा  पण शंभर प्रयत्नात एकदाच तो फोटो मिळायचाच.

 त्यामानाने आता काम खूप सोपं झालाय. एका टिचकीसरशी स्क्रीन शॉट निघू शकतो.

तुम्ही म्हणाल हे काय हे लिहितोय आज ?
 मंडळी  आपल्याला सुचला विषय की आपण लिहितो. बरेच लेखन हे आपण त्या अनुभवातून गेल्यावरचे ही असते. आजचे लेखन ही जरा असेच हटके म्हणा हवं तर

थोडासा वेगळा विषय.
लहानपणी आपण अनेकदा भाडणं केलीत  मग ती  भावंडांच्यात असोत किंवा मित्रांच्यात असोत . परिस्थिती नुसार  ती  भांडणे वडिलधा-यांकडे , शाळेतील शिक्षकांकडे  जायची , मग असा काही संवाद व्हायचा

हा बोलं काय झालं

सर, असं असं झालं

का रे तू  असं बोललास ?

नाही सर , हाच असं म्हणला  वाटल्यास  तमक्याला  विचारा

कोण आहे रे तिकडे , बोलव तमक्याला

हा सांग रे तू  आता सगळं खरं

सर तो अमका आहे ना त्यानेच सगळं केलय

तुम्हाला सगळ्यांना शेवटची सूचना देतोय , परत असं होता कामा नये .
 संवाद समाप्त

हे लहानपणीचे सगळे अमके , तमके आता मोठे झाल्यावर   कुणी नक्की काय म्हणले , काय चर्चा केली हे आता "स्क्रीन शॉट" काढून  पुरावे द्यायला लागेलत

"स्क्रीन शॉटची टिचकी , गोत्यास काळ " 😬

तर असा हा "स्क्रिन शाॅटचा" महिमा

आपल्याकडे 'आरसा ' हा आपलं बाह्यस्वरूप पाहण्यासाठी वापरली जाणारी वस्तू. पण अशी ही एक गोष्ट  असायला पाहिजे होती की मारली टिचकी आणि आपल्या मनात काय चाललंय  याचा "स्क्रीन शॉट" मिळेल.

बरं का मंडळी,  आता मनात काय चाललंय हे "स्क्रीन शॉट" शिवाय ही  कळलं असत की, पण  आपलं ना "कळतंय पण वळत नाही " असं झालय. आधूनिक प्रणाली हाताशी असली कीच  ते खरं वाटत .

नामस्मरण, प्राणायाम या सगळ्या गोष्टीतून चिंतन, मनन हे सगळं विसरून आपण भलत्याच गोष्टीच्या आज मागे लागलो आहोत आणि बाह्य गोष्टीवरच जास्त अवलंबून रहायला लागलो आहोत हे आपले दुर्देव . थोडंस आपल्या आत आपणच डोकावून, आपण आपलाच "स्क्रिन शाॅट " घ्यायला काय हरकत आहे?

देव करो अन अस गाणं म्हणायची वेळ आपल्यावर येऊ नये:-

भांडणात शिरताना माझा का केलास घात ?
सख्या रे आवर तो , सावर तो "स्क्रीन शॉट "

शिक्षकांच्या खोलीतून
आलो  मी एकटाच
दूर तिथे ' कळ ' लावे
हसले मागे कधीच
ह्या इथल्या वेदना या  सारे जण  जाणतात
सख्या रे आवर तो , सावर तो "स्क्रीन शॉट "

सांग आता तुझ्याविन
भांडू  कसा भरपूर
तुझे शब्द छळवादी
अन हे मित्र फितूर

स्पर्श  तुझा जोरदार , मार होता जबराट
सख्या रे आवर तो , सावर तो "स्क्रीन शॉट "

भांडणात शिरताना माझा का केलास घात ?
सख्या रे आवर तो , सावर तो "स्क्रीन शॉट "

📝 ©अमोल केळकर 🧐

महाग महाग महाग किती

टिप: ज्यांचा मंगळवारचा उपवास असतो त्यांनी इथूनच मागे जाण्यास हरकत नाही 🙏🏻🌺

अस्सल मटणप्रेमी पण वाढलेल्या दराने भडकलेल्या कोल्हापूरकरांना समर्पित 😋

( चाल : कठिण कठिण कठिण किती)

महाग महाग महाग किती
मटण दर हा बाई
बाजाराप्रती निघता अंत कळत नाही

पाहुनी बावड्यात मटण ,
मधुर दिसती
तरिही हसत उभारुनी खिसा चाचपती

रस्स्याचा सुंदरसा वास गुंफिती
किलो किलो भर परि शेवटी
घेऊन घरात जाई

महाग महाग महाग किती
मटण दर हा बाई
बाजाराप्रती निघता अंत कळत नाही

📝३/१२/१९
poetrymazi.blogspot.in 😋

आमचं ठरलंय, विडंबन जमलयं ✌🏻